در مدح و شهادت امام جعفر صادق علیه السلام
.
.
.
علومی تبریزی
.
رئیس مذهب و ایمان امام صادقدی
ولایت اهلینه سلطان امام صادقدی
.
بو خلق عالمه بیر مکتب سعادت آچان
ائدن جهانی گلستان امام صادقدی
.
فدا جلالتینه آسمان عزتده
بسان نیر تابان امام صادقدی
.
دوزن هامی زحماته حقیقت اوستونده
جهاندا رونق قرآن امام صادقدی
.
عبث دگل که شرف تاپدی جعفری مذهب
سبب بو عزته هر آن امام صادقدی
.
قالاردی حکم خدا پردۀ جهالتده
ائدن حقیقتی اعلان امام صادقدی
.
گوزل طریقیله حقی جهانه نشر ایلدی
مدیر مکتب عرفان امام صادقدی
.
بلا دوتاندا کران تا کران بو دنیانی
سپر بلایه ائدن جان امام صادقدی
.
دوشنده شیعه لری مشگله گلنده خطر
ائدن او مشگلی آسان امام صادقدی
.
یتوب ریاسته منصور بی حیا گوردی
امید خلق مسلمان امام صادقدی
.
هراس ائدوب که یتر رخنه ئوز ریاستینه
که خلقه سرور دوران امام صادقدی
.
ایشیقلانور گونی گوندن شعاع علم خدا
بلوردی مظهر یزدان امام صادقدی
.
اودور مصمم اولوب ئولدوره او مولانی
گوروردی خسرو خوبان امام صادقدی
.
او بی حیا نچه دفعه امامی قصد ائلدی
دوزن مصیبته یاران امام صادقدی
.
خلاصه ایلدی پیغمبر اوغلونی مسموم
مصیبتیله پریشان امام صادقدی
.
آناسی فاطمه گلدی فغانه جنتده
گوروب که کشته دونان امام صادقدی
.
پیمبر الدی اله شوریله عمامه سینی
بیوردی جدینه مهمان امام صادقدی
.
گئدن زماندا دا تبلیغ ائدردی عترتینه
دیردی دینینه قربان امام صادقدی
.
اماندی چکمیون ال بو جهاندا تقوادن
که متقی لره عنوان امام صادقدی
.
.
.
امام رحلت ایدوب گلدی شیعه لر داده
پیمبر ئولماقی دوشدی مدینه ده یاده
.
.
.
دیوم نه جرأتیله ای خدا مصیبتینی
یازوم نه حالتیله جابجا مصیبتینی
.
او هانسی گوزدی باخوب بو جفایه آغلامیا
او هانسی خامه دی بیر بیر یازا مصیبتینی
.
بلنمورم نه یازوم قالموشام ئوزوم حیران
دیوم اهانت منصوری یا مصیبتینی
.
اولوب پیمبرین اولادی تک به تک مظلوم
یانار زمانه دئسم ابتدا مصیبتینی
.
پیمبرین ئوزونه ائتمدی وفا امت
هامی بیلور شرف انبیا مصیبتینی
.
بالاسی فاطمه گئتدی شهیده دنیادن
دیولّر ایندیده خیرالنسا مصیبتینی
.
اگر یازام سوزی مطلب داخی چخار یاددان
علی ملالینی یا مجتبی مصیبتینی
.
امام صادق ئوزی گوز یاشی توکر آغلار
دینده اهل وفا کربلا مصیبتینی
.
ائدیم اشاره حسینون مصیبتی چوخدی
ائشیدسین اهل ولا برملا مصیبتینی
.
حسینی عالم رویاده گوردی بیر مومن
مجسم ایلدی بی انتها مصیبتینی
.
یارالی جسمیله گورجک امامی شیون ائدوب
آییلدی صبحه تک ائتدی نوا مصیبتینی
.
.
.
گئنه یوخی آپاروب گوردی شاه غم حشمی
دوباره گوردی او مومن امام محترمی
.
.
.
امام جعفر صادق رئیس مذهب دی
غمینده اشگیله گوز کاسه سی لبالبدی
.
امامی ایلدی مسموم ظلمیله منصور
آناسی فاطمه معناده چوخ معذبدی
.
بیلوردی وارث طاهادی حضرت صادق
امام عصریدی خلقه بسی مقربدی
.
گینه بیله بیله توهیندن گوتورمدی ال
بلنمورم او دنی ده نه دین و مذهبدی
.
شهادته یتوروب عترتی یتیم اولدی
یتیم بلکه هامی صاحبان مکتبدی
.
ائدوبله غسل و کفن عزتیله مولایه
ولی گوزومده مجسم بیر آیری مطلبدی
.
ائدوبله غسل و کفن عزتیله مولایه
ولی گوزومده مجسم بیر آیری مطلبدی
.
حسینه اولمادی غسل و کفن گوزوم آغلا
که آغلیان اونا بزم عزاده زینبدی
.
حسینون آدی اولان مجلسه آناسی گلور
عزاسی هاردا اولا مجلسی مرتبدی
.
#صادقیه_مدح
#صادقیه_شهادت
#رئیس_مذهب_و_ایمان_امام_صادقدی
#علومی_تبریزی
#ترکی
#زبدةالاشعار
نظر دهید