چیلله گئجه سی
.
✍️ زبدة الاشعار ✍️
.
🆔: @nohe_torki
.
مهدی نجفلو
.
.
شادلیق یارادیبسان بیزه ای جان شب چله
اولموش ائلیمین لبلری خندان شب چله
ائولرده هامی شاد و خرامان شب چله
مهریله بو گون جمله کوسن لر باریشیبدی
بالدیز گلین آرواد کیشی اوغلان قاریشیبدی
.
.
آرواد کیشینی دانلاماز ائوده قوناغ اولسون
وار حرمتی هر ائوده کی آرواد اوشاغ اولسون
پای وئر بیزه شادلیق اؤزون آی چله آغ اولسون
قوی بیر یؤل اقلاً کی گلین قینانا گولسون
قارداش باجی شاد اولسون اورکدن آنا گولسون
.
.
ائللر یغیشیب بیر یئره شادلیق یارانیبدی
مهریله محبّتله اوجاقلار قالانیبدی
غم غصّه کوچوبدور باشیمیزدان جالانیبدی
شاد لیقدی جوانلار داخی اینترنته باخمیر
خاموش ائلیوب گوشینی حتی چته باخمیر
.
.
ائللر یغیشیب کرسی باشیندا گوله جکلر
بیربیرلرینون قدرینی چوخلار بیله جکلر
یوخسولّارینون گؤزیاشین حتی سیله جکلر
چوخلار بو گئجه غصّه دن آزاد اولاجاخدی
گر ال اله وئرسک ائلیمیز شاد اولاجاخدی
.
.
صحبت آچیلبدور دانیشیلاّر بابالاردان
تعریف ائلیوللر او کچن گوللی باهاردان
غصّه آییرانماز بو گئجه یارینی یاردان
قارپیز سوزو ، هیوا سوزو وار نار سوزو واردی
ائولرده دئمه شاختا کولک قار سوزو واردی
.
.
عشق اولسا اگر ائللریمیز شاد اولاجاخدی
همت ائله سک ئولکه میز آباد اولاجاخدی
ائللر هامیسی آغزی دولو داد اولاجاخدی
شادلیق دوغاجاخ وحدتیمیز اولسا وطنده
آباد اولاجاخ همّتیمیز اولسا . وطنده
.
.
مهر اولسا اگر ائوده بیرین شاختا ویرانماز
انصاف اولا هیچ کس بیرینین حاقّینی د انماز
انسان نئجه انسانلارین هیچ دردینه یانماز؟
شاد لیق یارانار ائللر اگر بیر بیره یانسا
ظلم ائیله مز انسانلارا انسانلار اوتانسا
.
.
افسوس الیمیز بیرده کچن گونلره چاتمیر
لای لای دییروک اما اوشاخلار داها یاتمیر
آغ سقلین آغ بیرچگین الان سوزو باتمیر
ائوده آتانی یا انانی دیندیرن اولمور
الدن دوتوب حتی ماشینا میندیرن اولمور
.
.
بیر عده گلایه ائلیولّر بالالاردان
دیدار ائدن اولمور بیبی لردن خالالاردان
باعث بو ایشه چوخدا گؤرور قینانالاردان
هر قینانا دامادین آییرسا آناسیندان
دنیا چیخاجاخدور عوضین قیناناسیندان
.
.
صبر ائیله (#نجفلو) گئنه ده یاز گله جکدی
شاختا گئده جکدور کئفیمیز ساز گله جکدی
چای چشمه دولو اوردکیلن قاز گله جکدی
بیر گون بو گلستانه ده بلبل گله جکدی
شاختا اؤله جک خار یئرینه گل گله جکدی
.
.
#یلدا
#شادلیق_یارادیبسان_بیزه_ای_جان_شب_چله
#مهدی_نجفلو
#ترکی
.
✍️ #زبدةالاشعار✍️
.
🆔: @nohe_torki
نظر دهید