زبدةالاشعار

زاهدون ذوق و صفاسی لطف اذکارینده دی #دیر_راهب_انور_اردبیلی

حالات دیر راهب
#من_حسینم_کیم_منه_ساری_گوتورسه_بیر_قدم
.
.
#سبک
حاج #داود_علیزاده (مجلس کامل)
.
.
.
.
مرحوم انور اردبیلی
.
.
زاهدون ذوق و صفاسی لطف اذکارینده دی
عارفون صبح ولاسی لیلۀ تارینده دی
.
زاهدون فکری عبادتده گوزی جنتده دی
عارفون اندیشه سی مقصودی ئوز یارینده دور
.
آلماز عشق استادی دُرّ پاک نفس زاهدی
عارفون کالای نفسی عشق بازارینده دور
.
هر نه رمز معرفت وار دفتر ایمانیده
عارف حقّون دل بیدار و هوشیارینده دور
.
غل و غش سیز اولسا عرفان جوهر ایمانیدور
نطقۀ عرفان بلی ایمان پرگارینده دور
.
عاشق صادق همیشه سلک عارفدن چخوب
طرز جان بازی بو سلکون مصدر کارینده دور
.
زمرۀ صوفی دگل البته عارفدن مراد
عارف معنا بو سلکون ردّ و انکارینده دور
.
عارف اوّل علیدور مصطفایه پیروی
طرز افعالی رسول الله کردارینده دور
.
شهر دانش ختم مرسلدور على بابها
چشم مولا مصطفانون جام سرشارینده دور
.
شرعه خاطر مرتضانون قانی آخدی مسجده
مسجد کوفه اونون جزو عزادارینده دور
.
ایندیده آشفته محرابی علینی آختارور
قانه باتمش قبله سی سرگشته ایثارینده دور
.
وارث اولدی مکتب مولایه شاه کربلا
گوردیلر دائم حسینی ظلم پیکارینده دور
.
عارف حقه اولوب یتمش بیر عارف همصدا
قدرت وحدت بلی بو شاهون انصارینده دور
.
خونچکان اعضالرین آغوشه آلدی کربلا
باشلاری عیسایه رهبر دشمنون دارینده دور
.
لیلۀ یلدای هجرانه وروبلار پشت و پا
قانلو گوزلر صبح وصلون خوش پدیدارینده دور
.
گورمیوب بو کاروانون مثلینی شامون یولی
چشم ره راحل لرون تصویر رُخسارینده دور
.
قوزانور صحرا توزی هی قانلو لبلردن اوپور
سُرمۀ غم عاشقانون چشم بیدارینده دور
.
نوعروس آغلور قرا یل قاسمون زلفین دارور
چشم مشاط فلک زلف سمن بارینده دور
.
بیر اوجا نی ده حسینون باشی هر باشدان قاباق
یول گیدور قانلو گوزی دلخسته قیزلارینده دور
.
ایلیور رمزی اشاره حق یولوندا حق دیون
کلمۀ اعلای حقون نشئه تکرارینده دور
.
زاد راهوز هر نه اولسا سیز بو یولدا خرج ایدون
درّ عشقوز نابدور قیمت خریدارینده دور
.
خوار اولوبسوز ایتمیون خار مغیلاندان گِله
حاجیان عشقچون لذت یولون خارینده دور
.
سوزشه محتاجیدور پروانه لر شمع آختارور
اهل عشقون سوزشی آه شرربارینده دور
.
خانمانوز غارته گیتدی بیابان گرد اولون
چولده یاتسا عشق اسیری عشق تالارینده دور
.
وورسالار زهرا کیمی اللرده ئولسوز دینمیون
اجر و مزدوز دشمن بی رحمون آزارینده دور
.
سینه سین مسمار در دلدی آنامدا دینمدی
عطر خون باب امیدون تیز مسمارینده دور
.
قونماز هیچ دیواره هیچ ایوانه هیچ بیر گنبده
دائماً مرغ سعادت عشق دیوارینده دور
.
اختیاری خامیه ویرسم اگر مطلب قالار
آیری صحبت عندلیب طبع منقارینده دور
.
کاروان یول گیتدی چاتدی یولدا دیر راهبه
نشر مطلب مقتلون صفحات اخبارینده دور
.
گون باتان چاقی قشون دوشدی کنار دیرده
گیتمه قالما، حکم یولدا کوفه اشرارینده دور
.
وردیلار خیمه او چولده بزم عشرت قوردولار
سفرۀ باده او قومون مست خمّارینده دور
.
قویدیلار صندوقه سلطانون باشین قفل ایتدیلر
بیلمدیلر آی او باشون تحت انوارینده دور
.
دست معنا قفل زندان جفانی سیندیرار
قدرت مطلق شهید عشق دادارینده دور
.
دامن صحرا اولوب آل عبانون منزلی
اَلوِلا اهلی بلانون بند دشوارینده دور
.
بیر بلوک شوریده دل سر در گریبان اگلشوب
گلشنی ویران اولانلار فکر گلزارینده دور
.
.
.
