زبدةالاشعار

زاده ناپاک بوسفیان شقی و فتنه کار #انور_اردبیلی

حالات
#ورود_شام#مجلس_یزید#خرابه_شام
.
✍️ زبدة الاشعار ✍️
.
🆔: @nohe_torki
.
مرحوم انور اردبیلی
.
زاده ناپاک بوسفیان شقی و فتنه کار
عامل قتل و جنایت حاکم بی قید و عار
منشأ شر و فساد صحنه های روزگار
منکر آیات قرآن خصم ختم الانبیاء
دشمن سرسخت و خونخوار علی المرتضی
.
.
مردم دنیائیله دنیا کیمی همرنگیدی
مکریده عمروعاصیدن پرمکر و پرنیرنگیدی
اتقیا سیر و سلوکندن اونون دل تنگیدی
نطفه سی ارذل طلیقیدی نه که آزادیدی
مادر ناپاکی هند آکل الاکبادیدی
.
.
ثانی نون عصرینده اولدی شام شومه حکمران
بال و پر وئردی او کرکس سیرت اهل جهان
کامیاب ایتدی او روبه خصلتی دور زمان
یاره مقصودین آلوب آغوشینه اجلالیله
قصر خضرانی ایدوب احداث بیت المالیله
.
.
قلبدن اوغلی یزیده بسکه خاطرخواهیدی
گرچه رفتار قبیحیندن اونون آگاهیدی
بیر جوان هرزه و لایعقل و گمراهیدی
سعی ایدوردی بیر بیله موجود و پست و ناتوان
کشور پهناور اسلامه اولسون حکمران
.
.
ناز و نعمتله یزید اولدی همیشه کامکار
عمر نحسیندن کچوب تا که ایگرمی بش بهار
قلبینی عشق ارینب ایلدی بی اختیار
زورق جسمی اولوب دریای عشقه ته نشین
پیچ و تابه سالدی اعضاسین بو عشق آتشین
.
.
گوندوزی غم غصّه سیندن ایلدی عزم شکار
هرگیجه ترتیب وئردی مجلس رقص و قمار
صبحه تک جام شرابیله اولوب دمساز و یار
ماه رویان دمشقین درک ایدوبدور وصلتین
مرز بیهوشیده تاپدی زندگینون لذّتین
.
.
اوغلونون گوردی معاویه اولور فسقی علن
عشق آتش زا ائدوب قلبین گرفتار محن
نقش طرح ایتدی خلاص ائتسون اونی اندیشه دن
اعتراض ائتدی حسین هند اوغلونون اقدامینه
قویمادی دوشسون حجاز آهوسی مکرون دامنه
.
.
نقش برآب اولدی یکسر نقشه دربار شام
دائما بو حادثه قیلدی یزیدی تلخکام
نفسی تحریک ایلدی آلسون حسیندن انتقام
سرور آزاده احراری ناکام ایلسون
روزگاری آغلادوب اوزون رام ایلسون
.
.
هجرتون آتمش بیرینده عاشر شهر الحرام
یوم حشر و رستخیز عترت خیرالانام
پاک قانلار کربلا صحراسین ائتدی لعل فام
زینت آغوش پیغمبر فروغ آسمان
جان وئروب جانانینه تاپدی حیات جاویدان
.
.
ماجرای صحنه کشتار دشت نینوا
یا شکست ظاهر پرورده خیر النّسا
ثبت اولوب تاریخده پیروزی بی انتها
رویدادیندن یزید بی حیا مجذوب اولوب
ایله فکر ائتدی حسینِ فاطمه مغلوب اولوب
.
.
ایستدی پاتختنه جبراً پیمبر عترتین
اقتداریندن ایده حالی دمشقین ملتین
دل ملول ایتدی حریم کبریا جمعییتین
یوردی برج ناقه ده برج شرف اولدوزلارین
چکدی بازاره علیَّ المرتضانون قزلارین
.
.
