در مدح و میلاد امام حسن مجتبی(ع)
#گریز به حضرت زهرا(س)
✍️ زبدة الاشعار ✍️
🆔: @nohe_torki
علیرضا حضرتی(ناعمی)
رمضان ماه عشق و ایماندی
ماه رحمتدی ماه غفراندی
نعمت ذوالجلالی ارزاندی
بنده لر ذات حقّه مهماندی
عید ایمان بهار قرآندی
رمضاندا صفا تاپار جانلار
صاف و یکرنگ اولار مسلمانلار
تاپار انس اللهیله انسانلار
قؤولار کینه توز شیطانلار
ایشی ابلیسون آه و افغاندی
رمضان موسم صلاة و صیام
ماه بیتوته و قعود و قیام
گجه نی تا طلوع فجر سلام
سوره ی قدر اوخی بو آیدا مدام
کی ثوابی هزار چنداندی
لیلة القدری وار و ما أدراک
درک لر قدرین ایلمز اِدراک
بزه نر نوریلن هامی افلاک
خَیر مِن اَلف شَهر دور ای پاک
قدرینی بیل کی شأنی شایاندی
او گجه ذات پاک حیّ قدیر
بیر ائدن روزی سین ائدر تقدیر
ساخلا احیا کی ایلیر تأثیر
سنه تقدیر نیک ائدر تدبیر
کی مدبّر او حیّ دیّاندی
سالینار یرده سفره ی برکات
دولانار سیّئات اولار حسنات
اوخویار شیعه دم به دم صلوات
رمضاندا باغیشلانار اموات
لطف حق بیزلره فراواندی
گل آچاللار بو آی عطوفت لر
چوخالار مهرلر محبت لر
آزالار قهرلر عداوت لر
یوخ اولار کینه لر کدورت لر
بودا لطف خدای منّاندی
رمضان سر به سر سعادتدی
موسم رحمت و عنایتدی
گؤر نجه صاحب شرافتدی
یوخوسی بو آیین عبادتدی
ماه مخصوص رحم رحماندی
ای گناهی اولان اویان یاتما
بو قدَر گرد غفلته باتما
باهالی عمروی اوجوز ساتما
اؤزوی بسدی بسدی آللاتما
فرصتون آزدی، خط‍ّ پایاندی
ای قلم بسدی دای بشارتی یاز
یاعلی دئ سؤزی ولایتی یاز
شیعه نی شاد ائدن عبارتی یاز
موشتولوق وئر بوگون ولادتی یاز
روز شادیّ حیدر الآندی
یتیشیر چونکه نیمه ی رمضان
الذی انزل فیه القرآن
شیعه نون قلبینه دولار هیجان
سسلنر جان حسن زمین و زمان
ذکرلر جان حسن، حسن جاندی
هم نبی هم بوگون ولی سؤونوب
عرشیده نور منجلی سؤونوب
فاطمه شاد اولوب علی سؤونوب
علی عاشق لری بلی سؤونوب
حیدرین منزلی گلستاندی
نور آلوب بو گجه آی اللهدان
رحمت و لطفه یوخ سای اللهدان
شکر ائله نعمتی سای ، اللهدان
آلدی زهرا خانیم پای اللهدان
قلبی خرّم دوداقی خنداندی
نه گوزل ذات ذوالمنن یارادوب
بیر شعاع ایکّی نوریدن یارادوب
باغ زهراده یاسمن یارادوب
خلقت و خُلقینی حسن یارادوب
سائل حُسنی ماه کنعاندی
وارث مصطفی امام حسن
خلف مرتضی امام حسن
دومین پیشوا امام حسن
سسله عشقیله یاامام حسن
نجه گور اهل جود و احساندی
لنگیدور مدحتینده پای کمیت
یازسا وصفینده گر قلم مین بیت
مهرباندی کریم اهل البیت
سنی نومید ایلمز لَو جئت
باخیشی جمله درده درماندی
نه حسن حُسنی حُسن لم یزلی
مرتضائیله فاطمه گوزلی
یوسف اولماز او سرورین مثلی
عشقینه مرحبا دئیوبدی علی
پسر پاک شاه خوباندی
نه حسن گل عذاری مصطفوی
عزّ و شأن و وقاری مرتضوی
سید هاشمی شه علوی
حق بگنمیش اولوبدی مجتبوی
شاه شاهاندی جان جاناندی
نه حسن صاحب کمال و مقام
نوه ی نامدار خیرالانام
شیعیانه اولان ایکیمجی امام
صدقیلن وئر او مقتدایه سلام
کی سریر ولاده سلطاندی
نه حسن؟ عالَمِین، الیندن ئوپر
دل دولی شور و شین الیندن ئوپر
مغرب و مشرقین الیندن ئوپر
