کوچ از کربلا
زبانحال حضرت زینب (س)
.
.
.
#سبک_سو_یوخومدی_قزلاروندان … 5 سبک
مشابه
.
.
مرحوم شانی تبریزی
.
.
دور بو دربدر عیالون
سالدیلار نظامه قارداش
کربلالیلر دوباره
عازم اولدی شامه قارداش
.
.
تاپماسون گرکدی احکام نفخ صور اولونجا تغییر
چون سن حق سوز اوسته ئولدون وار سوزونده بیله تاثیر
سسلدی یارالی باشون تا جدا باشندا تکبیر
صف چکوب اسیر عیالون دوردولار قیامه قارداش
.
.
گلمیشم بو سرزمینه اکبر جوانیله من
عون و فضل و قاسمیله اشجع زمانیله من
ایمدی شامه عازم اولدوم شمریله سنانیله من
سن بو کربلاده خوش یات یتموسن مرامه قارداش
.
.
قویموری عدو دویونجا بیرجه آغلیوم گیدوم من
دوغرانان جنازن اوسته سینه داغلیوم گیدوم من
قان ویرن یارالاریوی باری باغلیوم گیدوم من
گر چه حشر اولونجا یتمز زخمون التیامه قارداش
.
.
گیرم ال تاپوب سنه بو کوفیان نامسلمان
سو یانندا ویرمیوب سو باشوی کسوب لب عطشان
زینبون ئوله ندن بس جسموی قویوبلا عریان
داد کوفیان الیندن نولدی کهنه جامه قارداش
.
.
سن بویورموسان دوزوم من ای شهنشه مدینه
هر قدر بروزه ویرسه کینه سین گروه کینه
من دوتاخ دوزوب دایاندیم نیلسون قیزون سکینه
گور دوزر بو جور و ظلم لشگر ظلامه قارداش
.
.
اوندا که قوشون خیامه گلدی قصد غارتیله
خوفه دوشدی اهل بیتون وحشت اذیتیله
برگ گل کیمی اسیله ایمدیده او وحشتیله
گلمیوب هله دوتولموش دیللری کلامه قارداش
.
.
نه مصیبته تحمّل ایلسون مگر بو عورت
عزتی گیدوب الندن خیمه سی اولوبدی غارت
هر مصیبتمدن آرتوخ یاندیرور بو بیر مصیبت
ووردیلار غل و دوشاخه بو علیل امامه قارداش
.
.
بیر مریض که اونیله دردینی تاپار معالج
قالدی اوددا یاندیم ویردی یانماقیم نتایج
ایلدیم اونی او اودان بیر مشقتیله خارج
ایلدی اثر او حالیم فرقه لئامه قارداش
.
.
قسمت ایتدیلر یتیشدی اوچ اسیره بیرجه ناقه
اگلشنمیوب دوشنده هر یتیمه قیز اشاقه
شمر الینده تازیانه تا یتور یتیم اوشاقه
کینیله ویرور او ظالم ظلمنی تمامه قارداش
.
.
یوخ الیمده اختیاریم دیندیروم عطوفتیله
ناقه لر بیری بیریندن چون گیدیر مسافتیله
کافر اولسادا یتیمی دیندیرولّه رافتیله
نه ووروب دوگلّه دؤنسون روزگاری شامه قارداش
.
.
بیر دانیش بو مرده جسمه عیسیِ زمانه جان ویر
من مسافرم دالیمجا باری دور اؤزون اذان ویر
نیزه ده کسیک باشیله دؤش قباقه یول نشان ویر
تا باشون دالینجا باشلار دوشسون انتظامه قارداش
.
.
ایتمرم سنی فراموش من دعای نیم شبدن
سو گورنده یاد قیلام هر زمان بو خشک لبدن
قویمارام گوزیوی یولدا شام و کوفه و حلبدن
پیک آهیله یتورم نامه اوسته نامه قارداش
.
.
ای ترابی مقتلنده قانیله اولان ملمخ
«شاننون» آلیبدی جانین خوف دوزخیله برزخ
اولما راضی حشر اولاندا اولسا گر مکانی دوزخ
اوز اودیله اودلانوبدی باخ الینده خامه قارداش
.
.
#دور_بو_دربدر_عیالون_سالدیلار_نظامه_قارداش
#ترکی
#زبدةالاشعار
نظر دهید