مناجات
.
.
علومی تبریزی
.
.
سن ای قدرتیله یوخی وار ایدن
بیوک کائناتی پدیدار ایدن
.
یاراتدون گونی گویده آی اولدوزی
یاراتدون یر اوسته گجه گوندوزی
.
همیشه خزانی بهار ایلدون
بوتون چوللری لاله زار ایلدون
.
نظامیله خلق ایلدون داغلاری
آخار چشمه نی باصفا باغلاری
.
عدمدن وجوده گتوردون گلی
اونا باغبان ایلدون بلبلی
.
بیابانی دولدوردی جوش و خروش
دوتوب بیشه و دشتی سانسیز وحوش
.
گتوردون سن ایجاده دریالری
سانا گلمه ین بحر پیمالری
.
غرض پایدار ایلدون خلقتی
که پیوند معلول اولوب علتی
.
یتوردون باشا خلقت عالمی
گتوردون صورا عالمه آدمی
.
عطا ایلدون آدمه عقل و هوش
که محروم اولوب بو عطادن وحوش
.
شرافت ویروبسن بنی آدمه
شریف ائتموسن آدمی عالمه
.
ویروبسن بو موجوده علم یقین
دیوبسن اؤزون احسن الخالقین
.
بو موجوده نطق بیان ویرموسن
کمال محبت نشان ویرموسن
.
بو موجودی بی حد عزیز ائتموسن
سراپا شریف و تمیز ائتموسن
.
بو موجودیده واردی درک شعور
بو موجودیده وار تجلّای نور
.
خلیفه بودور سندن آفاقیده
ملبّسدی تشریف اخلاقیده
.
بو موجودی ایتدون اوزوندن جدا
که شاملدی انّا الیه بونا
.
بو موجود اولماز فنا و زبون
بودور معنی کلمۀ راجعون
.
بونون جسمی حادثدی نفسی قدیم
وار اوندا منظّم جهان عظیم
.
مقامی ملائکدن افضل بودور
اولان جمله خلقتده اکمل بودور
.
بو موجودیده واردی عشق و صفا
بو موجودیده گیزلنبدی وفا
.
گرک درک ایده اوز مقامین بشر
مکان کمالاته ایتسون سفر
.
بو موجودیده ظلمت و نور وار
هامی یاخشی پس بوندا مستور وار
.
اگر تابع نفس سرکش اولا
کماله طرف بو دوشنمز یولا
.
أو نفسین آدی نفس امّاره دور
اولان تابع اول نفسه بیچاره دور
.
او نفسی گرک خوار و مغلوب ایده
حقیقت یولین سرعتیله گیده
.
یاتار نفس لوّامه دن همهمه
الیندن دوتار هر زمان ملحمه
.
گلر مطمئنه کماله یتر
حضور حق ذولجلاله یتر
.
شریعتده سیر طریقت بودی
طریقتده اصل حقیقت بودی
.
شریعت اگر روشن ایتسه یولی
حقیقت یولین اوندا گتماخ اولی
.
بودور مقصدین بیلدیم ای کردگار
کماله یتشسون بشرهر نه وار
.
قوی دور ولی نفس شوم و دنی
نه نوعیله مغلوب ایداخ دشمنی
.
بودور آزمایش بودور امتحان
بو یولدا گرک اولمیاخ ناتوان
.
باخان خواهش نفسنه خوار اولار
جهاندا بلایه گرفتار اولار
.
سن ای مهربان خالق کائنات
بو یولدا ویر اهل ولایه نجات
.
اولار گر چه اهل ولا مبتلا
عیاندور بو سوز البلا للولا
.
بلای ولا تحفۀ یار اولار
بلا نفسدن گلسه دشوار اولار
.
بلای ولا تحفه دور مستقیم
هوا و هوس بیر عذاب الیم
.
بلاسیز تاپلماز بو دنیاده کس
اگر عارف اولسون گر اهل هوس
.
بیر عده که وار ناز و نعمتده دور
حساب و کتابی قیامتده دور
.
.
.
#مناجات #علومی_تبریزی
#سن_ای_قدرتیله_یوخی_وار_ایدن
#ترکی
#زبدةالاشعار
نظر دهید