سینوون یاره سى گلمز سانا کیمسن یارالى

کوچ از قتلگاه
.
✍️ زبدة الاشعار ✍️

?: @nohe_torki
.
مرحوم مضطر اردبیلی
.
سینوون یاره سى گلمز سانا کیمسن یارالى
بویانان باشدان ایاقه قانا کیمسن یارالى
.

قارداشیمسان نیه بس باجووى دیندیرمیوسن
کیم کسوب اللروى هیچ منه بیلدیرمیوسن
میندیرن یوخدى منى ناقیه میندیرمیوسن
چکیلوبسن نیه بیزدن یانا کیمسن یارالى
.

باجى بیچاره گرک دردینى قارداشه دیه
مهربان قارداش اونون دردینه درمان ائلیه
یوزى اوستنده یاتوبسان بله حالیله نیه
گوره زینب اورگى اودلانا کیمسن یارالى
.

یوخسا باشون بله یاتماقده دالدان کسیلوب
بله معلوم اولى باشون سنون عطشان کسیلوب
هانسى میناده سوسوز سن کیمى قربان کسیلوب
چوخ غمون وار بو غمون بیر یانا کیمسن یارالى
.

قورى تپراقلارین اوستونده قالوبدور بدنون
خس و خاشاک بیابان اولوبدور کفنون
نقدر ظلم ائدوب حقونده بو عدوان سنون
بیر نفر حالووه یوخدور یانا کیمسن یارالى
.

سن حسینیم سن اگر تز منه دردون اله فاش
هانى بارماقون او انگشترون آخر هانى باش
کیم گوروبدور ائده لر جسمى بو نوعى متلاش
نیزه و خنجریلن دوغرانا کیمسن یارالى
.

بیرجه دیندیر منى سن باغریمى قان ائتمه دانش
مندن اسراروى هچ وقتده نهان ائتمه دانش
گئدورم گئتمه لیه م چوخ نگران اولما دانش
گئده بلمم نگران بیر یانا کیمسن یارالى
.

قورخوسان نعشوون اوستونده بو خواهر باش آچا
قویمیوبلار قالا بو باجوه معجر باش آچا
قارداشى ئولدى گرک خواهر مضطر باش آچا
باش آچا باجى گرک باش یولا کیمسن یارالى
.

سن حسینیم سن اگر عرض ائلیوم مطلبیمى
روزگار ایلدى تیره او ایشیق کوکبیمى
آلدیلار معجر و گوشواره و چادر شبیمى
دوشموشم گور نجه حالدان حالا کیمسن یارالى
.

اولى چوخ یاندیریجى اودلارین هر یرده کوزى
کوز اودون مثلى دى تحویل آلا هر قلب سوزى
“مضطر” اول سوز بودى اوخشار باجى قارداشى ئوزى
سینوون یاره سى گلمز سانا کیمسن یارالى
.

#سبک_یارالی_جان_یارالی و … (4 سبک )

.

#کوچ_کربلا
#سینوون_یاره_سى_گلمز_سانا_کیمسن_یارالى
#مضطر_اردبیلی
#ترکی
.
✍️ #زبدةالاشعار ✍️

?: @nohe_torki