زبانحال حضرت زینب (س)
.
.
حاج مجید بدایعی (اشکی تبریزی)
.
.
زینبون تسلیم ائدیر غربتده جان قارداش حسین
گوزلریم یولدا قالوب گل هارداسان قارداش حسین
.
.
سن ئولنده من سنی تک قویمادیم گودالیده
شمریله درگیر اولدوم من او قیل و قالیده
گل عوض ایله، منی تک قویما سن بو حالیده
ارتحالیمدور سنه واردور گمان قارداش حسین
.
.
شمر الینده خنجر ایستوردی ائده ایذا سنه
من الین دوتدوم او دمده یالواروردوم دشمنه
غیضیله چکدی الین رحم ائتمدی دشمن منه
کسدی خنجر اللریمدن آخدی قان قارداش حسین
.
.
جان وئرنده سن نجه جسمون یاریدی سربسر
یاره لردن وار منیم جسمیمده ده سن تک اثر
تازیانه یرلریندن باش آچوبدور یاره لر
قان اولور هر دم وجودیمدن روان قارداش حسین
.
.
عالم عشقونده من فکر ائتمه نقصان قویموشام
گونده مین یول ظاهراً جان وئرمیشم جان قویموشام
اولمیوب چارَم یارالی نعشین عریان قویموشام
من اودور شرمنده ام سندن اینان قارداش حسین
.
.
قسمتیم اولدی گئدوب قالدیم وطنده بیر زمان
جدّیمه کرب و بلا اوضاعینی ائتدیم بیان
وار یقینیم نالیه گلدی ائدوب آه و فغان
همصدا اولدی اونیله قدسیان قارداش حسین
.
.
یثربه گئتدیم وطنده اولمادی عمریم تمام
امتحانیم باشه یتدی عالمه وئردیم پیام
ایلدیم تقدیریمی تعقیب قسمت اولدی شام
تازه دن اولدی منه بو یر مکان قارداش حسین
.
.
هر بلایه جانیمی سندن صورا توش ائتمیشم
من ازل صبر و تحمّل جامینی نوش ائتمیشم
بیر گوزل دُردانه بو یرده کفن پوش ائتمیشم
هر گورن قبرین اولار اهل جنان قارداش حسین
.
.
شکر قیلّام شامیده اولدوم یاخین ویرانیه
عطرین آلّام همجوار اولدوم همان دردانیه
شامیده هر کیمسه گلسه بو ایکی غم خانیه
اخذ ائدر فیض زیارت همزمان قارداش حسین
.
.
اربعینونده سنون قبرون زیارت ایلدیم
اولدی بیر یول قسمتیم درک سعادت ایلدیم
چوخ چالشدیم دینه هر یرده حمایت ایلدیم
مقصده یتدیم اجل وئردی امان قارداش حسین
.
.
ای ائدن دنیانی درد و محنتی ماتمسرا
دوندرن کرب وبلا دشتین منایه برملا
«اشکیه» لطف ایله حق پادردینه وئرسون شفا
شامیده گئتسون گینه ائتسون مکان قارداش حسین
.
.
«اشکیه» الهام اولوب شاد اولدی بو الهامیده
چوخ تاپوب فیض زیارت گردش ایّامیده
اؤز وفاتینده بو شعری یازدی وقت شامیده
زینبون تسلیم ائدیر غربتده جان قارداش حسین
.
.
.
#زینبیه_شهادت
#زینبون_تسلیم_ائدیر_غربتده_جان_قارداش_حسین
#اشکی_تبریزی
#ترکی
#زبدةالاشعار
نظر دهید