زبدةالاشعار

رقیه ای قوری یرده ئولن بالام لای لای #حضرت_رقیه_کریم_نصیری

زبانحال حضرت زینب (س) در شهادت حضرت رقیه (س)
.
✍️ زبدة الاشعار ✍️
.
?: @nohe_torki
.
کریم نصیری مرندی
.
رقیه ای قوری یرده ئولن بالام لای لای
یانان اوره گینی غملر بؤلن بالام لای لای
.
قابار ایاقلاریوا باغریقان بی بین قربان
بیلکلرین بوغازین ایپ کسن بالام لای لای
.
دیارکرب وبلادن طعامه حسرت اولان
منی قوجالدوب آجیندان ئولن بالام لای لای
.
گولنده شامون اوشاقلاری کهنه کوینگینه
قانادیم آتدا قاچیب گیزلنن بالام لای لای
.
خرابه نون قاپیسیندا باخوب گلوب گیدنه
قولویلا گوز یاشین اوزدن سیلن بالام لای لای
.
گونون باتان چاقی هرگون گوزی قالان قاپیدا
صفالی ائللرینی گوزلوین بالام لای لای
.
علیّ اکبر آدین تپراق اوسته بارماقیلا
یازوب سورا اونی‌تیز تیز اؤپن بالام لای لای
.
علیّ اصغره اوچ شعبه اوخ دگن گوندن
نه شاد اولوب نه ده بیریول گولن بالام لای لای
.
چوخ آرزو ایلدون اکبرین زیارتنی
اورکده حسرتی قبره گیدن بالام لای لای
.
بوغملی هیئته سن نوحه خوانیدون گوزلیم
حجازی لحنیله نوحه دئین بالام لای لای
.
طبقده یاره لی باشی گورنده شوره گلوب
اوپوب اوپوب سورا دیلدن دوشن بالام لای لای
.
آنام کیمی یورولان درد وغصه وغمدن
خدادن اوز ئولومون ایستیین بالام لای لای
.
وقاریله یاشایوب آج یاتوب اوز آجلیقینی
بوشامین اهلینه بولدورموین بالام لای لای
.
سنه باخاندا دؤشردی جوان ننم یادیما
جمالی فاطمیه بذوین بالام لای لای
.
گونوزلری الی قوینوندا بؤینی چگنینده
خرابه ده گوزی یاشلی گزن بالام لای لای
.
اوزونده سیلی یرین ویرموین ربابه نشان
آنام کیمی اؤزونی گزله دن بالام لای لای
.
عباده اکبرینون نعشینی گورن گوندن
اؤلونجه دائمی قاره گئین بالام لای لای
.
کجاوه یولداشیوی دور خرابه دن یولاسال
ایدورسن ایندی بو شامی وطن بالام لای لای
.
بوخردا قبریوه بیر گون گَلوب گیدن چوخ اولار
بوگونه باخما که یوخدور گلن بالام لای لای
.
.
.
بوتوزلی قبریوی بی سایبان قویوب گیدورم
الیم اورکده گوزی یاشلی شامی ترک ایدورم
.
.
.
آدون اولوب دیلمون ازبری بالام لای لای
گوزوم توکور اوزه اشک تری بالام لای لای
.
بهارفصلی سارالدین خزان گورن گل تک
سالوبسان حیرته بلبلری بالام لای لای
.
وطندن آیری دوشن ایللری گوزوندن آتان
سالان فراق اوتونا ایللری بالام لای لای
.
دیلینده اکبر آدی گوزده یاش اؤرکده غمی
ایاق یالین دولانان چوللری بالام لای لای
.
نه چاره اولمادی ممکن خرابه یرده قیزیم
یووام هورم او قرا تللری بالام لای لای
.
گیجه یوخوندا گورنده ورولّا قمچی سنه
آییلجاقین چاغیران اکبری بالام لای لای
.
سن آجلیقون منه بؤلدوردون اوزگیه دیمه دون
حیاده ای ننمون بنذری بالام لای لای
.
قولوندا قمچی یرین ویرمه دون ربابه نشان
گوزتلوین اووفاپروری بالام لای لای
.
اوداغلی قلبیوه بوباغریقان بی بین قربان
شماره گلموین ای غملری بالام لای لای
.
گلایون اولماسا مندن یوخوما گل گیجه لر
اوپوم دویونجا قراگوزلری بالام لای لای
.
بابا بابادئیوب آخرسعادته یتوشن
آلان قوجاقه سراطهری بالام لای لای
.
یارالی باشه دؤشنده گوزی اوزون ایتورن
آلان قرارینی غم لشکری بالام لای لای
.
باخان اوقانلی دوداقلاردا خیزران یرینه
اوپن اوقانه باتان لبلری بالام لای لای
.
قویان دوداقلارینی فاطمه اوپن بوغازا
اوپن اویاره لنن حنجری بالام لای لای
.
منیم دیلیمجه #نصیری یازاندا نوحه سنه
الی بوش ایلمه بونوکری بالام لای لای
.
.
.
.
#حضرت_رقیه_شهادت
#کوچ_شام
#رقیه_ای_قوری_یرده_ئولن_بالام_لایلای
#کریم_نصیری
#ترکی
.
✍️ #زبدةالاشعار ✍️
.
?: @nohe_torki

متن پیشنهادی:  اویان ترک ایله بو گودالی قارداش #کوچ_کربلا #ثابت_اردبیلی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی