وداع حضرت امام حسین (ع)
.
✍️ #زبدةالاشعار ✍️
.
🆔: @nohe_torki
.
محمد هوشمند ( مدهوش تبریزی)
.
دیار کرب وبلا تاپدی آیری حال و هوا
یئتنده آیریلیق هنگامی ظهر عاشورا
.
وصال یارینه عاشق اولوبدی آماده
یاخینلاشیب سالا محراب عشقه سجاده
.
بویاندی یاور و انصاری بیربه بیر قانه
دیار کرب و بلا دوندی بیر گلستانه
.
صفالی لاله لریله بزندی قربانگاه
سالیب جهانه ندا لا اله الا الله
.
یانان اورکلری آب بقا ائدیب سیراب
هوای وصلیله عاشقلر ایچدی باده ناب
.
بویاندی قانه حبیب و بریر و زاده قین
قالیب دی عرصه ده یالقیز رسوله نور دوعین
.
شهادت امرینی شوقیله اختیار ائله دی
قرار وصل او مولانی بیقرار ایله دی
.
بیلیردی چاره یولون باغلییوبدی قوم عنید
نماز عشقه اوزون حاضر ائتدی شاه شهید
.
قیتدی خیمه لره سرور زمین و زمان
وداع ائتماقا اهل خیامی دیلده فغان
.
وداع آخریینی اهلبیته وئردی خبر
بویوردی گئتمه لیم رزمه اولدی وقت سفر
.
اورکده آتش مهر و وفا آلیشدیردی
حیالی قیزلاریینی بیر به بیر دانیشدیردی
.
حرملری باشینا ییغدی لطف و ناز ائله دی
سینیق اورکلرینی آلدی سرفراز ائله دی
.
بیلیردی آز قالیری موقع شهادتینه
گلیب خیامیده سجادینین عیادتینه
.
نه گوردی طاقتی یوخ هم مریض و عطشاندیر
دوورب اوتورماقا امکانی یوخ پریشاندیر
.
مرضی شدت ائدیب هم عطش اذیت ائدیر
طبیب عالمه ، زینب گلیب طبابت ائدیر
.
گوروب آتاسینی تا وارد اولدی اول سرور
مصمّم اولدی دورا اسدی یئل کیمی دیزلر
.
بویوردی عمه سینه قیل کمک ایاقه دوروم
دورانماسام کمک ائت بلکه روبه رو اوتوروم
.
اگر چه اولمادی ممکن او لحظه حال قیام
وئریب دی حضرت سجاد امام عصره سلام
.
امام باخدی گوروب چهره سینده گرد ملال
محبتیله دانیشدیردی حالین ائتدی سوال
.
آتا بالاسینی جان تک باسیب دی آغوشه
فراق گونلرینه وصلیدن وئریب توشه
.
بو صحنه قلب زمین و زمانی داغلاردی
آتا بالا نئجه سسیز یاناردی آغلاردی
.
محبت عالمی بزم وصال اولوب خلوت
آچیلدی موسم هجراندا وصلیدن صحبت
.
رموز عشقی بیلر سالک طریق نگار
اشارتیله ائدیب یار تبلی الاسرار
.
بیانه گلدی بویور ای امیر ارض و سما
منه گوروم نئجه دی ایمدی وضع و حال بابا
.
نیه وجودیوه بو قدری ابتلا ییتیشیب
بویور گوروم بو قوشونلا ایشین هارا یئتیشیب
.
بو سوزده قلبی امامین دوباره داغلاندی
شرار محنتیله اود دوتوب الولاندی
.
بویوردی سختیدی گر چه دییم نه لراولدی
اسیب دی باد جفا جنگ شعله ور اولدی
.
نه جنگ مثلیینی گورمز داخی زمین و زمان
بویاندی قاننه یکسر بو چولده پیر و جوان
.
ایکی سپاهه ده میدان رزم تنگ اولدی
بویاندی کرب وبلا قانه لاله رنگ اولدی
.