بالش و بستر یوخیدی سر بزانو یاتدیلار
دمبدم یا همو دین لر مثل یاهو یاتدیلار
.
.
.
بلبلان باغ عصمت ویردی شهپر شهپره
بعضیسی قویدی قولی اوسته باشین بعضی یره
.
زلفی آشفته خانم قیزلار وسطده یاتدیلار
دور ایدوب اطرافینی وردی بیوکلر دایره
.
خواب شیرینه گیدوبلر خسته گوزلر یوخلادی
ترپدوبدور تللرین یل پرده چکدی یوزلره
.
سینۀ صاف سماده ماه و انجم تابناک
کهکشانلاردا نمودار اولموش آیری منظره
.
نوعروس لیلى ایتمش نور مه سیمین قبا
نورینی ارزان ایدوب نورافکن خلقت یره
.
سیّدالسّجادیلن زینب ایکی شب زنده دار
یوز دوتوبلار ساحت اعلای حیّ داوره
.
بیر بی بی بیرقارداش اوغلی مکتب توحید آچوب
سجدۀ پرشور ایدہ لّر کردگار اکبره
.
قانلو باش صندوقده فوج قراول دوره ده
بانگ نوشا نوش لشگر قوزانوبدور گوگلره
.
گوردیلر بیر ال ظهور ایتدی دوتوب آهن قلم
راهبون دیوار دیرین اوخشادوبدور دفتره
.
یازدی دیواره اَتَرجوا أمةً قَتَلَت حسین
حالت بهت و تعجب یوز ویروبدور لشکره
.
قاچدی بیر دسته او دست معنوینی دوتماقا
دست حق ال ویرمدى لیکن او قوم خودسره
.
کچدی بیر آز ظاهر اولدی آستین غیبدن
یازدی بیر جمله اشاره ایتدی روز محشره
.
ئولدوروب هرکیم حسینی یوخ شفاعت حشریده
اولماسون امید لطف خاتم پیغمبره
.
سومین دفعه او ال درج ایتدی بیر محکم کلام
منتظر اولسون حسینی ئولدورنلر کیفره
.
دشمن آیات قرآندور حسینون دشمنی
قاتلی قاتلدی هم پیغمبره هم حیدره
.
الغرض فوج قراول یاتدی وحشتلن گیجه
راهبون بختی اویاندی روحی تاپدی سیطره
.
معنوی سسلر ایشتدی دیره سالمش طنطنه
بو گیجه حاشا دیدی راحت گیدم من بستره
.
روزن دیری آچوب اطرافینه قیلدی نگاه
گوردی مأوادور او صندوقی که رأس اطهره
.
مطلع انوار اولوبدور کاسۀ خورشید تک
لمعه لمعه روشنی قالخور سپهر اخضره
.
آسماندان دمبدم فوج ملک ایلور نزول
زایر معنا دولوب اول وادی پهناوره
.
کعبه تک ایلور ملکلر دور صندوقی طواف
هر فرشته شوط ایدن وقته سلام ایلور سره
.
یا حسین یابن رسول الله سلام اولسون سنه
بو گیجه توفیق اولوب شاها یتیشدوک محضره
.
سن او سلطان عظیم الشّان سن روح الامین
شهپری اوسته قوناق گتدی مقام برتره
.
سن همان شه سن بلادن قورتاروبسان فطرسی
سن همان شه سن بابون گویلرده گیتدی منبره
.
سورتوروک باشون اولان صندوقه بو شهپرلری
قصدیمیز حمل تبرکّدور گیدنده گویلره
.
بیز ملک لرده لیاقت یوخ دوداقوندن اوپک
بو ایشی شایسته دور اوغلی ئولن زهرا گوره
.
گوردی بو اوضاعی راهب قلبی اولدی هولناک
صبح وقتی گلدی یوز دوتدی گروه کافره
.
گلدی گفتاره امیر لشگروز کیمدور دیدی
وار سؤالیم ایستورم سرلشگروز پاسخ ویره
.
خولینی ویردی نشان پیر کنشته اشقیا
روبرو اولدی او نامرد و عدالت گستره
.
خولیدن آلدی خبر سویله نه وار بو جعبه ده
نیمه شب قالخوردی نوری گنبد نیلوفره
.
رأس مرد خارجیدور سویلدی صندوقده
نهضت ایتمشدی فنا ایتسون یزیدی یکسره
.
سویلدی آدین بیان ایله دیدی آدی حسین
فاطمه دخت پیمبردور آنا بو سروره
.
فاطمه آدین ایشتدی غیظیله راهب دیدی
وای سیزه پیغمبر اوغلون ساتموسوز سیم و زره
.
سهلیدور قرآن سیزه لعنت اوخور انجیلده
قابل لعنتدی هر کیم خیرینی ساتسا شره
.
.
.
زحمت پیغمبر اسلامه قیمت قویمادوز
صفحۀ تاریخده اعرابه حرمت قویمادوز
.
.
.
ایستورم تاریخده بیر افتخار اولسون منه
سیز حسین باشین ویرون دیریمده یار اولسون منه
.
