شجاعت شهزاده علی اکبرعلیه السلام
.
✍️ زبدة الاشعار ✍️
?: @nohe_torki
.
محمد علی مصیبی تبریزی
.
شاه عشقین اوغلی شهزاده علی
سرِّ اکبر طلعتیندن منجلی
.
وجهی دور آئینه وجه نگار
محو اولار گیسولرینده لیل تار
.
حُسن رخساری شبیه مصطفی
صورتین مهسا دئسم والله روا
.
اولدی مجنونی ، زلیخا یوسفی
بس کی زیبائیدی لیلا یوسفی
.
دلبر و دلداده سلطان دین
شمس تابان سپهر ِ سوّمین
.
کیمدی اکبر وجهی وجه باقیه
اقتدارین گسترن مین یاغیه
.
کیمدی اکبر صولتین حقدن آلان
یوزدن آرتوخ مُلحِدی آتدان سالان
.
صحنه رزمین گورن حیران اولوب
خنجرین درک ایلین شان شان اولوب
.
کیمدی اکبر جدّینه نور دوعین
صولت و غیرتده تندیس حسین
.
کیم باخوب طاهایه بنزر خدّینه
گوندروب صلوات غرّا جدّینه
.
طُرّۀ گیسوسی آشمیش چیگنینه
زلفینون چینی داراشمیش چیگنینه
.
قامت رعناسی وار،شهلا گوزی
سینۀ دریاسی وار مهسا یوزی
.
حیف اوگوزلرقان اولوب قلبی یانار
سینۀ دریاسی عطشان اوخلانار
.
کربلاده موج ائدوب دریای عشق
تا وئریلدی اکبره فتوای عشق
.
حدّدن آرتوخ دورگوروبدورکوفیان
لیک بی یاوردی شاه انس وجان
.
قویدی توپراقه یوزین اول مه لقا
حرمت سلطان دین اولسون ادا
.
سویلیوب ای چلچراغ ماسوا
وی دلیل خلقت ارض و سما
.
اکبرم سائل یارانمیش کوییوه
وئرمرم عالم لری بیر موییوه
.
عشقیمین منهاجی سن سن یاحسین
باشدا اکبر تاجی سن سن یاحسین
.
اذن وئرتا دشت غمده سان وئروم
محضرینده یابن زهرا جان وئروم
.
من وئروم جان سن سلامت قال شها
ای صفای شش جهات و نه سما
.
سن سلامت قال سفیر لافتیٰ
ای اولان شأن ِ نزول هل اتی
.
سن سلامت قال صفای لولیان
نور وجهین جلوه کروبیان
.
دوغریوب اعضامی صدچاک ائتسه لر
مرکب اوستوندن سالوب خاک ائتسه لر
.
قویمارام بیرکس ائشیتسین نالمی
حق شعاریم تتردندیر عالمی
.
اذن آلوب سلطانیدن کنز وفا
اسمعیل ِ عشق ایستور ذبح اولا
.
بوینونا سالدی کفن ناکام عشق
قامتین تزئین ائدوب احرام عشق
.
چیخمامیش اکبر عقابین زینینه
شه الین قویدی علی نین چیگنینه
.
چکدی آغوشه گل رعناسی نی
باغرینا باسدی او زیبا یاسینی
.
باغلیوبدی باشینه دستارینی
بوسه باران ایلیوب رخسارینی
.
سویلیوب ای زائر مأوای عشق
یوخ سعادت دهریده منهای عشق
.
قلبیم عشقوندن اوغول آکنده دی
عترتین صولت نشانی سنده دی
.
سن قرانلوق چوللرین مهتابی سن
علتی وار ئولماقا بی تابی سن
.
زینت اولموش جنّه الماوا سنه
منتظردور جدّیمیز طاها سنه
.
کوکب لیل فراقیم گئتگیلن
یرمی دورد ایللیق قوناقیم گئتگیلن
.
گئتگیلن قان لجّه سینده بسله جان
سسلسونلر مرحبا لا هوتیان
.
قانلی میدانه ولیکن گئتمه میش
دارفانی نی اوغول ترک ائتمه میش
.
گل وداع ایله حرملردن اوغول
عمّه لر ئوپسون قدملردن اوغول
.
رهرو حق باغلیوب بئل قسمته
وارد اولدی خیمه گاه عصمته
.
حشر اعظم قوزانوب اخیامیده
باغریقان دللر یانوب اخیامیده
.
دوندی قانه اشک ناب دیده لر
باشینه گلدی دولانسون عمه لر
.
چکدی آغوشه سکینه قارداشین
یاغدیریب رخساره غلتان گوزیاشین
.
گه رقیه آغلوری گاهی رباب
سیل ائدور گاهی سریّه اشگ ناب
.
آخرین دم خیمه دن غوغا قوپوب
بانگ واویلا و وا لیلا قوپوب
.
قلب آفاقی علی درده سالوب
صودامر قارداشین آغوشه آلوب
.
تشنه لبلر آغلاشوب بالاتفاق
توش اولوبدوربیربیره بیرجوت دوداق
خیمه لردن چیخدی قصد نصرته
دوندی بیرباخدی پوزولموش عترته
.
سویلیوبدی عازم میدانگهم
شیر حقم خصم مینلر روبهم
.
مکتب و دین رسوله خادمم
جانیمی بذل ائتماقا من عازمم
.
سبط طاهایم واریم عزّ و جلال
ایلیون سبط نبی نی سیز حلال
.
لیلیه پیغام آپارسون بیر نفر(1)
اوغلوا تاپدی گروه کین ظفر
.
اولماسون بیرآن دل افکاروحزین
وئردی چون حکم جهادین شاه دین
.
اورداکی جان ِعلی دن شه گئچر
لیلی مین مجنونیدن بالله گئچر
.
الغرض چیخدی حرمدن دلفکار
ئوزگه بیر شوریله اولدی رهسپار
.
الده شمشیر ولا دیلده نوا؛
البلاءُ لِلْوِلا یا ربّنَا
.
ایستوری جان قوم کافردن آلا
خرمن عُمر عدویه اود سالا
.
تا اولوب قوم نفاقه روبرو
غیظ ائدوبدور لشگره اول ماهرو
.
دفعتا غرّا سسی اوجه گلوب
سوزلری دریا کیمی موجه گلوب
.
من علیّ اکبرم سرباز عشق
شهپریم تقوا ئوزوم شهباز عشق
.
من سلیل مرتضای امجدم
من شبیه مجتبی و احمدم
.
حیدر کرار جّدیم دور بیلون
گردوخاک جهلی فکریزدن سیلون
.
قدسیان آئینه دار قامتیم
عرش وفرشین کنزی اولمازقیمتیم
.
گلمیشم میثاقیمی اعلان ائدم
دین یولوندا جانیمی قربان ائدم
.
کینه دن بغض وحسددن داشمارام
اوخ یاغا باران کیمی من قاشمارام
.
نیتیم دور اعتلای دین حق
حق بیزوخ اولسونلار آگه ماخلق
.
حاضیرم من ای گروه بدصفات
آچمارام بیر کیمسیه راه نجات
.
سروریم عشقیم حسیندور شاهعشق
سیزلره سروردی سگباز دمشق
.
پادشاهیز دائماً مخموریدی
عزّ آل اللهی گورمز کوریدی
.
فاش اولوندی سیزلره عزّت یولی
تیغ جوّالیم آلار صاق و صولی
.
اشگ خوفی گوزلریزدن سیزسیلون
قان قناتی ایلورم جاری بیلون!
.
تا گلوبدور موجه بحر صولتی
قورتاروبدی کوفیانه حجتی
.
بدریده مولا علی هر نیله دی
سبط حیدر کربلاده ایله دی
.
نعره سیندن لرزیه دوشموش سپاه
ضربتیندن کوفیان تاپمور پناه
.
ضرب شمشیری دئنن چون رعدوبرق
هم سالورقول هم آچورباشلاردا فرق
.
غیظین آثاری گوزوندن منجلی
گوئیا پیکار ائدور مولا علی
.
یک تنه ووردی داغیتدی لشگری
ئولدوروبدی یوزدن آرتوق ابتری
.
تشنه لیق امّا اونی بیتاب ائدوب
تشنه لب قصد خیام باب ائدوب
.
سسلنوبدور اکبر گلگون قبا
العطش ؛ ای سینه سی دریا بابا
.
العطش ای ساقی مینای عشق
طورسیناده اولان موسای عشق
.
لبلریم اود دوتدی مرهم وئرگیلن
صاحب دم سن بابا دم وئرگیلن
.
ای سلیل ساقی کوثر بابا
تشنه لیق دان جان وئروراکبر بابا
.
شه ائشیتجاق استعان اکبری
کامینه سالدی زبان اکبری
.
گوردی اکبر، پور کوثر تشنه دی
شاه،اکبردن ده چوخ تر تشنه دی
.
سو آخور کوه و بیابانه عجب
عشق میرآبی قالوبدور تشنه لب
.
سو آخور کربوبلاده چوللره
جرعه سی چاتمور سلیل حیدره
.
الغرض اکبر قییتدی مقتله
قانلی میدانه سالوبدور ولوله
.
قبضۀ صمصامینی آلمیش اله
پهنه میدانه سالدی ولوله
.
برق خاطف تک یاریر اهریمنی
تیغ عریانیله دوغرور دشمنی
.
خلق اولوب صحراده آیری منظره
بیر بیره دگمیش یمین و میسره
.
کوفیان منحلّ اولوللارصف بصف
مرحبا ای سبط سلطان نجف
.
کوفیان راه نفوذی آچدیلار
بیربه بیرقان ورطه سیندن قاچدیلار
.
کشته دن پشته دوزتدی شیر حق
ذبح ائدوب بس باشلاری شمشیرحق
.
واصل ائتدی دوزخه هشتادینی
روبرو ناگه گوروب جلادینی
.
مرّة ِ بن مُنقذ عبدی گلوب
ووردی بیرضربت کی اکبردینجلوب
.
مرتضی تک فرق راسی چاک اولوب
مرکب اوستوندن دوشوبدورخاک اولوب
.