بو امامین، حسین الیندن ئوپر
کی امام شه شهیداندی
ای حسینه ارادت عرض ائلین
قوی ائدیم من سنه بو سرّی علن
لانُفَرّق بیلور بو سرّی بیلن
فرقی یوخدی بیزه حسیندی حسن
لؤلؤ اولسا او گر بو مرجاندی
نه حسن مظهر صفات خدا
معنی صبر و عشق و صدق و صفا
صلح سبزی اولوب، ای اهل ولا
پایه ریز قیام کرب و بلا
سازشی انقلابه بنیاندی
نه حسن نور عینی طاهانین
ارشد اوغلی علیّ اعلانین
تکیه گاهی بتول عذرانین
غم شریکی جهاندا زهرانین
اوندا کی قلبی غملره یاندی
عزم ائدنده بتول خیر نسا
دشمن دینیدن قباله آلا
چون اجازه بویوردی شیر خدا
سسلدی دور حسن ایاقه بالا
آنوا یاور اول کی نالاندی
چون خانیم سسلدی حسن بالاسین
دوردی تئز شادمان ائده آناسین
نظره آلدی بیر غریب آتاسین
گؤردی قلبینده حیدرین یاراسین
درک ائدوب شیر حق پریشاندی
دئدی بابا اماندی ایلمه غم
تک دگولسن هله من ئولمه میشم
قویمارام تک گئده بلالی ننم
عوضوندن بو گونده یاری منم
حسنون بیر وفالی اوغلاندی
بیلورم باغلانوبدی قوللارون
یوخ آنامدان سوای هوادارون
دؤنمسون قانه بو دل زارون
بیر حسن بیر حسین هله وارون
ایکی سرباز تحت فرماندی
مسجده الغرض اولوبلا روان
بیر آنا بیر بالا دیلینده فغان
آتا ائوده قالوب ولی نگران
غیرت الله دلیر اصلاندی
مسجده چون خانیم قویوبدی قدم
گؤردی منبرده دی او پیر ستم
قلبینی دولدوروبدی محنت و غم
کی بو منبر نه جای شیطاندی
دیله گلدی او بانوی ذی جاه
باشلادی احتجاجی بسم الله
وحده لا اله الّا الله
حمد مخصوص ذات سبحاندی
ئوز دوتوبدی صورا ابوبکره
قیلدی فرمایش اول ابومکره
اویدوران ای جماعتی مکره
اورگیم گؤر نه نوعی شان شاندی
من گل باغ شاه بطحایم
دهریده یادگار طاهایم
غم دوتوب قلبیمی معزّایم
گؤزیاشیم بو جماله افشاندی
رحلت ائتدی ائلیکی خیرالانام
عوض اولدی طریقه ی اسلام
دین یولون اگدوز ای گروه ظلام
بو مگر راه و رسم قرآندی
حقّین آلدوز ولیّ والانین
نائب خاتم رسولانین
حجة الله علیّ اعلانین
داندی امت امامی ناداندی
ملتین رأیی نی دولاندیردوز
ماجرای غدیری داندیردوز
روز روشن قاپیمی یاندیردوز
یاندی قلبیم سینه م یارالاندی
عرشه رعشه اوگون عدو سالدی
طاقت و تابیمی منیم آلدی
ایاق آلتدا بالالاریم قالدی
قلبیم الآندا غصّه دن قاندی
دئمه دوز بضعة الرسولم من
نور چشم نبی بتولم من
مهر تابان بی افولم من
او کی طاهایه روح و ریحاندی
هر نچسبی بو دینه چسب ائلدوز
باطلی حق یئرینده نصب ائلدوز
حقّ آل عبانی غصب ائلدوز
سؤزلریم با دلیل و برهاندی
قویدوز حیرتده ظلموزه فلکی
نالیه گتدوز حوریلن ملکی
آخر ائتدوز مصادره فدکی
نه دئیوم ظالمانه جریاندی
حسنینیم گورون نه حاله قالوب
فدکین گوللری کیمی سارالوب
آه و افغانلاری گویه اوجالوب
آل اطهاره غملی دوراندی
مکریدن فتنه اهلی دویمازلار
بو نه سؤزدور؟ خلایق اویمازلار
انبیا جمعی ارث قویمازلار
بو سؤزی کیم دیوبدی بهتاندی
گئدون آیات ناب حقّه باخون
صفحات کتاب حقّه باخون
گر سؤزوز وار جواب حقّه باخون
ارث داوود آلان سلیماندی
قول یکتادی سؤزلری آتامون
صِدقه معنادی سؤزلری آتامون
وحی یوحادی سؤزلری آتامون
قول و فعلی جهاندا میزاندی
اهل دین بو سوزی قبول ائلمز
حق یولوندان بابام عدول ائلمز
نفی امر خدا، رسول ائلمز
عبد حق ، خاتم رسولاندی
شرم ائدون ذات پاک یکتادن
ال چکون اهل بیت طاهادن
قورخون الساعه قهر زهرادن
غضبی چونکی نار نیراندی
الغرض حضرت انقلاب ائلدی
قلب خصمی پر اضطراب ائلدی
عصر غاصبلرین مجاب ائلدی
بسکی هم خوی شاه مرداندی
زینبه درس او حضرت اورگتدی
عصمت اللهه همت اورگتدی
عشق و ایثار و غیرت اورگتدی
زینب استادی خیر نسواندی
غیرت فاطمی اولوب اظهار
حقّینه اشقیا ائدوب اقرار
فدکین ملکونه آلوب طومار
ائوه ساری هوسله یوللاندی
قییدن وقتیده او غرق محن
شوقیدن پر آچوردی روح حسن
هی دیوردی آنا آنا احسن
سطوتوندن گوزوم ایشیقلاندی
الحق الحق کی یار حیدرسن
عزت و افتخار حیدرسن
آتش ذوالفقار حیدرسن
سؤزلرون مثل تیغ برّاندی
یئری تا باشوه حسن دولانا
سنه فخر ایلیه آتامدا آنا
قلبوی دؤندروبله گرچه قانا
گنه عزموندن عالم حیراندی
ایکیسی یول گلوردیلر ال اله
تا حریم ولایته گله له
ناگهان توش اولوبلا بیر دغله
کی جفاجوی و نامسلماندی
بیلمورم فاش اولوب نه سؤز خانیما
دئدی آرام گل حسن یانیما
ثانی آدی سالور شرر جانیما
بسکی بو ظالم اهل عدواندی
یول کسوبدی او ظالم جانی
دئدی یافاطمه منم ثانی
ملکوه آلدیقون سند هانی؟
وئر گؤروم بیر دگرلی پیماندی؟
ذیلینی منده وئر ائدیم امضا
اعتباری مؤکّد اولسون تا
باخدی زهرا بویوردی ظالم لا
نیتون ظلم و جور و خسراندی
نقدر ثانی ایلدی اصرار
حضرت فاطمه قیلوب انکار
غیضه گلدی او شوم کینه شعار
شرف و غیرتین بوتون داندی
یورش ائتدی او حضرته ساری
جبریلن تا آلا او طوماری
حسنون گؤرملیدی رفتاری
آناسین تک گوروب هراساندی
اول غریبه حمایت ایلماقا
یدّی یاشدا بالا کچوب قاباقا
ظلمیلن ثانی جسور و دغا
گؤردی بیر ایش اورک الولاندی
مصطفادن اوتانمادی او دنی
ویردی اوّلده قهریلن حسنی
صورا قصد ائتدی شخص فاطمه نی
کوچه ده گؤر نه غملی طوفاندی
ویردی بیر سیلی حضرتین یوزونه
تیره تار اولدی ماسوا گؤزونه
باخ او غوغاده فاطمه سوزونه
دئمه دی وای بابا ئوزوم یاندی
ننون ئولسون چاغوردی وای حسنیم
آرتدی قلبیمده غصه و محنیم
تازه بیر گول بالام ئولوبدی منیم
غم محسنده سینه سوزاندی
چاتدی مقصوده ثانی طاغی
قویمادی کینه سی قالا باقی
ییغدی اول پخش اولونموش اوراقی
پاره ائتدی کی اهل عصیاندی
یئری وار آهی شیعه نون اوجالا
ناله سی عرش و فرشه لرزه سالا
ییخیلوب کوچه ده آنیلا بالا
بو اونا، او بونا نواخواندی
آنا سسلوردی وای بلالی بالام
بالا سسلوردی جان یارالی آنام
کاش بو کوچه ده اولیدی آتام
ثانی بی کسلره رجزخواندی
آنا سسلوردی یوخ داریخما بئله
یوخودی یاخشی کی عم اوغلوم ائله
چوخ چتیندی بو غم او شیر دله
کان غیرتدی مرد میداندی
بالا سسلوردی دور ایاقه آنا
اُفّ اولا فرقه ی نفاقه آنا
نجه تاب ایلیوم بو داغه آنا
چادرون توپراقیلا یکساندی
آنا سسلوردی چوخ فغان ائلمه
دؤز بالا اشکوی روان ائلمه
بو سؤزی ائوده ده بیان ائلمه
آرامیزدا بو سرّ پنهاندی
#حسنیه_میلادیه
#رمضان_ماه_عشق_و_ایماندی
#حسنیه_حضرتی_ناعمی
#ترکی
✍️ #زبدةالاشعار ✍️
🆔: @nohe_torki
نظر دهید