اوّل ماه صفرده کاروان کربلا
موکب حزن آور پژمرده آلعبا
وارد شام اولدی شامی ایلدی ماتم سرا
حس وجدان مردمون تحریک ایدوب افکارینی
قابل لعنت یزیدون بلدیلر رفتارینی
.
.
مهد عشقیکه دمشق آدیله وار آوازه سی
عقلی مات ائتمشدی تزئیناتنون اندازه سی
چوخ بزنمشدی ولی ساعت اولان دروازه سی
مرد و زن صوت دف و طنبوریله دمسازیدی
رقص و آوازون سسی شهره طنین اندازیدی
.
.
کوچه و بازاره نصب اولموشدی زیبا پرده لر
شادکام و خرم خندانیدی افسرده لر
یوز ایگرمی پرچمیله جنگجو سرکرده لر
جنگجویان عراقی پیشواز ائتمشدیلر
خولی و شمر و سنانون دیدنه گئتمشدیلر
.
.
آز قالوردی ظهر اولا دوتدی هوانی گرد و خاک
آسمان شهریده خورشید اولوب اندوهناک
سینه گرد و غباری کاروان ایلوبدی چاک
طبل و شیپورین صداسی شهری سالدی لرزیه
هیبت مخصوصیله لشگر چاتوب دروازیه
.
.
زینبون ناگه عیان اولدی پریشان دسته سی
گلشن حقون بیر عده طایر پربسته سی
افتخار کایناتون آهوان خسته سی
زهره زهرا بتولون صاحب عصمت قزلاری
گویدن اَنمیشدی یره گویا گویون اولدوزلاری
.
.
بیر اوجا نیده سر آزاد مرد روزگار
عشقباز صادق و جان پرور پرودگار
عصرونون یحیاسیدور گویا قزل طشت آختارار
یوز گوزی تپراق محاسن مولری خونباریدور
کاوران عشقه شخصا کاروان سالاریدور
.
.
دشمن شیرخدا بیر شخص ابراهیم نام
دوستدار آل بوسفانیدی فاسق مرام
جنگ خونینی جملدن اولمیشدی تلخکام
آتش بغض و عنادیله قزشدی سینه سی
انتقامه سوق ایدوبدور کینه دیرینه سی
.
.
ناقۀ زین العباده ایلدی نزدیک اوزون
هرزه گؤلرتک آچوبدور آغزینی یومدی گوزین
ریشخندیله تکلم قیلیدی بی معنی سوزون
بیر سوال ایتدی سوالون متنی نامطلوبدور
سؤیله کیم یابن الحسن غالبدی کیم مغلوبدور
.
.
حضرت سجاد همای رحمت و عرش آشیان
قلبنون اعماقنه یوز ویردی بو سوزدن تکان
قیلدی فرمایش دایان ویرسون مؤذنلر اذان
احمد و محمود آدی آفاقه سالسون طنطنه
غالب و مغلوب همین ساعت ثبوت اولسون سنه
.
.
راضیوق روز ازلدن خلقتون تقدیرینه
دلخوشوق دام ولانون ناله شبگیرینه
نه حقارتله باخورسان بوینمون زنجیرینه
رهروان راه حقوک سیز ولی اهل مجاز
سیزده هر قدری ستم وار بیزده وار آغوش باز
.
.
عصر وقتیدی یولون یورقونلاری شوریده حال
قصر خضرایه قولی باغلی تاپوبدور انتقال
مطلبی درک ایت تعمق ایله ای نازک خیال
اهل معناسن تفکر عالمنده ور قدم
نقطه نقطه مجلسین عکسین نشان ویرسون قلم
.
.
وهلۀ اول یزیدون سال نظر دربارینه
قصر خضرانون تماشا قیل در و دیوارینه
داخل قصر اول ورود ایله بیوک تالارینه
مسند و قالیله تالارون کفی الواندور
چلچراغ شعله ور سقفندن آویزاندور
.
.