غلبه ائیله دی وجدانلارا بو گون شیطان
حساب و روز جزانی چیخاتدیلار یاتدان
.
یاخینلاشیب دی که منده قرار یاره گئدیم
حضور یاره نه خوشدور بدنده یاره گئدیم
.
بو یئرده حضرت سجادین اولدی اشکی روان
گلوب تکلمه جانیم سنه فدا آتاجان
.
شکسته حالین ائدیر قلب داغداره اثر
هاباندور نیه بس یوخدی قارداشیم علی اکبر
.
یورولموسان نیه حالون بئله پریشاندی
یارالیدی بدنون سربسر قیزیل قاندی
.
ندن حالین پوزولوب بیله مثل بیر گل یاس
منه بیان ائیله بس هاردادور عموم عباس
.
امام ایشیتدی سوزون قلبیدن چکیب دور آه
بویوردی اولدولا یکسر شهید عشق الله
.
محبت اهلی وفاسین منه نشان وئردی
جهاد ائدیب هاموسی عاشقانه جان وئردی
.
عمون فراته طرف حمله ائتدی سو گتیره
ولیک قویمادیلار مشکی خیمیه یئتیره
.
بو چولده باد جفاییله گلشنیم سولدی
سو اوسته قارداشیمین قوللاری قلم اولدی
.
بونی خلاصه دئیوم دیلده محنتیم چوخدی
رجالیدن ایکیمزدن صورا قالان یوخدی
.
بو قدری آغلا محنتده صبر ائتمه لیسن
باشین بلالیدی شامه اسیر گتمه لیسن
.
نقدری که دگیب انصاریمه ستمله یارا
علاوه منتظروندی سنون ده فوج بلا
.
اگر چه اولمادی سهمین سنون شهادتدن
بو امتیازه چاتارسان بلا و محنتدن
.
شهادت امری یاخین دی منایه گتمه لیم
بو دم حضوریوه نئچه وصییت ایتمه لیم
.
یاخینلاشیب منیم عمریم یئتیشین اتمامه
سنی کفیل ائدورم من بنات و ایتامه
.
بو چولده حافظ قرآن و دین و عترت سن
آتان شهید اولاجاق دی امام امت سن
.
من حاضرم که گئچم حق یولوندا جانیمدن
گرک دی سن اولاسان پاسبان قانیمدن
.
گرک دی عهدیمه بو چولده من وفا ائلییم
بو جانی منده ره عشقیده فدا ائلییم
.
وداع ائدیب سیزی بزم نوا قوروب گئدورم
حرملری سنی اللهه تاپشوروب گئدورم
.
رضای حقه رضایت واریم بلی دئمیشم
قلم یازاندا بلا منده کربلا دئمیشم
.
کفن ده اولماسا خاک شفا کفن دی منه
صفاسی چوخدی بو یئر دایمی وطن دی منه
.
بو غمده صبر ائله ائتمه نوا خداحافظ
بو قدری آغلاما ای با وفا خداحافظ
.
یاخنیلاشیب گورسن باشیمی جدا اوسته
منه وطن اولاجاق کربلا خداحافظ
.
اورکده دیگ محبت اودم جوشوب داشدی
آتا بالا ایکیسی دیلده غم قوجاقلاشدی
.
گوورب بو منظره نی زینب وفا پرور
بهار ابری کمی دولدی اشکیله گوزلر
.
امام حسرتیله خیمگهدن آیریلدی
قیتمه دی داخی دیللرده حسرتی قالدی
.
نه حال قالدی قلم ده نه تاب دفترده
دوباره محشر اولار گلسه جمع محشرده
.
وداع روضه سی مدهوش ائیله دی گریان
یازا یازا دئدی مولا جانیم سنه قربان
.
.
#وداع_محمد_هوشمند
#حسینیه_وداع
#دیار_کرب_و_بلا_تاپدی_آیری_حال_و_هوا
#ترکی
.
.
✍️ #زبدةالاشعار ✍️
.
🆔: @nohe_torki
نظر دهید