کوچ از قتلگاه و ورود به کوفه
.
✍️ #زبدةالاشعار ✍️
.
🆔: @nohe_torki
.
مرحوم غمناک تبریزی
.
سلیل احمد مختارشاه بی غمخوار
حسین بیکس زاروغریب دارو دیار
.
اوزی اُولوب سنوب اوردوسی لشکری داغولوب
باتوبدی قانه جوانان هاشمی آثار
.
سویولدی اهل حرم یاندی خیمه وخرگاه
داغولدی چوللره اولاد احمد مختار
.
مخدّرات حرم بانوان عزّت وناز
اسیراولوبدی یکسر چو دیلم وتاتار
.
زبسکه باشلارینا ظلمیله دگوب قمچی
که گوزلرینه ایشقلی گونوز اولوب شب تار
.
حرم غزاله لری آهوان وادی غم
جفا وظلمیله شمر الینده اولدی شکار
.
او چولده باغلانوب آهو کیمی بویون بویونا
زنان میرحرم دختران آل نزار
.
ویروبدولر گیجه نی یوز مصیبتیله باشا
یانان چادردا قوری یرده گوزلری خونبار
.
زبس قاچوبلا گونوز آت دوشونده چوللرده
سولوبدی گل کیمی دیلدن دوشوب صغاروکبار
.
آلوبدی جانلارینی خوف مِحنت و وحشت
تمام آج و سوسوزصبحه تک قالوب بیدار
.
نه قورخودان برینون تا یوخی گلوب گوزونه
که الدورور بیزی یا اینکه اَل چکر کفار
.
اونوعیله گیجه نی صبح ایدوبله یوزغمیلن
ویروبدی حکم اودم ابن سعد بد کردار
.
ایدون سوارچکون اهلبیتی شامه طرف
ملول بستۀ قید وطناب هرنه که وار
.
دوزولدی قافله باغلاندی بارمِحنت وغم
قباقدا قافله سالارعابد بیمار
.
سالوب گذرلرین قتلگاهیدن او زمان
توکولدولریره اول بی کسان لاله عذار
.
ویرا ویرا باشه هر کیمسه اوز گولون تاپدی
باسوبدی باغرینا جان تک چولوء لوء شهوار
.
ولیک سیّد سجّاده اولمیوب ممکن
قالوبدی حسرتیله ناقه اوسته اول بیمار
.
باخوب اوحاله چخوب حالدان که آز قالدی
مریض جانینی ایتسون او شاه دینه نثار
.
ایدوب مشاهده اول حالی عمه سی زینب
یاخوندی غصّه دن اُولسون او سیّد ابرار
.
آتاسینون یارالی نعشینه باخارمبهوت
بسان قالب بی روح صورت دیوار
.
باتوبدی حیرته کیم آزقالورچخاجانی
که گوز دَوَرانه دوشوب چو لیل ونهار
.
دیدی بی بون اولا قربان بوقانلی گوزیاشیوا
اماندی صبر ایله رحم ایله جانیوه زنهار
.
بوگون اُلن لریمون یادگاری بیرسنسن
باخوب قالانلارا رحم ایله قالموشوخ بی یار
.
که سن بو نوع ایدن وقته نیلسون زینب
ایداخ گرکدی بوگون سنده منده صبری شعار
.
ویروب تسلی غرض مین دلیله بیماره
مدینه سمتینه یوز دوتدی با دل افکار
.
خطاب ایلدی صَلّی عَلَیک یا جدّا
گل ای حسین غریب و شهیده باب کُبار
.
بو پاره پاره بدن گل سنون حسین دور
که قانینه بویانوب قوملار استه قانی آخار
.
کسوبله باشینی نعشین سویوبلا عریاندی
گیدوبدی غارته شال و عمامه و دستار
.
دونوب او دم یارالی قارداشینا ایتدی خطاب
دور ای اولان غریب اهلبیته امن و حصار
.
الیم اوزولدی اَلوندن اَلیمی یوخدی دوتان
اسیر ایدوب آپارور شامه فرقۀ اشرار
.
سالوبلا نعشوی عریان نه واردی دفن ایدنون
نه بیر گلوب گیدن اولدون عجب غریب مزار
.
غریب جانیوه قربان بو غربت الکده من
سنی قویوب گیدیرم ایندی لابد و ناچار
.
او قدر ویرموری مهلت بو چولده شمر لعین
اُولن لرینی ایده دفن زینب بی یار
.
