اجازه میدان خواستن جناب قاسم (ع)
.
✍️ #زبدةالاشعار ✍️
.
🆔: @nohe_torki
.
مرحوم شعاع تبریزی
.
رخصت ویر عمو عازم میدان اولا قاسم
شهزاده علی اکبره قر بان اولا قاسم
.
.
دنیادن ایدن گوندن آتام رحلت عمو جان
دوتموشدوم علی اکبریله الفت عمو جان
غمخواریمدی آخر او مه طلعت عمو جان
اونسوز یری وار عمروجه نالان اولا قاسم
.
.
من بیکسه اون اوچ ایلی یولداشیدی اکبر
یولداش دیمه بلکه منه قارداشیدی اکبر
مین مرتبه قارداشدان عمو باشیدی اکبر
مشگل ایله قارداشدان عمو جان اولا قاسم
.
.
پوزقون منی گورسیدی اگر بیر دم عم اوغلوم
دوزمزدی ویرن وقته منه یوز غم عم اوغلوم
بو مدّتی اولموشدی منه همدم عم اوغلوم
اولمازدی رضا زار و پریشان اولا قاسم
.
.
من بیر پری سنمش قوشا مانندم ازلدن
وار دلده یتمیلوق غمی ناشادم ازلدن
چون مهر على اکبره پابندم ازلدن
هجرینده اونون حقلیدی گریان اولا قاسم
.
.
بو یولدا منی شبه پیمبردن آیرما
بیکس آنامی لیلی مضطردن جیرما
گل جدّیوه خاطر منی اکبردن آیرما
قوی اکبریله ملحق جانان اولا قاسم
.
.
ایکاش عمو اکبردن ازل قاسم ئولیدی
لیلایه تاپونجا بو غم ال قاسم ئولیدی
عشقونده ایچوب جام اجل قاسم ئولیدی
نه اینکه قالوب ایمدی پشیمان اولا قاسم
.
.
کام آلماقا چوخ دلخوشام اوخلار قاباقندا
عشقونده پر اوخدان آچام اوخلار قاباقندا
معناده رضادور بابام اوخلار قاباقندا
باشدان باشا شانه کیمی شانشان اولا قاسم
.
.
هیهات عم اوغلوم غمینی باشدان آتام من
اکبر قاننا قانیمی لازیمدی قاتام من
اوز دینیمه قربان کسیلوب کامه چاتام من
ایستر اودی اوز قانینه غلطان اولا قاسم
.
.
مسلم اولانا مرگی سعادتدی حق اوسته
مین دفعه اگر دوغرانا عزّتدی حق اوسته
وقر و شرف و شأن شرافتدی حق اوسته
چون لاله قزل قانیله الوان اولا قاسم
.
.
کفرون علمی هر نقدر تیز یاتا خوشدی
قاسم ئوله دینی ولی رونق تاپا خوشدی
اکبر کیمی زلفی یوزی قانه باتا خوشدی
تا مایۀ رشگی در و مرجان اولا قاسم
.
.
سالما گیجه ویر اذن جهاد اصغره خاطر
قارداشون آنان جدّون آتان حیدره خاطر
قوی همره اولوب اکبریله اکبره خاطر
یورقون یارالی جدّینه مهمان اولا قاسم
.
.
بسکه دیدی شهزاده یانقلی دل او شاهه
آرتردی دیدیقجا سوزونی نسگل او شاهه
گر چه ویروب اذن اولدی ولی مشکل او شاهه
چون بولدی گیدور ذبح لب عطشان اولا قاسم
.
.
مقصوده او ناکام چاتوب خیمیه گلدی
خوش مژده سوزون مادرینه تا دیه گلدی
بیکس آناسین بیرده وداع ایلیه گلدی
تا گوگلون آلوب عازم میدان اولا قاسم
.
.
القصّه وداع ایتدی او گل پیرهن اوغلون
گل تک اؤپوب ایگلردی او وجه الحسن اوغلون
سالدی خانم آخر یولا شیرین سخن اوغلون
گیت سویلدی یارون حق منّان اولا قاسم
.
.
آردنجا ملر قویدی اوغول مادری گیتدی
یاندردی فراق آتشینه دلاری گیتدی
آغلاتدی غمی عترت پیغمبری گیتدی
جبراً هدف ناوک پیکان اولا قاسم
.
.
غم ناقه سینی صبریله پیلردی سریّه
آغلاردی نهان ناله سین ایلردی سریّه
گویا توکوب اشگین بیله سویلردی سریّه
سندن صورا کاش عالمی ویران اولا قاسم
.
.
میدانه گلوب شوقیله اول بختی جوان تک
حمله آپاروب دشمنه بیر شیر ژیان تک
تپراقه توکردی سرو تن برگ خزان تک
قویمازدی رها تیغدن عدوان اولا قاسم
.
.
احسن او رشادت گولونه خار دیردی
حولیله قاچون بیر بیره کفّار دیردی
حیرتده قالوب دشمن خونخوار دیردی
عالم یری وار شَستوه حیران اولا قاسم
.
.
اما او قدر گیچمدی عرض ایتدی او ناکام
الدن دیدی گل داده توان گیتدی او ناکام
مقصوده او شه گلدی گوروب یتدی او ناکام
بو عشقه دیدی عشق فراوان اولا قاسم
.
.
هر چند «شعاع» ایتمدون اظهار مصیبت
اهل دله لازم دگی گفتار مصیبت
قاسم آدی ایلور اوزی تکرار مصیبت
آز غمدی مگر گل کیمی خندان اولا قاسم
.
.
.
.
.
#قاسمیه #شعاع_تبریزی
#قاسمیه_شهادت
#رخصت_ویر_عمو_عازم_میدان_اولا_قاسم
#ترکی
.
✍️ #زبدةالاشعار ✍️
.
🆔: @nohe_torki
نظر دهید