تشییع جنازه حضرت موسی ابن جعفر (ع)
.
✍️ #زبدةالاشعار ✍️
.
🆔: @nohe_torki
.
مرحوم تائب تبریزی
.
زندان ده جان ویردی جگر گوشه زهرا
فریاد و نوائیله دولوب عالم بالا
.
امر ایلدی هارون ستمکار و بد افعال
نعشین گوتوروب حمل ایده لر دورت نفر حمال
.
.
سویللّه او ظاهر گورونن بیر جریانی
معناده ولی واردی بیوک شرح و بیانی
جدی یغوب اوز باشینه اشراف جنانی
دربار جلالتدن ایدوب کسب اجازه
گلموش ایده اوز أوغلونی تشییع جنازه
.
.
بیر کس که مقامی اولونا سدرۀ لاهوت
فضلیله دولا عالم لاهوتیله ناسوت
تشییع ده اولدی اونا زندان دری تابوت
تابوت نه تابوتیدی کوتاه سیاقی
باشدان باش ایاقدان کنارا دوشدی ایاقی
.
.
بو صحنۀ جانسوزی باخوب گوردی سلیمان
اندی اشاقا غرفه دن احوالی پریشان
آلدى خبر آیا ندی بو امر بو عنوان
بو نعش کیمین نعشی دی چوخ خوار آپارولار
بیر آغلین احوالینه یوخ خوار آپارولار
.
.
مظلومدی چوخ اهل وفا یوخدی یانندا
فاضلدی ندن بس فُضلا یوخدی یانندا
غربتده ویروب جان غُربا یوخدی یانندا
معلوم اولونان قومیله خویش و ائلی یوخدور
ائل سیزدی آدامسیزدی اودور نسکلی چوخدور
.
.
اولسا ئوله نین طایفه سی قلبینی داغلار
بیر بیله زماندا یوزه گوز یاشینی باغلار
تابوت کنارینده دوشر سس چکر آغلار
واضحدی آدامسیزلیقی دل داغلیانی یوخ
قبره گیدوری قلبی سنق آغلیانی یوخ
.
.
بیردن دیدیلر سرور بطحادی بو مظلوم
وار حرمتی ذرّیۀ طاهادی بو مظلوم
فرزند علی سید والادی بو مظلوم
موسی آدی زهرایه جگر پاره سیدور بو
غربتده ویروب جان وطن آواره سیدور بو
.
.
تا اینکه سلیمانی اولار ایتدیله حالی
احضار ایلیوبدور هامی نسوان و رجالی
سویلوب بو غریبین یوخیدی اهل و عیالی
جمعیله گلون آغلیاق ایمدی بوغریبه
شوریله جگر داغلیاق ایمدی بو غریبه
.
.
هر کیمسه غریب ئولسه گوزین باغلین اولماز
دلدن بانوب أحوالینه دل داغلین اولماز
تشییعی غریبانه اولار آغلین اولماز
حرمت ایدون اللهدان اؤتور میر حجازه
عزّتله ایداخ بوشهی تشییع جنازه
.
.
نولدی بو غریب ئولسه ده شخصیتی واردی
حیثیت اسلامدی حیثیتی واردی
زندان دا ئولوب لیک غم غربتی واردی
بیر پیکرۀ دیندی اسلام کتابی
بو سروره وار آغلاماقین چوخلی ثوابی
.
.
تابوتی خانم لار یغشوب آلدی آرایه
گل توکدیله نعش شرف صدق و صفایه
آغلاشدیلا ناله اوجالوب عرش خدایه
سسلردیله زندان ده مظلوم ئولن ایوای
ایوای اولان ظلمیه مسموم ئولن ایوای
.
.
ایکاش که بیر آیری سلیماندا اولیدی
بیر کرب و بلا دشتیته شوریله گلیدی
کیمدور او یارالی یخیلان یرده بولیدی
گلدسته توکیدی بیر او گل پیرهن اوسته
گوزیاشی سپیدی او یارالی بدن اوسته
.
.
گلدی باجیسی گوردی بیابان بلانی
سپدی او بلاخیز چوله اشگ روانی
تاپدی یارالی پیکر شاه شهدانی
نه گوردی ایدوب نیزه قلج پاره سی پنهان
سویلوب یارالی جانوه جانیم اولا قربان
.
.
ای خاک شهادتده دوشن گوهر غلطان
ای قتلگه عشقی صفا خیز گلستان
ای پیکر زیباسی اولان گل کیمی خندان
قانین بزیوب قانلو بیابانی حسینیم
عطرون بوریوب دامن صحرانی حسینیم
.
.
تائب که حسین وای دی اونون ورد زبانی
یاکرب و بلا دلده توکر اشگ روانی
گورموبدی ولی قبر شه کرب و بلانی
بیر وقفه بو تزلیقدا الهی ایله قسمت
بو جمعیله ایتسون او گوزل قبری زیارت
.
.
.
#کاظمیه_تائب_تبریزی
#کاظمیه_شهادت
#زندان_ده_جان_ویردی_جگر_گوشه_زهرا
#ترکی
.
✍️ #زبدةالاشعار ✍️
.
🆔: @nohe_torki
نظر دهید