مختلف شخصیله تالارون دولوب سرتاسری
اجنبی دولتلرون برجسته شخصیتلری
اَلّیدن آرتوق رجال لشگری و کشوری
سرشناسان قبایل سرکشان و باجگیر
بیرنچه نصرانی آگه دل و روشن ضمیر
.
.
صدر تالاره قویوبلار کرسی گوهر نشان
تکیه ایلوبدور او تخته سرخ صورت بیرجوان
آبله آثاری درک ایلر یوزینه هر باخان
قد بلند و جثه نخوت قلب ایوی تاریکدور
غرقۀ غرقاب نخوت قلب ائوی تاریکدور
.
.
سبز رنگ عمامه سی باشدا خلافت مظهری
جامه زربفتله مستور اولوبدور پیکری
کتفده آبی ردا بیلده مرصع خنجری
فاقد وقر و ابهت فکر و عقلی ناتوان
مارتک دوشمش الینده پیچ و تابه خیزران
.
.
پشت تختنده ایکی جانی غلام روسیاه
هر بیری گیمش لباس ابریشم و راه راه
مجلسون اعضاسینه هیبتله ایلولر نگاه
اللرینده قبضه شمشیر جوهردار و تیز
ساکت و صامت دوربلار ایلمولر جست و خیز
.
.
تخته نزدیک اگلشوبدور بیر نچه صاحب کلام
اهل ذوق و شاعران ویژه دربار شام
جمله سینده اخطل میخواره و فاسق مرام
شاعر هزیان سرا و هرزه شهر حلب
همپیالیدی یزیدیله بو عده روز و شب
.
.
اگلشوب بیرعده فکریله بیر عده شادمان
انظباط مجلسی پوزدی هیاهو ناگهان
ضمن تعظیمی یزیدون حاجبی ایتدی بیان
گتدیلر قصره کسلمش باشلاری سر نیزده
دختران مرتضای دل ملول و غمزده
.
.
یوز ویروب قلب یزیده شادی بی انتها
صادر فرمان نامعقول ایدوب اول بیحیا
صحنده قالسون رئوس کشتگان کربلا
سرخوشام آمالیمون پیمانه سین سرشار ایدون
اهلبیتیله حسینی وارد تالار ایدون
.
.
مجلسه قویدی قدم ناگه ایکی خدمتگزار
الده زر سینی گتورمش اولی تصویرکار
دومی الده کسوک باش یوز گوزون دوتمش غبار
زلف نامیزانی تک افکار نامیزان ایدوب
ظلم الی گویا گل آویزی آویزان ایدوب
.
.
حامل سینی قویوبدور سینینی اول یره
دومی اوندا مکان ویردی او رأس اطهره
مجلسه حکم سکوت اولدی بو غملو منظره
لرزیه دوشدی بدنلرده ستون مهره لر
سینه لر گرم آهیله دولدی دوتولدی چهره لر
.
.
وارد اولدی تازه دن بزمه ایکی شمشیردار
زشت رو و سرخ مو نامرد مرد روزگار
عنصر صورت سیاه و ناقواره نابکار
بو ایکی خونخواریله سولمشدی زهرا گللری
شمردور خولی حسینون قان توکن قاتللری
.
.
سینینون صاق و صولوندا دوردولار مسرور حال
صحنه تالاریده خاموشیدی یکسر رجال
گوزلری اما کسوک باشه باخوردی اتصال
تختون اوستنده یزیده ال ویروب شور نشاط
عصر فرعونین جری ایتدی او فرعونی بساط
.
.
گلشن عصر حریفین درک ایدوبدور ریشه کن
باده نوش ایتدی نچه پیمانه اول پیمان شکن
مغزینه تأثیر ایدوب گرم اولدی سرتاسر بدن
دزد ناموس و تجاوزکاریدی اول بیحیا
مصدر اسلامیده اسلامه ووردی پشت پا
.
.
مظهر شهوت اوتوز اوچ سنده فاسق جوان
منعکس اولدی خیالینده اونون کچمش زمان
قلبینه عشق ارینب غفلتا ویردی تکان
سینی زرده رقیبین درک ایدوب آشفته مو
خیزرانیله پریشان زلفین ایتدی زیر و رو
.
