شجاعت حضرت ابوالفضل العباس علیه السلام
.
✍️ زبدة الاشعار ✍️
.
🆔: @nohe_torki
.
موسی آقایی اردبیلی
.
ساقی عطشان دشت کربلا
کربلا تپراقینه ویردون جلا
.
لافتی الا علی مصداقی سن
باده عرفان ایچوبسن باقی سن
.
عشقوون آوازه سی گویلرده دی
تا قیامت پاک آدون دللرده دی
.
گوز آچان گوندن جهان فانیه
یاور اولدون رهبر فرزانیه
.
وار یری عالم غلام اولسون سنه
ای سوسوز سقا سلام اولسون سنه
.
سن طریق عشقده وارسته سن
مکتب حرییته دلبسته سن
.
کربلا دشتینده غوغا ایلدون
محشر کبرانی برپا ایلدون
.
گوردون ایتمیش گللری پرپر عطش
قتل طفلانه چکوب لشگر عطش
.
تنگه سالمیش عترت اطهاری سو
باد صرصر تک پوزوب گلزاری سو
.
گوردون اصغر چیرپینور گهواره ده
قالمیوبدور تاب اول مهپاره ده
.
گوزلری یاشلی رباب با حیا
اوغلونا ایلور بو وصفیلن دعا
.
روبه قبله ایلیوبدور اصغرین
عرشه ساری قالخیزیبدور اللرین
.
سسلنور الله واریم بیر آرزو
غنچۀ نوباوۀ عشقیمدی بو
.
قورخورام سوز عطش عمرین کسه
کاش بو دشته سرین بیر یل اسه
.
دوزدی اوغلومدور امانتدور منه
چیخسا الان جانی محنتدور منه
.
ذرده عهدی که تعیین ایتموشوک
لوح پیمانی که تزیین ایتموشوک
.
اول مقرر وقته جک ای ذولجلال
اوغلوما لطف ایت اجل ویرسین مجال
.
ایستینده اصغرین سلطان عشق
اولمیوم شرمنده فرمان عشق
.
درد دینه منده قوی درمان ویریم
آلتی آیلیق بیر قوزی قربان ویریم
.
سوز ابلفضل هنر پرورده دی
رشته مطلب او حیدر فرده دی
.
تا ایشیتدی بو یانیقلی سوزلری
اشکیلن دولدی او زیبا گوزلری
.
محضر سلطانه گلدی دلده غم
سسله دی ای پادشاه ذیحشم
.
جانیمه عشقون نفس مثلینده دی
روحیمه جسمیم قفس مثلینده دی
.
گوز تیکوب قارداش سوسوزلار مشکیمه
هی باخور حسرتله قیزلار مشکیمه
.
ای کرامت کانی سلطانیم منیم
تنگه دوشموش سینه ده جانیم منیم
.
شهریاریم تازه بیر جان ویر منه
ایندی اذن عزم میدان ویر منه
.
قلبیمی زهرایه خاطر شاد ایله
بنددن قولاریمی آزاد ایله
.
قوی گیدیم میداندا طوفان ایلییم
آلنیمی اوخلاره قلخان ایلییم
.
سرو مثلی دوغرانیم خولدان کیچیم
یاره دگسین مست اولوم قولدان کیچیم
.
اذن میدان ویردی شه سردارینه
باخدی حسرتلن اوزون قولارینه
.
آلنین اوپدی گیزلدیب احساسینی
سالدی شوکتلن یولا عباسینی
.
نار هجران داغلی قلبین داغلادی
باخدی عباسین دالیجا آغلادی
.
آیریلیب سلطاندان اول غیرت یمی
الده بیر انا فتحنا پرچمی
.
خیبری فتح ایلین مولا کیمی
جوشه گلدی غیرتی دریا کیمی
.
قوندی عنقا مثلی زینین اوستونه
یوز قویوب قوم لعینین اوستونه
.
باشدا جانانیله جان سوداسی وار
الده بیر شمشیر برق آساسی وار
.
تلی اندی شوریلن پور علی
جلوه لندی گوزلره نور علی
.
مرحبا درسین ویرن استادینه
رعشه سالدی لشگرین بنیادینه
.
گوردی هر کیم قامت رعناسینی
قورخی تسخیر ایلدی اجزاسینی
.
صادق عاشق آتشین احساس اولار
حیدرین اوغلی ایله عباس اولار
.
حمد ایدوبدور خالق دادارینه
یوز دوتوبدور کوفه نین اشرارینه
.
من دیدی پاکیزه انفاسم بیلون
مرتضی نین اوغلی عباسم بیلون
.
لشگر صلح و صفا سردارییم
بیر کمکسیز پادشاهین یارییم
.
سجده گاهیم زهریلی تیر آختارور
تشنه حلقیم زخم شمشیر آختارور
.
حمد اولا جانانیمه آزاده ام
دینه جان بذل ایتمگه آماده ام
.
منصب سقا ویریب مولا منه
تشنه قیزلار گوز تیکوب تنها منه
.
گلمیشم بیر مشک سو تحصیل ایدم
عشقیمون پرونده سین تکمیل ایدم
.
یاندی قلبیم خیمه ده عطشانلارا
من سو قولی ویردیم اول جیرانلارا
.
قطعه قطعه قامتیم دوغرانسادا
آتش ظلمه وجودیم یانسادا
.
آند اولا سلطان دینین جانینه
گل کیمی سولموش لب عطشانینه
.
نیزه دن شمشیردن باک ایتمرم
دولماسا مشکیم خیامه گیتمرم
.
حب دنیا سیزلری کور ایلیوب
حاکم منفوره مزدور ایلیوب
.
زیر بار خفت و ذلتده سوز
مست جام جهل سوز غفلتده سوز
.
آللانوبسوز قاسقین فتواسینه
جمع اولوبسوز کربلا صحراسینه
.
واردی چوخ سعیوز سلام اولدورمگه
تشنه دور تیغوز امام اولدورمگه
.
بیر امامی که بلا آماجیدور
پاک آدی دوققوز سمانین تاجیدور
.
لامکانه صورتی آیینه دی
کنز حقه سینه سی گنجینه دی
.
بند قلب حیدر کراردور
نور چشم احمد مختاردور
.
خیمه سین دیر و کنشته ویرمرم
بیر نگاهین یوز بهشته ویرمرم
.
اگمرم باش دینیدن بیگانیه
لعنت اولسون زادۀ مرجانیه
.
نور ایمان قلبین آرام ایلدی
حجت پر بارین اتمام ایلدی
.
ال یتیردی قبضۀ شمشیرینه
سان ویره تا تلین اوسته پیرینه
.
حمله ور اولدی او سایسیز لشگره
صفلری پوزدی داغلتدی یکسره
.
جسملرده استخوانلار موم اولوب
شیر مرد معرکه معلوم اولوب
.
عرصیه توزدان توخوندی پرده لر
قورخیسیندان گیزلنیب سر کرده لر
.
ایلدی بر هم نظام لشگری
خشمه گتدی ابن سعد کافری
.
یوز دوتوب فورا او ملعون مارده
سن دیدی بی مثل سن پیکارده
.
اولدوره بیلسون بو بی پروانی گر
شاد قیلسون آل بو سفیانی گر
.
من سنی ای قهرمان سرفراز
ایلرم دنیا مالیندان بی نیاز
.
تا آلوبدور وعده اول شداددن
گیدی بیر محکم زره فولاددن
.
شوق زر باشدان ایدوب عقلین کنار
کبریلن میدانه اولدی رهسپار
.
اهل ظلم و جورو استبدادیدی
نیزه پرتابینده چوخ استادیدی
.
گلدی عباسیله اولدی روبه رو
سسله دی ای سرو قد ماهرو
.
چوخ سنون تک نامدار اولدورمیشم
پهلوان بی شمار اولدورمیشم
.
یوخ شجاعتده نظیریم هنگده
جان قوتارمازسان الیمدن جنگده
.
دست بیعت ویر یزیده تاپ نجات
بوشلا دامان حسینی کامه چات
.
سوزلری عباسه چوخ گلدی گران
اسدی غیرتدن اولوبدی باغری قان
.
سن دیدی انسانیتدن دورسن
بی ادبسن پستسن مغرورسن
.
گلستان خلقته چون خارسن
نورلن دشمنسن اهل نارسن
.
من حسینین درگهینده نوکرم
بیر توکون کاخ یزیده ویرمرم
.
قلبیده بذر ذلالت اکمرم
دامنیندن جان ویریب ال چکمرم
.
سن هله غفلتده سن شیطان کیمین
عقلدن بیگانه سن حیوان کیمین
.
ماردی سوز تیری بی تاب ایلدی
نیزه سین عباسه پرتاب ایلدی
.
بیر الین قالخیزدی سقا شیر تک
پنجه محکم حلقه زنجیر تک
.
ذکر نام حضرت خلاقیلن
نیزه نی دوتدی ایکی بارماقیلن
.
ویردی یخدی زینیدن اول ناکسی
صید ایدوب سیمرغ گویا کرکسی
.
گود حلقیندن ویروبدور نیزه نی
دوشدی تپراقه ولایت دشمنی
.
مرحبا صوتیله دولدی نه فلک
عرشدن فرشه گلوب فوج ملک
.
دسته دسته آلدیلار اطرافینی
لوح عشقه یازدیلار اوصافینی
.
ایتدیلر تحسین اورکده شورینی
اوپدیلر سر پنجه پر زورینی
.
قابض الارواح ایدوبدور قوللارین
تا آچوب نهر فراتین یوللارین
.
نهری تسخیر ایتدی حسرتلن باخیب
سیل تک رخساره گوز یاشی آخیب
.
سسله دی ای سو شه محشر یانور
خیمه لرده آل پیغمبر یانور
.
گل اوتاندیرما سوسوزلاردان منی
ایلمه شرمنده قیزلاردان منی
.
آخما بو صحرایه یار اول مشکیمه
سالما تاخیره منی دول مشکیمه
.
تا ربابین قلبینی غم بولمسین
آلتی آیلیق طفلی عطشان اولمسین
.
ایستدی بیر جرعه سو نوش ایلسین
آتشی قلبینده خاموش ایلسین
.
ایلدی اووجون لبالب آبیلن
تیتره دی اندامی پیچ وتابیلن
.
ناگهان اوچ یاشدا بیر جیران، ملر
گوز قباقینده اولوبدور جلوه گر
.
گوزلیور جام الده سقانین یولون
بیر نچه عطشان آلوبدور ساغ سولون
.
اوخشادیبدور گوزلری زهره سویی
ایچمیوبدور قیتریب نهره سویی
.
آفرین باج آلدی نفسی بحردن
مشکی دولدوردی چیخیبدور نهردن
.
غم شرر سالمیشدی تار و پودینه
چوخ تلسوردی چاتا مقصودینه
.
خیمه گاهه باشلادی مستانه یول
تز یتیشسین سالدی نخلستانه یول
.
اوردا بیر عده عداوت امتی
زیر پاده قویدیلار حیثییتی
.
یولاری هر سمتیدن سد ایتدیلر
بیر غریبه ظلم بی حد ایتدیلر
.
ناگهان زید ابن ورقای دنی
قلبی پر کینه رذالت معدنی
.
غفلتا اندیردی بیر ضربت او دم
ساغ قولون ایتدی جفاییلن قلم
.
گلۀ روباهه فرصت ویردی ال
رحم سیز اشراره جرأت ویردی ال
.
قلبه غم تیری ساچانلار گلدیلر
گوردیلر قولسوز قاچانلار گلدیلر
.
یاره اوستن شیره یاره ویردیلار
رشته صبر و امیدین قیردیلار
.
تز حکیم ابن طفیل بی حیا
صول قولوندا ایلدی تندن جدا
.
مشکه بیر اوخ دگدی طاقتدن دوشوب
گیتمگه اخیامه رغبتدن دوشوب
.
جاری اولدی مایۀ جان تپراقا
یاره لردن جوشلانوب قان تپراقا
.
حرمله ظلمینده طغیان ایلدی
جنتین اهلین پریشان ایلدی
.
قولسوز اعضاسین گورنده بی سپر
جعبه داندان چکدی بیر تیر سه پر
.
روح قران آغلادی یاللاسف
خسته سردارین گوزون ایتدی هدف
.
سرعت رعدیله زهدن سوزدی اوخ
ساغ گوزون قهریله کوکدن اوزدی اوخ
.
پرده چکدی قان گوزل رخسارینه
عرصه تنگ اولدی حسینین یارینه
.
حالینه خلاقی داور ایلدی
ساغ صولا زین اوسته لنگر ایلدی
.
دوشدی مرکبدن یوزی اوسته یره
گون دوتولدی دگدی عالم بیر بیره
.
اولدوز اولدوز دوغرانیبدی باتدی آی
قاندا غرق اولدی گونی آغلاتدی آی
.
.
#عباسیه_شجاعت #عباسیه_شهادت
#ساقی_عطشان_دشت_کربلا
#ترکی
.
✍️ #زبدةالاشعار ✍️
.
🆔: @nohe_torki
نظر دهید