مجلس یزید
.
✍️ #زبدةالاشعار ✍️
.
🆔: @nohe_torki
.
مرحوم شهاب تبریزی
.
دوشدی خیالیمه گینه بیر بزم غمفزا
شرم ایلورم او بزمین ایدم شرحنی أدا
.
سال یادیوه او وقتی یزید ستم شعار
بیر بزم عیش و نوش ایدوب چیده برملا
.
کرسیلر اوسته روم و فرنگ ایلچیسی تمام
امر ایلدی حضوره گله آل قل کفى
.
امر یزید دونیله باغلاندی قول قولا
آل رسولی حاضر ایدوبلر او بزمه تا
.
تخت اوسته اگلشوب اوزی کبر و غروریله
بسکه هوای سلطنت ایتمیشدی بد هوا
.
امرایتدی ساقیلر گتوره باده مجلسه
هم مجلس اهلی هم اوزی مست شراب اولا
.
مست اولدی اول لعین چخوب هوشی باشدن
آچدی زبان نحسنی اول شوم بی حیا
.
ایندی نظر حسین باشنا ایلدی خطاب
الدیم قصاصیمی گئجه من قویمادیم قالا
.
آچ بیر او قافلو گوزلریوی باخ سکینه وه
ساخلاتمشام قباقدا نئجه گور برهنه پا
.
ئولدورموشم شبیه پیمبر جوانوى
لیلا باخور او قانلو باشا چوخ یانا یانا
.
پوزدوم تفاقوی ولی ال چکمرم حسین
وورام آقاج بو لبلرہ زینب باخا باخا
.
عباسیون هاردادور یتشه داد یوه سنون
گورسون ووراندا باشوی اول معدن وفا
.
اوّل دیدیم سنه منه گل بیعت ایت گیلن
سن ایتمدون قبول ایا سبط مصطفی
.
دورموش قباقدا گورنه حقیرانه زینبون
هر دم باخور بو باشیوه سویلور که وا أخا
.
دوشدون بو فکره سن قویاسان تاج سلطنت
فکرون خطا گیدوب ایلدون اوز اوزون فنا
.
اما هزار حیف حسین تیز قوجالموسان
قاندان بو آق محاسنوه یاخموسان حنا
.
باخ بوعلیل اوغلوا زنجیره بسته دور
دورموش قباقدا بویننی زنجیر ایدوب یارا
.
قرخ منزلی ایاقلاری باغلی گتورمشم
غول تک برابریمده دوروب زار و بینوا
.
بیر سوز گلور خیالیمه گر فاش ایدم اونی
جنتده وار یری که آنان ساچلارین یولا
.
فکریم بودور که فاطمه نی من ویرم کنیز
تا زینبون دوباره یانان قلبی اودلانا
.
بو فکر خامیدی ولی آگاهیدی اوزی
اولماز کنیز معدن ناموس کبریا
.
مقصوده نایل اولمادی اول زادۀ زنا
آچدی دوباره سرزنشه دل او بی حیا
.
سویلوب حسین بو باشون الیمده بو خیزران
وورسام نقدر کیمسه ایدنمزمنی اِبا
.
بیر ظلم ایلدی که دل عاجزدی شرحنه
مقتلده وار همین خبره طُرفه مبتدا
.
جلاد هاردادی دیدی بیماری ئولدوره
قطع ایلیم بو نسلی گرک قویمیام قالا
.
اویناتدی خیزران آقاجین الده قوزیوب
وردی او قدر تا بویانوب خیزران قانا
.
دوردی ایاقه اصغر آناسی او وقتده
سلندی وورما سن او باشی ایله بیر حیا
.
فوراً اوزین یتوردی او ناموس معدنی
گوتدی او باشی اوپدی خانم باسدی باغرینا
.
ال چکمدی معاویه اوغلی منادیدن
چوخ ظلملر او باشه ایدوب دشمن خدا
.
بیرده بروزه ویردی او ظالم شقاوتین
عذر ایسترم ایدم بو سوزین شرحنی ادا
.
دخت علی او حینده گلدی تکلمه
وورما دیدی او باشی حرملر ایدر نوا
.
باخ بیر خدایه ایله حیا ای شقی اوتان
شل اولسون اللرین ایلمه بو قدر جفا
.
سن خیزران ووراندا اوسولموش دوداقلارا
اطفال بویلانوب باخار اول نازنین باشا
.
آخر ندور جزاده جوابون پیمبره
ایتسه سئوال سندن اگر موقف جزا
.
آیا نه ایلمشدی حسین ابن فاطمه
ایتدون شهید او شاهی ذبیحاً من القفا
.
غیظه گلوب یزید دونوب باخدی زینبه
بیر سوز دیدی که شرحنی من ایتموم أدا
.
زینب ایشتدی اول سوزی دوندی دیدی یزید
قطع ایلسون خدا دیلون ای زادۀ زنا
.
شاهلار اسیرله بیله رفتار ایلمز
سب ایلماق اسیری دَگُل شاهلارا سزا
.
بزم یزیدی یازما شهابا بس ایت گیلن
اجرون ویرر جزاده سنون خالق علا
.
#مجلس_یزید #شهاب_تبریزی
#دوشدی_خیالیمه_گینه_بیر_بزم_غمفزا
#ترکی
.
✍️ #زبدةالاشعار ✍️
.
🆔: @nohe_torki
نظر دهید