نصف شبدن چشمۀ اسلامه عطشان اولموشام
جرعه نوشی اولماسام صدقیله عار اولسون منه
.
فاطمه اوغلی گرکدور دیریمه ویرسون صفا
مسلک عرفاندا صاحب اختیار اولسون منه
.
سفرۀ فیضینده فکریم وار اولام من ریزه خوار
ایستورم سفرمده عیسی ریزه خوار اولسون منه
.
ایستورم طوق صلیبی گردنیمدن رد ایدم
گردنیمده طوق اسلام اعتبار اولسون منه
.
ویرمرم خولی دیدی راهب بو باشی من سنه
قورخو رام دشمن یزید فتنه کار اولسون منه
.
پیر روشندل ویروبدور خولیه بیر کیسه پول
پول دیدی گیتسون ولی خوش روزگار اولسون منه
.
آلدی اون مین درهمه قانلو باشین بیر ساعتین
قوی دیدی عمرون خزانی نوبهار اولسون منه
.
یوسف عشقی اوجوز ساتدوز وای اولسون سیزلره
طول عمرومده بو آل ویر یادگار اولسون منه
.
خولی آچدی جعبه نی باشی ویروب نصرانیه
ویر دیدی مهمان شه والا تبار اولسون منه
.
قانلو باشی آلدی دقت ایلدی سیماسینه
دیریده همدم دیدی بو گلعذار اولسون منه
.
چوخ گوزلدور صورتی افسوس کول آثاری وار
لکه قویسام بو گوزل صورتده عار اولسون منه
.
سو دگل لایق گرک مشک و گلابیلن یووام
تا جمال حق نماسی آشکار اولسون منه
.
میزبان اهل دل اولسا دینجلر یورقون قوناق
میهمان دینجلسون اجر بیشمار اولسون منه
.
قانلو باشی شست و شو ایتدی قویوب سجادیه
قیمت عشقیم دیدی خوشدور عیار اولسون منه
.
ای یاراسی مرحمه حسرت قالان منلن دانش
صومعه م قصر بهشت لاله زار اولسون منه
.
بوینوما سالدیم قرا اولدوم عزادارون آقا
زندگی دنیاده سنسیز ناگوار اولسون منه
.
گل دیله دیندیر منی انجیلدنده ال چکوم
عهد ایدوم بوندان صورا قرآن شعار اولسون منه
.
رخصتون اولسا حسینیه دوزلدیم دیریمی
سجده گاهیم خانۀ عشق و نگار اولسون منه
.
گنبد دیره و یا بیر قاره پرچم نصب ایدوم
حشره تک مبهوت چرخ کجمدار اولسون منه
.
خوشدی یازسام شقّۀ پرچمده یا مظلوم حسین
پرچمین گورسون کمک هر رهگذار اولسون منه
.
راضی اولسون باشوی محرابیده دفن ایلیوم
باشوه هر گون دونوم کسب وقار اولسون منه
.
قیلدی فرمایش حسین توحیده اقرار ایله سن
مُسلم اُول جنّتده قصرون همجوار اولسون منه
.
گوزلریم دولمشدی مطبخ ده یودون خاکسترین
حرمت ایتدون قویمادون کولدن فشار اولسون منه
.
اللریم یوخدور سیلردیم گوزده کی گوزیاشوی
دوزمزیدوم من او گوزلر اشکبار اولسون منه
.
من حسینم کیم منه ساری گوتورسه بیر قدم
مین قدم گلّم یقین امیدوار اولسون منه
.
پاک عزاداریم و یا زوّاریم ئولسه قورخماسون
قبرینون اوّل شبنده انتظار اولسون منه
.
باشیمی دفن ایتمه قوی چوللرده سرگردان گزوم
هر باخاندا باشیمه زینب خمار اولسون منه
.
فاطمه اوغلی مگر عیسادی دار اوستن قاچا
شامه جک هرگون گرک تکلیف دار اولسون منه
.
ویرمرم مین بیله دیره خیزرانون خیرینی
بوسه آلماقدا اودا معشوقه یار اولسون منه
.
مانعی یوخدی گوزومدن دیشلریمدن اوپسه ده
مجلس شربون گرک تالاری تار اولسون منه
.
گل نثار ایللَّه سلطانه گلی من نیلورم
طشتده ئوز لبلریم گوهر نثار اولسون منه
.
قانه باتمش لبلریمله دمبدم یا حق دیوم
خالقیم باخسون ئوزی قیمت گذار اولسون منه
.
انتقامیم آلماقا مجلسده دیلّنسون باجیم
منطقی برّانی مثل ذوالفقار اولسون منه
.
«انورم» بیر نوحه نون نظمنده پرشور اولمشام
ارزشی وار دفتریمده شاهکار اولسون منه
.
#دیر_راهب #انور_اردبیلی
#قیام_زینب
#زاهدون_ذوق_و_صفاسی_لطف_اذکارینده_دی
#ترکی
#زبدةالاشعار

متن پیشنهادی:  ای چرخ فلک تازه جگر داغلیاجاقسان #زینبیه_نادری

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی