در مدح حضرت رسول صلی الله علیه و آله و سلم
.
✍️ زبدة الاشعار ✍️
.
🆔: @nohe_torki
.
هدایتی تبریزی
.
سالان تحیّره حسن جمالی مانی نی
قلوب ملکنه عشق عالمی سالان غوغا
.
ووران قدم لرینه بوسه هر قدم ده تراب
قدم لریندن اولان شوره زارلر احیا
.
سالان قدم لرینه فرش پرنیان خورشید
قویان جمالنه حیرتده ماهی ، مه سیما
.
قیام قامتنه سرولر چکن حسرت
وصالین آرزیلیان قلب گنبد مینا
.
ملائکان مقرّب خمار و مست حضور
باشندا هر بیرینین قرب و وصلته سودا
.
مقام قرب ده اوج ایتدی قاب قوسینه
و یا یاخین اولوب اوندان ، تدلّی او ادنا
.
ویرن ملائکه درس ثنا و ذکر حقی
معلّم ازلی احمد و رسول خدا
.
مقام عزّ و شرافت ده ، اشرف مخلوق
کلام وحیله مونس ، انیس ذکر و ثنا
.
کمند زلفو چکن دللری اسارتنه
شراب لعلینه غبطه ایدن می و مینا
.
عجب ده غرق ایلین حشمتی سلیمانی
فلک ده سیر ایلین تند و تیز و برق آسا
.
ملائکان و خدا گوندرر بونا #صلوات
شرفده کیمدی که اولسون بو عزّته دارا
.
شرف بونوندی ، جلالت بونوندی ، فخر بونون
بو دور که عالم امکان اولوب طفیلی بونا
.
اگر کنار ایلیه پرده سین جمالندن
کراتی چولقالیار لمعه لمعه نور و ضیا
.
بودور که فایض اعظم دی اعلم و اعرف
بو دور که صبر و شکیبنده غرق دور دریا
.
بو دور که خلق عظیمین خدا ایدیب تعریف
مقام اعظمنه ماخلق چاتا حاشا
.
بو دور که مأذنه ده سسلنور آدی بش وقت
بونون سلامدی ختم نماز و ذکر و دعا
.
تک اللهین نجه اولموش شهادتی واجب
بونون رسالتی ده واجب اولدی ذکر اولونا
.
تخیّل عالمی ده درک ایدنمیرم اونی من
خیالیم عاجز اولوب اوچماقا اونون یانینا
.
مدیحه کیمدی که یازسین امیر لولاکه
بو اولماسیدی اگر اولمازیدی ملک بقا
.
بونون محبّتی جنّتدی باغ رضوان دی
بودور که بغضی جهنّم دی بئسه المأوا
.
بونون محبّتی اولسا هر هانسی دلده اگر
محالدور یاخین اولسون شرار دوزخ اونا
.
.
#مبعث
#پیامبراسلام_مدح
#سالان_تحیره_حسن_جمالی_مانی_نی
#هدایت_تبریزی
#ترکی
.
✍️ #زبدةالاشعار ✍️
.
🆔: @nohe_torki
