راه شام
.
✍️ زبدة الاشعار ✍️
?: @nohe_torki
.
مرحوم حاج محمد حسین جنتی مقام (صحاف تبریزی)
.
.
دیار کوفه ده چون کوفه ظلمی اولدی تمام
حسین عیالی اولوب دست بسته عازم شام
.
کجاوه لرده گوزی یاشلی دلفکار و ملول
سیزیلداشوردولا زنبور تک بنات رسول
.
آخاردی یوزلرینه حسرتیله قان یاشلار
گلوردی نوک جدا اوسته نالیه باشلار
.
مباد کیمسه اولا بو قضیّه دن آگاه
اودور گیدردیله بیراهه فرقۀ گمراه
.
گلنده هر بالا فریاد و شیونه دلدن
ووراردیلار باشنا تازیانه غافلدن
.
بو قدر ظلم و جفادن او قوم دویمازدی
اوجادان آغلاماقا بیر بالانی قویمازدی
.
اوغورلامشدی هامی قورخودان نفسلرینی
گلنده نالیه قمچی کسردی سسلرینی
.
صغیر اوشاق یول اوزاق ساربانی کینه شعار
طناب ظلمله قول باغلی ناقه بدرفتار
.
ایدنده درد دلین هر یتیمه قیز اظهار
گلوب سالاردی یره ناقه دن اونی اشرار
.
گیدردی سرعتیله یول سپاه بد فرجام
دیار شامه یتوب ایلسونله اخذ مرام
.
همان او حالده اثنای راهده ناگاه
دایاندی گوردیله رأس شه فلک درگاه
.
نقدر زور ویروب نیزه دار بد فطرت
محال امریدی گوردی او باش ایده حرکت
.
قلوب لشگری خوف و هراس دولدوردی
قوشون دایاندی هامی نیزه دارلر دوردی
.
دوشوب تعجبه حیرت گوتوردی کفاری
وقوعه گلدی او صحراده محشر آثاری
.
قوشون امیری او ساعتده گلدی فریاده
اوزین یتوردی حضور امام سجاده
.
علیل امامه او بیشرم کشف حال ایلدی
بو امر سخت و مهم علتین سوال ایلدی
.
دیدی نقدر ویرور نیزه دارلر حرکت
آتان باشی دایانوب گتمیری ندور علت
.
نه تک اوزی دایانوب ای شهنشه ابرار
او باشه تابع اولوب نیزه ده کسوک باشلار
.
ویروب جواب او زنا زادیه امام زما ن
بیوردی چولده قالان وار یتیمه قیزلاردان
.
بلوب قضیه نی میر سپه اولوب مجبور
تاپوب گتورماقا زجربن قیس اولوب مجبور
.
دیر که روای بلوردوم اونون شقاوتنی
بنات عصمته کوکلنده کی عداوتنی
.
دیدیم اگر تاپا هر یرده بو لَعین و دَنی
یتنجه قافلیه ئولدورور بو غمزده نی
.
بو فکریم آلدی الیمدن قراریمی ناچار
اونیله گیتماقا رحمیم ایدوب منی وادار
.
گلن یولا قیدوب سرعتیله یول گیتدوخ
او خورداجا بالا گورسندی مقصده یتدوخ
.
نه گوردوخ ایلوری وحشت چوخ اضطربیله
گهی قاچار ساقا گاهی صولا شتابیله
.
نه یول تانور نه گورور کاروان غم اثرین
الی باشندا توکور گل یوزه سرشگ ترین
.
بیر آز دورور دایانور هولدن اوزین ایتورور
دورانموری ایاق اوستونده دیلری تیترور
.
قویور تحیّر اَلین گه سوسوز دوداقلارینا
آخور سرشگی باخور گه قبار ایاقلارینا
.
همینکه گوردی اوزاقدن بیزی او دلخسته
سارالدی رنگی چکوب دلدن آهی آه اوسته
.
بُلوردی زجرین او قیز دلده کی شقاوتنی
او دور گورن کیمی یغمایه ویردی طاقتنی
.
یتشدی زجریله او بیکسدن انتقام السون
اونازنین بالانی قمچی التنا سالسون
.
دیدیم اَماندی اَلون ساخلا آز جفا ایله
یتیمه دور بو بالا وورما بیر حیا ایله
.
بونی هارا ووروسان گُلشن وفا گُلیدور
عزیز فاطمیه بو عزیزه سؤگُلیدور
.
بو رحمی منده گوروب حسرتیله بیر باخدی
شرار آهله دنیانی یاندیروب یاخدی
.
الین قویوب باشنا گوزده اشگ دلده نوا
پناه گتدی سیخلدی رکابمه او بالا
.
مقام و شأننه هرگز دگلدی زیبنده
حسین عزیزه سی اولسون منه پناهنده
.
دیدیم بو قدری بالا قورخما قویمارام وورسون
یارالی قلبیوی ظلم آتشینده یاندورسون
.
اوزاقدی قافله وار یولین مسافتی چوخ
پیاده گیتماقا سنده ولیک طاقت یوخ
.
دایانما گل گیداخ ای غمکشیدۀ دوران
گوزی یولوندا قالوب عمّه لر آنان نگران
.
یورولموسان سنی گل ترکیمه سوار ایلیوم
بو خدمتیله بو گون کسب افتخار ایلیوم
.
ایشیتدی بو سوزی مندن اوجالدی افغانی
باشین اشاقه سالوب دوشدی لرزیه جانی
.
بویوردی ایله حیا صاحب شریعتدن
اوزاقدی چوخ بو سوزون خاندان عصمتدن
.
قالوب بو چولده اگر ایلسمده قطع حیات
سوار ترکینه نامحرمون اولام هیهات
.
سورون سیز آتلاروزی من یواش یواش گلم
نه بیر توقف ایدوب نه دوروب نه دینجلم
.
دیر که آتلاری سوردوقجا بیز او حالیلن
او خسته قیزدا گلوردی بیزیله سرعتلن
.
بیر آز گلوب یورولوب دوشدی حیسدَن دوردی
یره اوتوردی ایکی گوزلرینی دولدوردی
.
باخوب ایاقلارینا چشم اشگباریله
گوتوردی معجرینی باشدان آه و زاریله
.
یارالی قلبلره ووردی تازه دن یاره
او کهنه معجرینی ایلدی ایکی پاره
.
باشنا باغلادی بیر پاره سین او کان حیا
قابار ایاقینه بیر پاره سینده باغلادی تا
.
ایاقه دوردی یولا دوشدی خوف وحشتله
گلوب یتوردی بیزی منتهای زحمتله
.
قابار ایاقله تا غم قطارینه یتدی
آتا باشی وورولان نیزیه طرف گیتدی
.
اوجالدی ناله سی ویردی اجازه گوز یاشنا
گلوب دولاندی ازل شاه کربلا باشنا
.
بلالی باشینون آلدی بلالرین نظره
قویوب ادب الینی سینیه اوتوردی یره
.
قابارایاقلارینی ویردی شاه دینه نشان
دیدی گوزوندن ایراق ای شهنشه عطشان
.
سالوب نه حالته گور ساربان بو نالانی
اولوب ایاقلاریمون سو کیمی روان قانی
.
واریمدی ایمدی بابا بیرجه خواهشیم سندن
بلالی عممه دی گوز گوتورمه سون مندن
.
منیم اگرچه چکوب زحمت و مصیبتمی
یتورسه شامه یتورم تمامه زحمتمی
.
اوقدر ایله میسن خالقه خطا « صحّاف »
صحیفۀ عملون تیره تار ایدوبدی خلاف
.
توسُّل ایله حسینون بو نور دیده سنه
ویرن خرابه ده جان قلبنون چکیده سنه
.
بیر اوزگه طرزیله یاز شام شوم حکایتنی
بو جمعه ایسته اونون قبرینون زیارتینی
.
#راه_شام
#دیار_کوفه_ده_چون_کوفه_ظلمی_اولدی_تمام
#صحاف_تبریزی
#ترکی
.
✍️ #زبدةالاشعار ✍️
.
?: @nohe_torki
نظر دهید