در مدح و شهادت حضرت معصومه (س)
.
✍️ #زبدةالاشعار✍️
.
🆔: @nohe_torki
.
احسان تبریزی
.
شهر قم تحصیل ائدیب عزت خانم معصومه دن
کسب ائدیبدیر جاودان دولت خانم معصومه دن
چهره سی عالی تاپوب زینت خانم معصومه دن
اخذ ائدیبدی معنوی ثروت خانم معصومه دن
بی نشان بیر یئر تاپوب رتبت خانم معصومه دن
.
.
اوردا چونکه دفن اولوب گنج ولایت گوهری
آسمان عصمتین پر جلوه تابان اختری
نام پاکی فاطمه عصمتده زهرا مظهری
درگهی باب کرم باب الحوائج دختری
درد مندان چوخ آلیب حاجت خانم معصومه دن
.
.
حضرت صادق بویوردی بو حدیثی آشکار
بیر خانم اولاد هاشمدن متین وبا وقار
فاطمه معصومه آدی شهر قمدا دفن اولار
کیم زیارت ائتسه قبرین حقیدن پاداش آلار
مژده وئردی ششمین حجّت خانم معصومه دن
.
.
شکری وار اولاد کاظم دن چوخی ایراندادی
وار گوز ه ل صحن وحرم مرقدلره هر یاندادی
مشهد قدس رضا هر گون سر وساماندادی
قم دیاری آدلانوب معصومه دن رجحاندادی
شهرلر ایچره تاپوب شهرت خانم معصومه دن
.
.
حمد اولا اللهه ایرانه بولار سرمایه دی
لطف حقدندی بولار بو کشوره پیرایه دی
بو باجی قارداش مزاری جنته همپایه دی
یعنی اهل مشهد و قم جنته همسایه دی
بیر رضا دندی بیر جنت خانم معصومه دن
.
.
وار خبر تا یثربه یئتدی رضانین نامه سی
سر نوشتین نامه ده ثبت ایلمشدی خامه سی
ایلدی عزم سفر اگنینده محنت جامه سی
قارداشین دیدار ائده تنها اولوب برنامه سی
آیریلیق سلب ایلدی طاقت خانم معصومه دن
.
.
قارداشین عطرین آلوردی نامه سیندن خواهری
یاد ائدیبدی غربتین توکدی یوزه اشگ تری
یول گئدیردی شوقیله موسی بن جعفر دختری
آرزو قارداش وصالی عشق اولوبدور رهبری
باشلانوب عشقیله بیر هجرت خانم معصومه دن
.
.
سرعتیله طی ّائدیب منزللری تا کاروان
ساوه یه گلدی چاتوبدی دخت موسی باغری قان
حمله ائتدی کاروانه یولدا اشرار زمان
خویش واقوامی یانندا ئولدولر پیر و جوان
چکمدی اعدا ندن خجلت خانم معصومه دن
.
.
ساوه نی ترک ایلیبدی آهیله افغانیله
قم دیارینه گئدیبدی وئر دیگی فرمانیله
آل سعد گلدی قباقه دیده ی گریانیله
اهل قم یاخچی مدارا ایلدی مهمانیله
آلدیلار عزوشرف شوکت خانم معصومه دن
.
.
تا گلیب مو سی بن خزرج هامیدان تئز خدمته
ناقه سینین دوتدی افسارین یئتیشدی عزته
عرض ائدیبدی سینه سینده اللری اول حضرته
مفتخر ایله منی دوندر ائویمی جنته
خالصانه ایلدی دعوت خانم معصومه دن
.
.
دعوتین ائتدی قبول موسایه اولدی میهمان
ایلییبدی بیتینی اون یئتدی گون مثل جنان
میهمانه فخر ائدردی هر دقیقه میزبان
وئرمدی دست اجل اخت الرضایه بیر امان
ظاهر اولدی حالت رحلت خانم معصومه دن
.
.
آه او وقتدن سینه سی تیر غمه اولدی نشان
ضعف ائدیب جسمی دوشوبدور احتضاره نیمه جان
آز قالوردی جان چخا الدن گئدیب تاب وتوان
غربت ائلده قارداشین سسلردی داده باغریقان
تاب آلیب هجرانیله حسرت خانم معصومه دن
.
.
گوزدی یولدا قالیب اشگین جماله باغلادی
گورمدی قارداش یوزون آهیله سینه داغلادی
دیل یاراسین سینه سینده نامه سیله باغلادی
جان چخنجا سینه دن یولاره باخدی آغلادی
جان آلیب آخر غم و محنت خانم معصومه دن
.
.
#حضرت_معصومه_علیرضا_عباسی
#حضرت_معصومه_مدح #حضرت_معصومه_شهادت
#شهر_قم_تحصیل_ائدیب_عزت_خانم_معصومه_دن
#ترکی
.
✍️ #زبدةالاشعار✍️
.
🆔: @nohe_torki
نظر دهید