راه شام
.
✍️ زبدة الاشعار ✍️
.
?: @nohe_torki
.
مرحوم حاج عبّاسقلی صابر تبریزی
.
چون ناقه دن رقیّۀ نالانی یخدیلار
بو دللریله نالیه گلدی او دلفگار
.
.
شاه بیت :
دوشدوم دوه دن گیتمه ای عمّه سنی تاری
گل قویما بو صحرای بلاده من زاری
خانم عمّه سنه قربان
منی گل قویما پریشان
.
.
چون بلبل ای عمّه چمن آواره سیم من
سن تک ائل و خویش و وطن آواره سیم من
آهوی خطایم ختن آواره سیم من
صیّاد خطا دیده و بی رحم شکاری
.
.
ازبسکه فشار غم و محنتله سخلدیم
بی طاقت اولوب ناقه دن آخِرده یخلدیم
چارم کسیلوب خار مغیلانه سخلدیم
دنیایه باخ ایتدی قاچاجاق یر گله خاری
.
.
میدانه گیدن وقته بابام شاه شهیدان
اطفالینی تاپشوردی سنه اول شه عطشان
گل قویما بیاباندا منی بیکس و نالان
لنگ ایت بیر آز ای قافله سالار قطاری
.
.
سن دادرس عترت شاه شهداسن
سن عمّه بیزه ملجا و سرخیل و رجاسن
سن حامی و مُستحفظ خیل اُسراسن
گل ایله حمایت منه، درک ایت بو فگاری
.
.
یورقون یوخوسوز محنت و اندوه اسارت
قویموبدی من غمزده و خسته ده طاقت
شهزادیه مشکلدی ئولومدن بو حقارت
چرخین گوروم ای کاش دونِیدی بو مداری
.
.
وحشتلی بیاباندا صغیرم قیزام عمّه
یوخ کیمسه پناهنده اولان، یالقوزام عمّه
غم طاقتیمی طاق ایلیوب جانسیزام عمّه
یوخ قوّه دیزیمده دولانوم دشت و قفاری
.
.
یوخ قورخولی یوخ داده یتن بیر کسیم آخِر
آز قالدی حیاتیمدن علاقه کسیم آخِر
داد ایلدیم ازبسکه دوتولدی سسیم آخِر
اشکیم یرینه خون دل اولدی یوزه جاری
.
.
قربان کسیلوم مقدمیوه من اوزوم عمّه
گل یولدا قالا قویما بو آغلار گوزوم عمّه
اشکیم کیمی دوشسون یره قویما سوزوم عمّه
درک ایت منی درک ایلمه میش من شب تاری
.
.
اکبر غمی سالموش بو دل و جانیمه آتش
اولسیدی اگر ایمدی او شهزادۀ مهوش
قویمازدی بو صحراده منی زار و مشوّش
صد حیف که ئولدوردوله اول ماه عذاری
.
.
یولّاردا گلن وقتیده بیز کرب و بلایه
چتر سر زلفیله سالاردی منه سایه
گلمور نیه بس ایمدی بو صحرای بلایه
زلفیمده یوزیمده گوره بو گرد و غباری
.
.
هر چند صغیرم ولی دل ایلوری احساس
قتله یتیشوب کان محبّت عموم عبّاس
اولسیدی اگر زنده یقین اول شرف ناس
شمرین اولا قویمازدی منیله سر و کاری
.
.
شمرین ندی بولمم بو قدر ظلمه دلیلی
قمچی ووروری باشیمه، رخسیاریمه سیلی
یاندوردی بلا آتشی اولاد خلیلی
شمرین بیزه نمرودیدن آرتوخدی فشاری
.
.
.
بو دللریله دل دیوب ازبس او دل افکار
ناگه دایانوب نیزه ده راس شه ابرار
مطلبدن عمرسعد لعین اولدی خبردار
امر ایلدی زجره تاپا اول بیکس و یاری
.
.
بو قصّۀ دلسوزی ایدر راوی روایت
زجرین اورگینده یوخودی رحم و مروّت
بولدوم تاپا شهزاده نی گر ایلر اذیّت
سوردوم آتیمی منده او شهزادیه ساری
.
.
سرعتله گیدوب تاپدوخ عزیز شه دینی
گورجاق سارالوب رنگ رخی زجر لعینی
زجر ایستدی وورسون او دل افکار و حزینی
من مانع اولوب قویمادیم اول کینه شعاری
.
.
مندن اثر رحم گوروب جراته گلدی
یردن ایاقا دوردی دیزی قوّته گلدی
یاندیم اونون احوالینه دل رقّته گلدی
فکر ایتدیم اونی من آپارام بلکه سواری
.
.
منظوریمی بولجاق بویوروب دختر طاها
نامحرمیله بیر آتا من مینمرم اصلا
ناموس الهی قیزیام، حضرت زهرا
جَدَّمدی، بابام شیر خدا حجّت باری
.
.
سیز یولّانون آردوزجا من غمزده گلّم
مجبورم، اگر چولده قالوب گلمسم ئولّم
غم قافله سی مندن اوتور لنگیدی بولّم
هرچند ید شمریده دور ناقه مهاری
.
.
دوشدی یولا سرشار دُرِ اشکیله دیده
تیترردی خزان برگی تک اول زجرکشیده
گه قاچدی گهی دوردی چو آهوی رمیده
نه دلده نه دیزده واریدی تاب و قراری
.
.
مُستولی اولوب خسته لیق اول طاقتی طاقه
اگلشدی یره معجرین ایتدی ایکی طاقه
بیر حصّه باشا باغلادی بیر حصّه ایاقه
یاندی دیدی یارب گور ایاقیمده قاباری
.
.
القصّه سوروندی بیزیله پای پیاده
تا قافلیه یتدی او رنجور و فتاده
تا دوشدی گوزی شه باشینا نوک جداده
تعظیم ایلیوب گوردی سر باب کباری
.
.
بیر آه چکوب یاندیروب عالمری یاخدی
فریاده گلوب گوزیاشی رخسارینه آخدی
نه عمّیه نه باجیه نه قارداشا باخدی
یوز دوتدی آتا باشینه، گور شان و وقاری
.
.
سولموش گلینی گوردی او بلبل سوزه گلدی
دل یاندی، جگر قانی اورکدن گوزه گلدی
گل تک سارالان رنگی دوباره یوزه گلدی
بو دللریله ایتدی شروع شکوه گذاری
.
.
ای قانلی گوزی حق گوزی سالما منی گوزدن
آخِر دونه جاق بولمزیدیم بیله اوز اوزدن
سوز دلیمی آندیرورام دلده کی سوزدن
خاموش ایله لطفولنه بو سینمده کی ناری
.
.
چون لاله ایدوب باغریمی قان محنت هجران
چشمیم دولودور اشکیله چون ابر بهاران
رخصت ویر ایدوم اشکیمیله عالمی ویران
شرمنده گوزوم یاشی قیلا ابر بهاری
.
.
دل دردینه حق لطفی طبیبون اولا #صابر
بو اهل عزا جمله حبیبون اولا #صابر
قبر شه لب تشنه نصیبون اولا #صابر
چون کعبه طواف ایله او شش گوشه مزاری
.
.
#سبک_ای_باد_صبا … 7 سبک
.
.
#راه_شام
#چون_ناقه_دن_رقیه_نالانی_یخدیلار
#دوشدوم_دوه_دن_گیتمه_ای_عمه_سنی_تاری
#صابر_تبریزی
#ترکی
.
✍️ #زبدةالاشعار ✍️
.
?: @nohe_torki
نظر دهید