.
ای حسین بن علی گوردون نجه تقدیری سن؟
قویمادون تحصیل وصلت ایلیم عشقیمله من
ایلدوم اما سنی عالمده محروم هر ندن
اوغلووی قارداشوی بیربیر الوندن آلمشام
گزدیروی اطفالوی چوللرده جاندان سالمشام
.
.
چاتمادی عالمده اقبالون منیم اقبالیمه
دائما سن رشک آپاردون قصریمه اجلالیمه
اگلشوب دوردون تعرض ایلدون اعمالیمه
حمد اولا معبودیمه اولدی تفاقون زیر و رو
من آپاردوم جاه و عزت سن آپاردون آرزو
.
.
یاوه گولر تک بیر عده یاوه سوز استدی بیان
غیظیله مظلوم امامون لبلرین قیلدی نشان
نحس النده قوزانوب اندی فنر تک خیزران
کامین الدوقجا ایدوردی زمزمه اول زشت خو
آل بو سفیانه توهین ایلین لبلردی بو
.
.
خیزران تعظیم ایدوب اوپدی لب خونباریدن
یارینه سس ویردی یاری مجلس اغیاریدن
یاندیران بیر سس اوجالدی گوشه تالاریدن
ای منا و مکه نون اوغلی عزیزیم جان حسین
سرگذشتون ایلدی یحیالری حیران حسین
.
.
بانوی والامقام و قهرمان کربلا
ساحت ذات خدایه ایلدی اول ثنا
روح پاک جدینی تقدیس ایدوب اوندانصورا
زینت تاریخ اولان نطقون ایدوبدور چوخ متین
صحبت ایلوردی اوزی گویا امیرالمومنین
.
.
ای یزید ای عنصریکه فسقله مشهورسن
جام پیروزی سنی سرمست ایدوب مسرورسن
باد نخوتله دماغون یلنوب مغرورسن
باطل اندیشیله تخت اوستنده ایلورسن گمان
ملک جاویدان تاپوبسان یا حیات جاودان
.
.
غاصب اجدادون کیمی قرآنیله ایتدون نبرد
رهنمایان بشر تاپدی شهادت فرد فرد
سنکیمی خونخواری چوخ گورمش سپهر لاجورد
خشک تشریفاتیله بیهوده اولما کامکار
خوش گونون کوتاه و کمدور قدرتون ناپایدار
.
.
تنگ و تاریک ایتموسن دنیانی آل حیدره
چکموسن افسرده چشم انداز نامحرملره
ظایران ماتمی باغلاندوربسان پرپره
یورقونوق دام اسارتده حقارت بلمروک
بوطه غمده طلای ناب تک اسکلمروک
.
.
آسمان عزتین اولدوزلارین ایتدون فنا
پرپر اولید ظلمیله ریحانه خیرالنساء
کشتگان جنگ بدری سسلوسن ای بیحیا
میر ابرارون گورورسن باشینی بیر پارچا قان
مست و مستانه اوتانمورسان وورورسان خیزران
.
.
منطق زینب یزیدون تیترَدوب تالارینی
انقلابه سوق ایدوبدور مجلسون حضارینی
چوخلاری تقبیح ایدوب اول ظالمون رفتارینی
فکر دریاسینده اولدی آل بوسفیان غریق
مجلسه گلدی همان اثناده ناگه جاثلیق
.
.
یوز دوتوب ایتدی یزید شومه قهریله خطاب
ای دنی فطرت بو نه عیش و شراب؟
سالموسان قتل حسینیله جهانه انقلاب
من کچن شب خوابیده قصرونده طوفان گورمشم
صاحب تورات موسانی پریشان گورمشم
.
.
نور اسلامیله روشن قلبمون کاشانه سی
اولمشام دلدن حسینون عاشق مستانه سی
والهم سرشار اولوبدور عشقمون پیمانه سی
شاهد جانبازیمه مفتون و جانباز عاشقم
مجلس اغیاریده یاره سرافراز عاشقم
.
