شهادت حضرت امام کاظم (ع)
.
✍️ #زبدةالاشعار ✍️
.
🆔: @nohe_torki
.
مرحوم #انور_اردبیلی
.
سر سخن بو شعریمه بیر اهل معنادن یازوم
عاشق آل عبا فرهاد میرزادن یازوم
شاه زادیدی تشیّع عالمینده پایدار
صاحب شخصیّت ممتازیدی صاحب وقار
دوست دار موسی جعفر امام مقتدا
قلبدن اول حجّت حقه محب و آشنا
بسکه عبد صالحه دلدن ارادتمندیدی
آخر عمری سعید اولدی سعادت مندیدی
باشدا بیر عدّه رجال معنوی اهل ولا
کاظمینه رهسپاریدی او شخص با وفا
محضر مولایه تعجیل ایلییردی گتماقا
آستانندن اوپوب عرض ارادت ائتماقا
قویمادی یتسون اجل کامه او والا گوهری
کاظمینه آز قالوردی ، اولدی یولدا بستری
احتضارینده وصیّت ائتدی اول عالیجناب
اولمادیم منکی دریغا بو سفرده کامیاب
آستان پاکده ابراز خدمت ائتمدیم
شوقیله دلخواهیمون قبرین زیارت ائتمدیم
آب وصلیله گویول پیمانه سین دولدورمادیم
بو گئجه آخر گئجمدور بستریمدن دورمادیم
گر اجل درک ایلسه غسل ائیلیون کفن ائیلیون
آستان پاک مولاده منی دفن ائیلیون
ساخلیون فکروزده اما دفنیمون بیر شرطی وار
اولمیون اجلاله طالب ائتمیون چوخ آه و زار
قائل اولساز سیز منه دفنیمده تشریفات اگر
خوش دییر اولّام خجالت روحیمه غم یوز وئرر
ایسته سیز خشنود اولام جالب اولا بو مرحله
سیز سالون بیر تخته پاره بیرده بیر زنجیر اله
بوینوما زنجیر ذلّت طوق عزّتدور ویرون
سانمیون شهزادیم شأن و مقامیم سیندیرون
حلقه ی زنجیریله یار اولماقیم خوشدور منه
تخته اوسته گتماقیم خوار اولماقیم خوشدور منه
من غلامم خوش دگیر مدفون اولام اجلالیه
چون آقام قبره گئدوبدور دورت نفر حمالیله
خاتمه تاپدی وصیّت شرح ائدیبدور هر سوزون
دیلده یا موسی بن جعفر آغلادی یومدی گوزون
دوتدی اوز زوّارینی باب الحوائج محترم
امر واضحدور کرم اهلی ائدر دائم کرم
خادم دربارینون حضرت گلوب رویاسینه
ملتزم ائتدی اونی اوز امرینون اجراسینه
درک ائدیب یولدا اجل بیر با وفا دلداریمی
صبح اولاندا پیشواز ائله ئولن زواریمی
زندگیده احترام ایلردی آل یاسنه
بیر وصیّت ائلیبدی ، مانع اول اجراسینه
قویما ویرسینلار اونا زنجیر ، ذلّتدن قوتار
تخته پاره ایستیوبدور سن اونا تابوت آپار
بیر نفر شهزادیه اولسا اهانت خوش دگیر
هیچ کیمه مندن صورا ایله حقارت خوش دگیر
دوزموشم هر بیر غمه شیعم گرفتار اولماسین
دوزمرم عالمده زوّاریم گرک خوار اولماسین
سالسا آهن سلسله گوزدن دوشر شه زاده لر
خوش توتار زنجیری محبسده ئولن آزاده لر
گلدی محبس کلمه سی بیر آیری محبسدن یازوم
ظلم هارون دغادن سِند ناکسدن یازوم
سِند ائشیتدی هر دل شب نالهء شبگیریوی
بیر گئجه اول بی مروّت آچمادی زنجیروی
محبس مهلک اثرده گوندوزون اولدی گئجه
تنگ یرده سلسله ، بوینوندا تاب ائتدون نجه؟
تیره شب لر تیره محبسده عبادت ایلدون
گوندوزی گون دوشمیین یرده مناجات ایلدون
عابد صالح سنیدون ، اولدی غملر یولداشون
آخدی زندانه محاسن مولروندن گوز یاشون
اولمادی قاصد گهی باد صبانی بسلدون
گه قیزون معصومه ، گه اوغلون رضانی سسلدون
سلسله بوینوندا جان وئردون او پوزقون حالیله
چیخدی محبسدن جنازن دورت نفر حمّالیله
بلکه باخمیردی سلیمان بن جعفر غرفه دن
خوار اولاردون حتم صورتده او گون دفنونده سن
میّتون حمالیلردن بیر کس اولمازدی آلا
شکری وار بغدادیدن چیخدی سنه بیر آشنا
روز عاشورا مروّتلی بیر انسان اولمادی
کربلا دشتینده غیرتلی مسلمان اولمادی
نینوا اهلیله بغداد اهلینون چوخ فرقی وار
چون او چولده ساربان اولدی سلیمان اولمادی
پر بها خلعتله سن گئتدون مزار پاکیوه
سویدولار جدّون حسینی ، دفنه امکان اولمادی
بولمورم آتلار ایاقیندان دییم یا نَعلدن؟
شمر ظالمده ، نه سعد اوغلوندا وجدان اولمادی
پیرهنسیز پیکری اینجیتدی سُمّ صافّنات
کیم دییر باشسیز بدن خاکیله یکسان اولمادی
جلد سیز قرآن همیشه تز چیخار شیرازه دن
بیر ائله اوراق و بی شیرازه قرآن اولمادی
گوردی مقتلده حسینون جسمینی اهل حرم
باجیسی زینب کیمی هئچ کیم پریشان اولمادی
آغلادان سوزلر سنوندور (انورا) هر بزمیده
شکر ائله هر شاعره بو نعمت ارزان اولمادی
.
.
#کاظمیه_شهادت
#سر_سخن_بو_شعریمه_بیر_اهل_معنادن_یازوم
#انور_اردبیلی
#یادگار_انور
#ترکی
.
✍️ #زبدةالاشعار ✍️
.
🆔: @nohe_torki
نظر دهید