دوشدی آتدان قامت سرو ِسَهی
خاتم پیغمبرانین اشبهی
.
دوشدی آتدان قلزُم ِ میدان عشق
آز قالور اولسون علی قربان عشق
.
کوفیان دور ائتدی قانلی پیکرین
آز قالور صولسون وجودی اکبرین
.
یاره دن یانمیش نگاهی قان اولوب
توپراق اوسته سجده گاهی قان اولوب
.
سویلور هردم اولدوزیدیم آخمیشام
یاندیریب قلب جهانی یاخمیشام
.
سسلیون گلسین امام عالمین
سویلیون جان اوسته دی اوغلون؛حسین
.
اوخ دگوب ازبس بابا چخمورنفس
یاسیوین دورین آلوبدورخار وخس
.
ائتممیشدن قصدیمی دست اجل
باشیم اوسته گل حبیب لم یزل
.
جان بابا یتمیش سنه چوخ محنتیم
ایستورم اولسون بو آخیر زحمتیم
.
ئولدوروللر اوغلووی اقوام کین
گل منی تک گورمه سین قوم لعین
.
جان چیخور فرط جراحتدن بابا
گونده ال چکمور حرارتدن بابا
.
گل باباعطشان دوداقلار توش اولا
بلکه گون گلماقیوا خاموش اولا
.
گل کی غم سندیردی عشقین شهپرین
گلمسن جاندان ال ئوزمز اکبرین
.
گل گلن یوللاره قربانم بابا
قوملار اوسته قانه غلطانم بابا
.
تا اوجالدی قافیدن عنقا سسی
شه بیلوب آتدان دوشوب شهزاده سی
.
ذوالجناحه میندی فوراً هی له دی
اول مسیر قهقرانی طی له دی
.
چاتدی بالین علیِّ اکبره
باخدی بیر قانه بلشمیش پیکره
.
باشینی آلدی دیز اوسته شاه دین
سویلیوب ای عندلیب مه جبین
.
ای فروغ عرش اعظم اکبریم
آچ گوزون قدّیم اولور خم اکبریم
.
ای قتیل اوّل اهل ولا
سنله فخر ایلر زمین کربلا
.
کوفیان تیر جفانی سیخدیلار
سن ییخیلمازدین نه نوعی ییخدیلار
.
باشیوی ضرب جفادن سوکدیلر
قدّیمی تیر غمیلن بوکدیلر
.
باتدی قانه عاقبت شهلا گوزون
لیل تار ائتدون حسینون گوندوزون
.
اود وروب یاندیردی دشمن گلشنی
ایلیوب محروم وصلیندن منی
.
گون حرارتدن یاراوی داغلادیر
یاره وین قانی باباوی آغلادیر
.
باشیوین فرقی آتام تک یاره دور
نازنین نعشون سنون صدپاره دور
.
درده دگمز غنچه ریمندن صورا
نیلورم دنیانی من سندن صورا
.
عازم اول جنات الاعلایه علی
چوخ باباندان ناگران قالما ولی
.
قاسم و عباس نام آور قالور
زینبیم وار صودامر اصغر قالور
.
انتظاریندور سکینه خیمه ده
یالوارور حیّ مُعینه خیمه ده
.
سسلنور؛ آلله نگاریم گلمه دی
رزمگه دن غمگساریم گلمه دی
.
آفتاب لایزالیم هاردادی
قامتی رعنا غزالیم هاردادی
.
ایندی من تسخیر غمده نیلیوم
خیمیه نعشون نجور حمل ایلیوم
.
گوزدن اشک غم گرک دشته توکم
دوغرانان نعشی عبایه من بوکم
.
هم عبادور هم سنه اولموش کفن
هم سنی حمل ایلیم اخیامه من
.
هم باجون گورجاق اونی درده چکوم
هم یارالی سینه وه پرده چکوم
.
پیکرینده واردی اوخلاردان نشان
جسمیوه عدوان ووروب تیغ وسنان
.
بس دوشوبدور اوخ یئری پیراهنه
یوخدی بیریئربوسه گاه اولسون منه
.
دوغرانوبسان قانلی ماواده اوغول
منده دوغرانّام بو صحراده اوغول
.
قانیمیز آباد ائدر دشت غمی
تا ابد یاتماز ولایت پرچمی
.
ای «مصیب» گون بئله گئچمز دونر
عمریوین شمعی یاخون یا گئژ سونر
.
گرچه توشه ن یوخدی حشر اعظمه
چوخ گوناهون وار ولی خوف ایلمه
.
وارداولجاق عرصه گاه محشره
یازدیقون شعریله یالوار اکبره
.
نیّتون پاک اولسا رد اولمازسوزون
روضه رضوانیده قالماز گوزون
.
جدّی پیغمبر شفاعت ایلیر
خُلد جاویدانه دعوت ایلیر
ــــــــــــــــــ
(1) برحسب کتابت اکثر مقاتل معتبر شیعه اثنی عشره جناب امّ لیلا درواقعه کربلای معلا حضور نداشته اند؛
.
#اکبریه_شجاعت
#شاه_عشقین_اوغلی_شهزاده_علی
#مصیبی_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید