شهادت حضرت علی (ع)
.
✍️ #زبدةالاشعار ✍️
.
🆔: @nohe_torki
.
احسان تبریزی
.
سالوب دیلدن علینی باش یاراسی
ایاقه دورماقا یوخدور قواسی
.
اولوبدی زعفران مثلی جمالی
گلیر آهسته آهسته صداسی
.
طبیبی تاپمادی چاره دیوبدی
وئرون صود اولماسین آیری غذاسی
.
زبس زهریله آلوده یدی شمشیر
دوشوب دیلدن اودور رحمت هماسی
.
گهی هوشه گئدیر مولا یومور گوز
گهی هوشه گلیر حق رهنماسی
.
گئدنده هوشه زینب سینه داغلور
آچاندا گوز داخی گلمیر نواسی
.
ندا ائتدی امام اهل وعیالین
کنارین تئز آلوبدی اقرباسی
.
صولوندا اگلشیب شاه شهیدان
صاغیندا ناله ایلیر مجتباسی
.
کتاب هجری باز ایلیبدی مولا
ائدیبدی دیللری غم آشناسی
.
ملال و غم دوتوبدی کائناتی
یاتیبدی عالمین مشگل گشاسی
.
سوز آچدی آیریلقدان شاه مردان
دئدی بو عالمین یوخدور بقاسی
.
بو دنیا هئچ کسه یار اولمیوبدی
فنادی ذرّه جه یوخدور وفاسی
.
خوشام مندن اَل اوزدی عاقبت بو
چوخ اولموشدی منه ظلم وجفاسی
.
بقایه عازمم ای آل یاسین
ئولوم دور دردیمین تنها دواسی
.
وصیّت ایلورم هر تک تکوزدن
آتازین واردی دیلدن التماسی
.
تکیّه ایلیون دیوار صبره
سیزی حفظ ایلسین صبرین قواسی
.
اولون حامی بویوردی بیر بیریزدن
قویون محکم اولا وحدت بناسی
.
حسن دور وارث علم امامت
بودور مندن صورا حق پیشواسی
.
اطاعت امرینه واجبدی اولسون
بودور مومنلرین دوز رهنماسی
.
وصیت ایلینده شاه محشر
اوجالدی اهلبیتین آه و واسی
.
حسینه گه باخور گه مجتبایه
دیور وار باشوزون چوخلی بلاسی
.
حسن مظلوم اولار دیلده دیوردی
قاباقدا واردی صلحین ماجراسی
.
حسینه باخدوقیجا سینه داغلور
دیور وار محنت کرب وبلاسی
.
مجسّم ایلیوردی قتلگاهی
گوروردی وار حسینون چوخ یاراسی
.
اوخور روضه حسینه دیلده مولا
دیور سالمدی بو جسمین هاراسی
.
حمایت ایلین یوخ زینبیندن
قالوب آواره میداندا بالاسی
.
ابوالفضلین سسی یاندوردی قلبین
اوزاقدا غیرتیندن آغلاماسی
.
چاغوردی گل اوغول ائتمه نوا چوخ
اولا ایثاریوین عالم فداسی
.
کناریمده گل ایله بیر تجلّا
سن ای آل اللهین بدر الدّجاسی
.
گل عباسیم اوپوم بیرده گوزوندن
اوغول سنسن گوزوم نور وضیاسی
.
یادوندا ساخلا وار دی بیر سوزوم سن
عمل ایله گوزلدور محتواسی
.
حسینه چوخ علاقه واردی سنده
حسیندور خلقتین چون دلرباسی
.
اونوندا چوخ سنه وار عشقی دیلده
حسینون عشقینون وار چوخ صفاسی
.
حسیندن اَل گوتورمه جان چخنجان
عزیز ائتدی اونی چونکه خداسی
.
محافظ اول حسینه هم مدافع
قالا ایمنده عشقین مقتداسی
.
قاباقدا واردی عاشورا بلاسی
او گون عالم اولار غم مبتلاسی
.
هامی آیریلسا سن آیریلما اوندان
اگر دگسه سنه مین اوخ یاراسی
.
قوپار کرب وبلا دشتینده طوفان
سولار گلزار ایمانون نماسی
.
سویون اعدا یولون سدّ ایلر اوردا
اولار دشمنلرین بیحد جفاسی
.
سووا سن اَل تاپارسان ایچمه اوندا
بیلینسین غیرتین ارج وبهاسی
.
قوتاردی سوزلرین دیلدن چکیب آه
اوجالدی زینبین صوت بکاسی
.
خداحافظ دئدی ای آل طاها
یوموب گوز زینبین مظلوم آتاسی
.
سونوبدی شمع عمر شاه مردان
اولوب روشن ولی شمع عزاسی
.
وئرنده جان علی ئولدی عدالت
اوجالدی غیرتین عرشه صداسی
.
وئریبدی سس سسه کلثوم وزینب
باتوب یاسه تمام عالم فضاسی
.
ملک لر گویده یئردن آل حیدر
غم آهنگ اولدی عرش وفرش آراسی
.
ائدوردی ناله سکّان سما وات
اثر ایلوردی زینب اوخشاماسی
.
امامه غسل وئردی اهلبیتی
کفن پوش اولدی مظلوملار آقاسی
.
شبانه اولدی زهرا مثلی تشییع
اوجالدی زینبین بیرده نواسی
.
آنام مثلی بابامدا گئتدی قبره
آچیلماز زینبین باشدا ن قراسی
.
ولی وار فرق زهرائیله علیده
قلم قور بوردا بیر ماتم اساسی
.
ائدیب یئدی نفر زهرانی تشییع
یوخیدی بوندان آرتیق آشناسی
.
علی تشییعنه مانع یوخیدی
اونون زهرایه واریدی وفاسی
.
اودور زهرا مثالی قبره گئتدی
جلالیله گئده اولموب رضاسی
.
امان وئرمز سنه گوز یاشی «احسان»
دایان بو محنتین یوخ انتهاسی
.
.
.
#حیدریه_علیرضا_عباسی
#حیدریه_شهادت
#سالوب_دیلدن_علینی_باش_یاراسی
#ترکی
.
✍️ #زبدةالاشعار ✍️
.
🆔: @nohe_torki
نظر دهید