جریان پنج کفن آسمانی
اشاره به رحلت حضرت خدیجه (س)
گریز به شام غریبان
.
.
مرحوم حاج داود بیدق داری
.
.
رهبر دین خدا کون و مکانین شرفی
سینه سی گوهر ایمان و هدایت صدفی
نور رخساری اولان گردش چرخین هدفی
یئر یوزونده یارانوب هر نه ، ثناخواندی اونا
نه فقط یئر گوی اؤزی اصلیده مهماندی اونا
.
.
خلقتین علّتیدور خلقه یوزی مِهرِ عیان
گونی خاموش ائلمز گردش ایامِ زمان
اونی توصیف ائله سین هانسی قلم هانسی بیان
قادر الله اونی تعریف ائلین یئرده مگر
قدرتی واردی که توصیف ائله سین فهم بشر؟
.
.
اوندا کی حق گلی موسایه تبسُّم ائلدی
دیندیروب الله اونی غرق تنعُّم ائلدی
اونا خاطردی که سیناده تکلُّم ائلدی
نفسیندن نه دیوم مین دم عیسایه دگر
گوزینون بیر باخیشی هر ایکی دنیایه دگر
.
.
گلدی پیغمبر رحمت که عدالت یارانا
بشریت اؤزونه شانلی شرافت قازانا
دللرین خسته قوشی دانۀ عشقه دادانا
یئر یوزوندن یغیشا جنگ و جدل صلح اولونا
کج یولا گئتمیه انسان گئده حقّین یولونا
.
.
چوخ تلاش ایلدی تا عالمه حق روشن اولا
شوره زار بشرّیت دولانوب گلشن اولا
بت سینا ظالم ئوله حُسنِ بشر احسن اولا
سالدیلار زحمته امّا اونی اشراف عرب
چوخ مصیباتی تحمّل ائدوب اول پاک نسب
.
.
بیر نمونه یازورام تا بیلینه حدِّ جفا
ایکی ایل هجرته قالمیش دهم ماه خدا
شعب بوطالب اولوب جایگه اشک و عزا
دوشدی بیر حاله خدیجه چاغیروب فاطمه نی
بویوروب آخر عمریمدی حلال ایله منی
.
.
واردی بیر خواهشیم امّا اونی اجرا ائده سن
محضر ختم رسولانه بو ساعت گئده سن
اونا خوش لحنیله بو جمله نی زهرا دیه سن
بودی جمله که عنایت منه جانان ائله سین
کفنیم یوخدی ، عباسین منه احسان ائله سین
.
.
گلدی زهرا گوزی گریان آتانون محضرینه
آنانون مطلبین اظهار ائلیوب رهبرینه
باخدی پیغمبر اونون صورتینه ، گوزلرینه
گوردی زهرا سارالوب گل کیمی سالار زمان
تیتریور پیکری یاپراق کیمی آغلور اوجادان
.
.
اؤزیده آغلادی پیغمبر محبوب خدا
آلدی آغوشه قیزی فاطمه نی قیلدی نوا
جبرئیل نازل اولوب عرض ائدوب ای روح وفا
سنه گوندردی سلامین اؤزی دادار جلیل
بویوروب اولما غمین یوخدی بو ایثاره بدیل
.
.
چون خدیجه منه خاطر ائدوب ایثاری تمام
ثروتین وئردی بوتون ایلدی چوللرده مُقام
عمری پایانه یئتیشدی دهم ماه صیام
منده وئررم عوضین روشن اولا حقدی سوزوم
کفنین یولّیارام گویدن اونون ایندی اؤزوم
.
.
بئش کفن لطف ائلیوب قادر منّان او گئجه
گوندروبدور بیلینه رحمت رحمان او گئجه
بو کفن لر ائلیوب عالمی گریان او گئجه
بیر به بیر عرض ائلیوم کیمدی کفن سهمین آلان
کیمدی تئز دفن اولونان کیمدی ئولوب یئرده قالان
.
.
کفن اوّل اولوب سهم خدیجه او زمان
ایکیمینجی کفنی احمد محموده نشان
اوچومونجی کفن آلدی هامیدان تاب و توان
بیلینوب گل کیمی زهرای جوان تئز سولاجاق
بعدِ پیغمبرِ رحمت او کفن پوش اولاجاق
.
.
دوردومونجی کفنی حیدره گوندردی خدا
بئشیمینجی کفن اولدی حسنون سهمی جدا
بیلینوب یوخدی حسینه کفن ای اهل عزا
کسیلن باشی چیخوب نی ده بدن سیز قالاجاق
سویولوب پیکری ظلمیله کفن سیز قالاجاق
.
.
دولانوب چرخ زمان ماه محرم یتیشوب
سال آتمیش بیر هجرتده شب غم یتیشوب
لشکر کوفیه زر زینبه ماتم یتیشوب
یاری یانمیش چادرین اولدی نگهبانی خانم
دئدی قارداش قالان اطفالیوه قرباندی جانم
.
.
وورولانلار یخیلوب توپراقین اوستونده یاتوب
دئیه سن آیدی یاتانلار بولود آلتیندا قالوب
ایکی بانو اورگین قانینی اشکیله قاتوب
بیری زینبدی بیری نوگل پرپر آناسی
دولانور خیمه دالیندا علی اصغر آناسی
.
.
صود گلوب گاهی دئیور سینه مه آی تشنه بالا
نه روادور آناوین اللری قوینوندا قالا
ایچمییدیم سوئی کاش سالدی منی آیری حالا
بو صودون گلمه گی زینبدن اوتاندیردی منی
اود سوویلان گئچر امّا بو سویاندیردی منی
.
.
گور نه دوندردی فلک بختیمی ای روحِ روان
باشیمین تاجین آلوب گوز یاشیمی ایلدی قان
همسریم ذبح اولونوب اوغلوم اولوب تیره نشان
قولومی بند ائلیوب رشتۀ بیداده علی
بیر یانان خیمه قالوبدور منه دنیاده علی
.
.
#پیامبراسلام
#حضرت_خدیجه
#شام_غریبان
#رهبر_دین_خدا_کون_و_مکانین_شرفی
#بیدقداری
#ترکی
نظر دهید