ایدیم نه چاره بوگون چاره دن الیم اوزولوب
اوزوم اسیر قولوم باغلی دورت طرف اغیار
.
نه قویدولار باجی لار تک جنازن اوسته گلم
یولوب بو زلفی ایدم آه و ناله مادر وار
.
گون ایسّی سینده قوری یرده گل بدنون
ورق ورق داغلوب گل کیمی ایدوبله خار
.
نه سایه بان نه حنوط و نه غسل و نه کافور
کفن اولوب سنه خاشاک و خارو گرد وغبار
.
جفا وظلمیله سندن آیرولوب گیدورم
گوزومده یاش اورگیمده فغان آتشبار
.
اُولوب بوگونلری ایکاش گورمییدی گوزوم
سنی شهید اوزومی دستگیر فرقه نار
.
بویور قباقیمه سالسونلا باری قانلی باشون
منیله همسفر اول ای سُلالَةُ الاخیار
.
گیرنده کوفیه قویما اودم قالوم یالقوز
من بلاکشه تا ایتمسونله چوخ آزار
.
او دمده زینب مظلوم گرم آه و نوا
یتیشدی شمر کج آئین ظالم و غدّار
.
ویروب نهیب چکولسون قطار آل علی
آز آغلاسون بوقدر اوز اوزینه زینب زار
.
ویروبله سس سسه بیردن بسان زنگ درای
ایدوبله خواه و نخواه آل مصطفانی سوار
.
یتیشدی کوفیه تا اینکه کاروان بلا
بساط عیش آچولوب باغلانوب او گون بازار
.
چخوبلا زینبه تا ایتمگه تماشایه
زنان آل زنا و کوفیان بد آثار
.
علی قزی زینبدی بیزلره قوناق گلور
گر ایتمَساخ اونی پیشواز قلبی سنار
.
چخون قباقه قصاص حُنین و بَدری آلون
علی ایوی یخلوب یوخدی حیدر کرار
.
اولوبلا کوفیه وارد او دمده آل الله
سنق کجاوه ده گریان بسان ابر بهار
.
سالوب اشاقه باشین زینب ملک آداب
گوروب که کوفنون اهلی نه شرم ایدولّه نه عار
.
بیری تصدّق اوزیله ویرور اوشاقلارا نان
بیری گولر بیری باشه ویرار بیری آغلار
.
آتاسی شیر خدا تک گلوب اودم غیظه
خطاب ایلدی ای کوفیان کینه شعار
.
حیا ایدون چکولون بیرکناره ساکت اولون
که ای جفاده یهود و مجوسیدن اشرار
.
بیزوخ صرائم عصمت مخدّرات حیا
حمامۀ جبروت معادن الاسرار
.
کنیز دور بیزه عورتلروز غلام اوزوز
تمام بیزلره وار سوز بیرعبد خدمتکار
.
یومون گوزوزی رد اولاخ بو یردن بیز
حیا ایدون بیزه باخماز اولان اولؤالابصار
.
گوزوزدی عین دوّاب جماد دور قلبوز
گونون یوزونی گورنمز بو کوراولان انظار
.
حجاب دور بیزه نور خدای حی قدیم
که حق جمالینه باخماقه کیمده طاقت وار
.
نه آغلاماخدی ونه گولماخ نه باشه ویرماخ
اوتانموسوزاوز ایتدگوزدان ایتموسوزعار
.
مگربوظلم وجفانی بیزه سیز ایتمه موسوز
که شراب غصه دن اولموشخ مست وخمار
.
بو قانلی باشلاری سیز کسموسوز انارکیمی
ویروب جدایه ایدوب سوز جداباشین گلنار
.
یول اوسته ساخلامیون بسدی شامه گیتمه لیوخ
خرابه مسجده چون ایستیوبله بیرمعمار
.
گوروم بو کوفه نی اولسون خراب اهلینده
نه شرم واردور نه عصمت نه قول و نه اقرار
.
دایانما دهنۀ بازار کوفه ده (غمناک)
یول اهلینه قاریشوب دوش یولا سوزون قورتار
.
اوزون کمند اسیران آل حیدره سال
اسیر بند بلایه علیدی سلسله دار
.
.
.
#کوچ_کربلا #غمناک_تبریزی
#کوفه
#سلیل_احمد_مختار_شاه_بی_غمخوار
#ترکی
.
✍️ #زبدةالاشعار ✍️
.
🆔: @nohe_torki
نظر دهید