.
جدّی پیغمبر دوروب الده بهشتی پیرهن
بیر الینده نوریدن بیر تاج وار پرتو فکن
عالم معناده فرمایش ایدور اول مؤتمن
گل یوبانما انتظارم گوزلورم الان سنی
ایتمشم حاضر سنه بو تاج و بو پیراهنی
.
.
مجلس عیش یزید اولدی اوگون غم مجلسی
قوزانوب پرده دالندا هنده نون ناگه سسی
تختدن اندیردی اول صیحه یزید ناکسی
یوز قویوب محرم سرایه غایت تعجیلیله
حال بیهوشیدن آخر هنده نی گتدی دیله
.
.
باخدی نفرتله یزیده ایلدی اشگین روان
بیر سوال ایتدی او بانوی عفیف و نکته دان
حضرت زهرا بهارین سن نیه ایتدون خزان
رحموی وجدانوی نابود ایدوبدور نخوتون
صفر اندر صفرمش مقیاس انسانیّتون
.
.
سنگ دل صیادلر گرچه شکاره آغلاماز
صیدینی آهن قفسده ساخلاسا دل داغلاماز
هر قدر بی عاطفه اولسا قنادین باغلاماز
قلبمی تیر ستم تالاره باخدوقجا دلوب
خوردا قزلاری او حالدا گورمشم رحمیم گلوب
.
.
هنده غش ائتدی دوباره قصر اولوب ماتم سرا
مجلسون حضاری گتدی تک قالوب آل عبا
حکم ایدوب فورا رییس شحنه مهد جفا
اهل بیت مصطفانی گتدیلر ویرانیه
یورقون آهولر یتشدی غصه لی کاشانیه
.
.
ریسمان ظلمدن آزاد اولوب آزاده لر
منزل ظلمتده آرامش تاپوب افتاده لر
اوز قولون بالش ایدوب اوز باشینه شهزاده لر
سقفیسیز یرده قرا تپراقون اوسته یاتدیلار
یاتدیلار اما گویون اولدوزلارین آغلاتدیلار
.
.
گوردی زینب یوخدی امکانی لحاف و بستره
روزگار آئینه نی محتاج ایدوب خاکستره
یوخلیوبدور نازنین قزلار توکوب زلفین یره
تازه گیسولر قرا تپراقه نقش غم سالور
قاره یللر قاره بخت اطفالینه لایلای چالور
.
.
مرغ روحی پر ووروب شمع غمع پروانه تک
یاندی قلبی شعلیه فرمایش ایتدی ای فلک
احترامیله اوپردی آستانمدن ملک
دست یغما گور نجه اجلالیمی ایتدی فنا
بیر چراغیم قالمیوب ویرانده یاندیرماقا
.
.
من عزا طاووسیم چتریمدو قاره معجریم
کوه پیکر محنته تاب ایلیوبدور پیکریم
فتح شامه گلمشم یورقوندی اما لشگریم
واردی برا نطقله آه شررباریم منیم
بو قوجاقیمده یاتان قزدور علمداریم منیم
.
.
«انورا» نظم ایلدون زحمتله بو زیبا سوزی
دوشدون آرامشدن اون بش گون گجیله گوندوزی
گوستروز بزم یزیدون عکسینی نظمین اوزی
اولسا هر بیر نظم شیوا منعکس افکاریده
قابل تحسین اولار بزم اولوالابصاریده
.
.
#ورود_شام
#مجلس_یزید
#خرابه_شام
#زاده_ناپاک_بوسفیان_شقی_و_فتنه_کار
#انور_اردبیلی
#مردان_جاوید_انور
#ترکی
.
✍️ #زبدةالاشعار ✍️
.
🆔: @nohe_torki

متن پیشنهادی:  گل کناره ای آنام یادگاری زینبم #اصغریه_تائب_تبریزی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی