راه شام
.
✍️ زبدة الاشعار ✍️
.
?: @nohe_torki
.
مرحوم ذهنی
.
سعد اوغلونا یتوردوله ای شوم بد شعار
مطلب بودور که چولده قالان بیر یتیمه وار
.
مامور ایدوب بو امریده زجر ستمگری
گیتسون تاپوب گتورسون او رنجور مضطری
.
راوی دیر تانوردوم او بی رحم ظالمی
انصافیدن اوزاقدی بولوردوم عوالمی
.
بولدوم او بی کسی تاپا هر یرده بو لعین
ملحق ایدونجه قافلیه اُلدورر یقین
.
رحمیم اونیله گیتماقا وادار ایدوب منی
تا قویمیام او ظالم وورسون یتیمه نی
.
منده او ظالمیله قییتدوق گلن یولا
بیر آز گیدوب گوروندی اوزاقدان همان بالا
.
قصد ایلیوب گلور یولی امّا شتابی وار
معلوم اولور که قورخوری چوخ اضطرابی وار
.
بیر آز قاچور صاقا صولا رفتاریدن دوشور
بیر آز یرور گینه یورولور بیر آز اگلشور
.
باشه وورور فغانیله زلفون یولا یولا
بیر لحظه دینجلور گینه فوراً دوشور یولا
.
ناگه یاخونلاشاندا باخوب گوردی تا بیزی
رنگی قاچوب، اورک دوگونوب، تیتردی دیزی
.
زجر ایستدی بروزه ویره اوز شقاوتین
من مانع اولدوم ایتمدی ظاهر عداوتین
.
زجرین بولوب خیالین او قیز ایتدی واهمه
گتدی منه پناه، سخلدی رکابیمه
.
ویردیم تسلّی قورخما دیدیم قویمارام وورا
قلبون شرار ظلم و شقاوتله یاندورا
.
غم ایتمه گیتدی قافله چوخ توکمه گوزیاشون
گیتمزله منتظردی سنه یار و یولداشون
.
لنگه ووروبلا قافله نی سربسر تمام
گوزلر سنون یولون باجیلار عمّه لر تمام
.
بوردان ولیک قافلیه چوخ مسافه وار
سنده یورولموسان، گل ایدوم ترکیمه سوار
.
مندن ایشیتدی بو سوزی آرتوردی شیونی
چکدی اوزین کناره او ناموس معدنی
.
ویردی جواب یوخدی شریعتده بو قرار
نامحرمین نجه من اولوم ترکینه سوار
.
سیز آتلاری سورون دوشوم آردوزما من یولا
لابد گرک پیاده گلم یول نه قدر اولا
.
آتلی دیر که زجریلن اولدوق روانه بیز
سوردوقجا آت سوروندی بیزیله او خسته قیز
.
ایتدوق نظاره گوشه ی چشمیله دمبدم
گوردوق که سرعتیله گلور ساخلامور قدم
.
بیر قدر گلدی گلدی اوتوردی او بینوا
گوردوم باخور ایاقلارینا ایلور آه و وا
.
یوز دوتدی گوگلره توکوب اشکین عذارینه
بولدوم شکایت ایلوری پروردگارینه
.
بیر قدر آغلادی آپاروب باشه اللرین
آچدی باشیندان ایتدی ایکی حِصّه معجرین
.
بیر حِصّه باشه باغلادی دنیانی داغلادی
بیر حِصّه سین ایاقینه هولیله باغلادی
.
گوزیاشلی دوردی دوشدی یولا چوخ شتابیله
گلدی بیزی یتوردی ولی اضطرابیله
.
هر بیر قدم ایاق گوتورور ایلور آه و زار
دلدن چکوب بیر آه سالوب عالمه شرار
.
یتدی بو حالیله اسرانون قطارینه
تغییر ویرمدی ابداً اوز وقارینه
.
نه باخدی باجیه نا آنایه نه عمّیّه
تا ایلیوب شکایت اونا درد دل دیه
.
وقرِ تمامیله او گل گلشن شرف
یوز قویدی نیزه لرده کسوک باشلارا طرف
.
گورجاق آتاسینون یارالی باشینی او زار
اگلشدی روبروده دیسون دردین آشکار
.
باخدی بالا آتا باشنا چکدی بیر فغان
آچدی ایاقلارین ادبیله ویروب نشان
.
عرض ایتدی اهل شامین الیندن امان بابا
ازبس پیاده یول گتیروبله برهنه پا
.
گل تک ایاقلاریم نجه گور اولموش آبله
قالموبدی قدرتیم داخی طیّ مراحله
.
ازبس باتوبدی خار مغیلان ایاقیمه
مجروح اولوب، خضاب چکوب قان ایاقیمه
.
من بینوادن عمّه مه دی گوز گوتورمه سین
گوزدن سالوب بو نوعیله چولده ایتورمه سین
.
هرچند دردسر اونا من ویرمیشم مدام
شامه یتورسه زحمتیمی ایلرم تمام
.
چون آلموشام خرابه ی شامین سراغینی
شام و سحر اونون چکرم اشتیاقینی
.
بولّم یتر او یرده منه مژده ی وصال
وورّام قدم او مژده امیدیله اتّصال
.
بو عمر مستعار او یرده تاپار عیار
قیلّام یارالی باشیوه جان نقدینی نثار
.
بسدور یتور بو قصّه نی «ذهنی» نهایته
قوی شام ماجراسینی اوزگه حکایته
.
#راه_شام
#سعد_اوغلونا_یتوردوله_ای_شوم_بد_شعار
#ذهنی_تبریزی
#ترکی
.
✍️ زبدة الاشعار ✍️
.
?: @nohe_torki
نظر دهید