حالات حضرت امیرالمؤمنین (ع)در حال غسل دادن حضرت زهرا (س)
.
✍️ زبدة الاشعار ✍️
.
🆔: @nohe_torki
.
عُلیَوی
.
سولدی گول الغرض باتوب عرشیده یاسه باغبان
خیبری فتح ائدن شهین قدّینی غم ائدوب کمان
سسلدی ئوز بالالارین سوئلدی اول شه جنان
باد خزانه توش اولان یاسمنی گورنمسوز
وار نه سوزوز دیون داخی فاطمه نی گورنمسوز
.
.
دگدی جناب کوثرین شیشه عمری چون داشا
لازم اولوب ائو اهلینه یاس دوتا ایندی آغلاشا
بیر علی دورت یتیم بالا وئردیله ائوده باش باشا
بعضی دیوردی آی غمی دلدن اوزولمین ننه
بعضی دیوردی یاتما دور آی اوزی گولمین ننه
.
.
گرچه بو درد و حزنیده گویده ملکلر آغلادی
روضه اوخوندی عرشیده ختم پیمبر آغلادی
فکر ائلینده هامیدان چوخ ولی حیدر آغلادی
سوئلدی آی بالالاریم تازه گولیم گئدور منیم
سیز منه تسلیت وئرون آرخام ائلیم گئدور منیم
.
.
حاضر اولوب غرض آقام غسل ائده خسته پیکرین
آچدی باشینان حضرتین اوّل او قاره معجرین
ساق اوزینه نظر سالوب گوردی او سیلینون یرین
سوئلدی یاتما فاطمه ایندی جواب وئر منه
ئولموشیدی مگر علی سیلی ویروبدیلار سنه
.
.
ال آپاروب قولاغینه تا آچا گوشواره سین
ساچلارینی کنار ائدوب گوردی قولاغدا یاره سین
زینبه اوز دوتوب دئدی وئر بو ایشین اشاره سین
عرض ائلیوبدی کوچه ده حادثه نی گورن بیلور
من بابا یاخشی بیلمورم اصل سوزی حسن بیلور
.
.
عرشه شب عروجیده خاتمیلن گدن علی
مرحبی قانه غرق ائدیب خیبری فتح ائدن علی
روح الامینه خالقین آدینی ئورگدن علی
یاره لی پیکره باخور آه چکور قان آغلیور
یوخ داخی آیری چاره سی دیزلرینی قوجاقلیور
.
.
گاه دیوردی چوخ دگوب فاطمه زحمتیم سنه
گاه دیوردی چاتمادی دنیادا خدمتیم سنه
گرچه چوخیدی قلبیده مهر و محبتیم سنه
حیف اولا باغلادی فلک اللریمی جفائیله
گتمه گلیلی مدفنه حیدری گل حلال ائله
.
.
(علیوی) دینمه قوی عدو هرنه دیور دئسون سنه
دیلده حسینچی دور ولی اوخشور عملده دشمنه
ساخلا امید رحمتی سنده معاد و مدفنه
دنیادا شاید اولمیا عزت و شوکتون سنون
دوز دولان آخرت گونی اوج ائده حرمتون سنون
.
.
#فاطمیه_شهادت
#سولدی_گول_الغرض_باتوب_عرشیده_یاسه_باغبان
#علیوی
#ترکی
.
✍️ #زبدةالاشعار ✍️
.
🆔: @nohe_torki
نظر دهید