شجاعت و شهادت حضرت علی اکبر علیه السلام
.
✍️ زبدة الاشعار ✍️
?: @nohe_torki
.
مرحوم کلامی تبریزی
.
شبیه مصطفی آمادۀ جنگ اولدی نام آلسون
طریق سعی و همتده نشان اهتمام آلسون
.
بلا پیمانه سین قالو بلاده ایچدی مست اولدی
او بیر پیمانه دن پابند پیمان الست اولدی
خمار نشئۀ صهبای وحدت می پرست اولدی
تیز ایستر محضر پیره یتیشسون بیرده جام آلسون
.
گلوب دوردی مقابل لشکره یوز دوتدی غفاره
گرک سودا ایدن کالانی گوسترسون خریداره
حیاتیندن چکوب ال جان مطاعین گتدی بازاره
شریک عشقه لازمدور که جان ویرسون سهام آلسون
.
جهاده آلمیشام رخصت بودور برنامۀ کاریم
ورق صحرا مرکب قان قلم تیغ شرر باریم
یازام تاریخیده تا ثبت اولا معنای گفتاریم
مجاهد لفظینین تفسیری قان ویرسون مرام آلسون
.
ال آتدی قبضۀ شمشیره دوشدی لشکره وحشت
دیوب الله اکبر مصطفی سیما علی صولت
سماواته دوشوب سس شیر یزدان ایلیوب رجعت
تماشا ایلیون ایستر اله حیدر حسام آلسون
.
آچوب شهباز تک بال و پر اگلشدی عقاب استه
توکوب اعدای دینی بوتراب اوغلی تراب استه
عمومین قولارین سالدوز نیه بیر مشک آب اوسته
گرک بو قانی سیزلردن امام اوغلی امام آلسون
.
قلج جولان ایدوب بازوی حیدرده دیوب قان قان
ایچیردیب زمره خونخواره قان شمشیر خون افشان
دوشوب سعد اوغلی تشویشه ویروبدور لشکره فرمان
گرکدور هاله تک مه دوره سین قوم ظلام آلسون
.
امیرین امرینی افراد بُلدی لازم الاجرا
احاطه ایلیوب افواج ظلمت نوری سر تا پا
بونی ناموس خلقت چشم دنیا گورمیوب اصلا
گونوز خورشید رخشان دوره سین احشام شام آلسون
.
بو بیر گولدور پیمبر گلشنیندن آچمیوب کامل
طراوتدن سالون پامال ایدون ای قوم سنگین دل
بیاد بدر احکام خدانی ایلیون باطل
حیاتیندن ایدون محروم قویمون فیض کام آلسون
.
خیام ایچره بونون چوخ آغلیان گوزلر یولون گوزلر
سر راهین دوتون ساغ قویمیون گیتسون بو بی یاور
تقلا ایلیون تیز ئولدورون داغ علی اکبر
حسینین قامتین ایتسون خمیده شکل لام آلسون
.
بُلوبلر نسبتی پیغمبره وار هر گلن ووردی
بو گول هانسی چمندن سو ایچوب هر بیر بُلن ووردی
گلن ووردی گیدن ووردی بُولن هم بُولمین ووردی
بو ظُلمین انتقامین روز محشر لاینام آلسون
.
خیامه یوز دوتوب درک ایت منی ای عالمه سرور
آلولّار دوره می دشمن بسان چنگ انگشتر
بو قومین دیو نفسی عقلینه غالب اولوب ایستر
نگین خاتم جاه سلیمانی سرام آلسون
.
ختا دشتینده آهوی ختا صید اولی صیاده
اماندور قالمیشام بیداد الینده تیز یتوش داده
قضا سوق ایلوری مرکب قویوب یوز سمت جلاده
دوروب خنجر الینده عسقلانی انتقام آلسون
.
یوزون گورسم اگر جان ویرمه موش عین سعادتدور
ویا ئولسم بابا سن گلمه میش مندن وصیتدور
داغیلموش نعشیمی حمل ایت خیامه گر چه زحمتدور
یارالی جسمیمی آغوشینه لیلا آنام آلسون
.
شکار زخمداری مرکب آچدی یر دولاندوردی
گتوردی عاقبت صیاد اولان یرده دایاندوردی
دیلیم یانسون دیسم بیر ظلم ایدوب دنیانی یاندوردی
عناداً ئولدوروب رکن و مقام اوغلین مقام آلسون
.
گلستان ادبدن لفظ و معنا ایلدی گلچین
گتوردی رشته نظمه گوروب هرکس ایدوب تحسین
« کلامی» یازدی بو اشعاری اولسون الده یوم الدین
دوتوب پیر طریقت دامنین اجر کلام آلسون
.
#اکبریه_شجاعت
#شبیه_مصطفی_آمادۀ_جنگ_اولدی_نام_آلسون
#کلامی_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید