ورود به مدینه
زبانحال حضرت زینب «س» با مادرش
.
✍️ زبدة الاشعار ✍️
.
🆔: @nohe_torki
.
محمدرضا صادقی
.
دور قبریدن آنا که اسیر بلا گلوب
اما وئروب حسینوی دینه فدا گلوب
.
.
تا دعوت اولدی قارداشیم اهل و عیالیلن
عازم اولوبدی کوفیه مال و منالیلن
دشت بلایه تا یتشیوبدور جلالیلن
بولدی عراقین اهلی شه کربلا گلوب
.
.
باخ میزبانیده آناجان سن شقاوته
اوٌلده باغلیوب سو یولون اهل عصمته
آل اللهی او چولده سالوب رنج و محنته
گوردوم او چولده اون نچه مین اشفیا گلوب
.
.
مسکن اولوب او چولده بیزه بیر چوخور مکان
بولمم نه سرعتیله گئچوب ختم اولوب زمان
یوم بلا یتوشدی او گوندن آنا امان
بی جا دگور دئسم او چوله انبیا گلوب
.
.
اول چولده ظلمیله آنا اول لشکر پلید
هر کیمسه اولموشیدی جگرگوشوه مرید
رحم ائتمیوبله ایلدیلر بیر به بیر شهید
یولداشلاری قوتولدی آنا اقربا گلوب
.
.
اکبر گئدنده خیمده احساسیمی آنا
گوردی سریه سالدی یولا قاسیمی آنا
اما نجور دیوم سنه ,نجه عباسیمی آنا
جام الده سالماقا یولا بیر مه لقا گلوب
.
.
اکبر گلنده قیزلار ائدوب شیون آغلادی
قاسم غمینده ناله چکوب دشمن آغلادی
عباسه ظلم اولاندا گل و گلشن آغلادی
گویا نجفده یاسینه شیر خدا گلوب
.
.
اما حسینوی آناجان من نه حالیلن
گتدوم امانتین ولی وئردیم ملالیلن
ئوپدوم بوغازینی یولا سالدیم جلالیلن
گوردوم گئدنده نالیه ارض و سما گلوب
.
.
توکدوم عذاره خیمه ده گوز یاشینی آنا
سس گلدی شمر کسدی حسین باشینی آنا
ووردیم مصیبتون باشیما داشینی آنا
جنتده آه و وایه رسول خدا گلوب
.
.
ظلم آتشی او چولده چکنده زبانه سین
آل اللهین باخا باخا یاندیردی خانه سین
سعیم بوئیدی قورتارا قیزلار بهانه سین
یاندیم گل عمه خیمده زین العبا گلوب
.
.
اما نه چکدی گوزدن ایراق یولدا زینبون
وار تازیانه ردی آنا قولدا زینبون
هم ساغ قولوندا واریارا هم صولدا زینبون
بو قبره ایستوری آلا سندن شفا گلوب
.
.
وار کوفه دن سنی ولی آیری حکایتیم
قصر زیاده چکدی طناب اسارتیم
تا باشلانوب او یرده ندای رسالتیم
سس دوشدی نیزه دن باجی صد مرحبا گلوب
.
.
ابن زیاد او یره بیزه ناروا دئدی
ایچدی شرابی قارداشیما ناسزا دئدی
زینبده شوره گلدی سوزی بر ملا دئدی
ظالم اوتانموسان بیزه حقدن ندا گلوب
.
.
حمزه بیزیمدی عترت اطهار بیزده دی
فخریم بودور کی جعفر طیار بیزده دی
دین آبروسی حیدر کرار بیزده دی
گئت باخ کتابه آیه قل انما گلوب
.
.
بیر یرده ایلدیم آنا من نهضته قیام
هم خاص گلمیشیدی او ماوایه هم عوام
تا وار جهان تاپار آناجان نهضتیم دوام
مظلومه چونکه دست خدا اتکا گلوب
.
.
شام بلایه وارد اولاندا قطاریمیز
گوردوم کی کف چالاندی یمین و یساریمیز
دوشدی آنا یهود الینه اختیاریمیز
سسلندیلر گلون حرم مرتضی گلوب
.
.
هر کیمسه کینه سی واریدی ائتدی اهتمام
بیر لحظه کوچه ده آناجان اولدی ازدحام
تا اذن اولوبدی ایستوری هر کیمسه انتقام
داشلار الینده ایلدی دئینین ادا گلوب
.
.
اما خرابه اولدی مکان جمله عترته
قاتدی بلالی باشیمی بیر آیری محنته
ئولدی رقیه من نئجه دوزدوم مصیبته
الله بولور کی قامتیمه انحنا گلوب
.
.
دم وئردی « حیدری » بو سوزه سینه داغلادی
یازدی ولیک « صادقی » سس چکدی آغلادی
لطف ایله سن آنا بو سوزی بیله باغلادی
ایستور بقیع سنون قاپووا چون گدا گلوب
.
.
#ورود_مدینه
#دور_قبریدن_آنا_که_اسیر_بلا_گلوب
#محمدرضاصادقی
#ترکی
.
✍️ #زبدةالاشعار ✍️
.
🆔: @nohe_torki
نظر دهید