خروج از مدینه
.
✍️ #زبدةالاشعار ✍️
.
🆔: @nohe_torki
.
ابوالفضل فرهنگی
.
صاحب عز وشرف گوهر دریای کمال
گرچه ظلم اهلی تانوردی آقانی بااین حال
.
زادگاهنده اونا عرصه نی تنگ ایلدیلر
وطنیندن چخادوب وارد جنگ ایلدیلر
.
گوردی چون دینی خطرده آقانین قلبی دولوب
شهری پیغمبری ترک ایتمگه آماده اولوب
.
دیدی عباسه اخا واردی بیله غملی خبر
سویله اهل حرمه باغلاسون اسباب سفر
.
گوردی عباس ؛ حسینون سارالوب گل رنگی
بیلدی باشنده اونون واردی وداع آهنگی
.
گلدی بیرنحویله عباس؛ ویروب بو خبری
حرم آهولرینون آخدی یوزه اشک تری
.
آیریلق صحبتی دیلدن دیله دوشدی او گجه
بیلمورم بو غم عظمایه اورک دوزدی نجه
.
باخدیلار بیربیرینه اهل حرم آغلادیلار
آغلیا آغلیا اسباب سفر باغلادیلار
.
بیر بیریندن سوروشوربوسوزی اطفال حسین
نه خبر واردی ایدوللر آنالار شیون و شین
.
ندن اهل حرمون قلبی دونوبدور قانه
اهل بیت آغلاشور آیا نه گلوب سلطانه
.
گوزلریندن نیه گیزلینجه آخور گوز یاشی
حسرتیله چکور آغوشه باجی قارداشی
.
آغلاشولار گجه نین وقتی حسینون حرمی
قاریشوب بیر بیره شاهون حرم محترمی
.
نصف شب شاه ئوزی یثربده پریشان دولانیر
گردش چرخین الیندن اورگی قان دولانیر
.
گوئیا آه جگر سوز چکوبدور دیلدن
آیریلق غصه سی قلبینده چخوب منزلدن
.
گور نجه فاطمه نون اوغلی گوتوردی توشه
گلدی گیزلینده قالان قبری آلوب آغوشه
.
دیدی عمرونده چکن چوخلی غم ومحنت آنا
زادگاهیمده منه سلب اولوب امنیت آنا
.
ای جوانلیقدا آغاردان باشنی درد و محن
گوندوزوم شامه دونوب اینجیمشم یثربدن
.
اورگیم تنگه گلوبدی آنا دور گوگلومی آل
اوغلوی بیرده دعا ایلیوب اوندان یولا سال
.
قبریوی بیلمزیدیم بیر گونی ترک ایتملیم
یوخدی چارم آناجان ایندی ولی گیتملیم
.
وار یادیمدا منی گوزدن اوزاقا آتمازدون
یاتماسیدیم گجه لر صبحه کیمی یاتمازدون
.
ولی الآن ندن آسوده یاتوبسان آناجان
ندن اهل حرمی گوزدن آتوبسان آناجان
.
گلشن عشقده باخ صر صر باد محنه
گلشنی ترک ایدورم؛ گلمگیم اولماز وطنه
.
دوزولوب نظمیله غم ناقه لری صاق وصولا
الغرض قافله کرب وبلا دوشدی یولا
.
علم آلدی اله عباس علمدار اولدی
فخریله زینب کبرایه جلودار اولدی
.
توکولور دامنه گوزلردن آخان گوزیاشلار
زینبین وقریله اطرافین آلوب قارداشلار
.
یثربی ترک ایلدی عز و جلالیله خانم
قوی دیوم گلدی همان شهره نه حالیله خانم
.
نه چخوب یورقونی یولاردا نه دینجلدی خانم
اوجا بوی گتدی ولی قدی کمان گلدی خانم
.
رتبه و شانیده هر چند اوجالمشدی خانم
یثربه رجعت ایدن وقتده قوجالمشدی خانم
.
#خروج_مدینه_فرهنگی
#صاحب_عز_و_شرف_گوهر_دریای_کمال
#ترکی
.
✍️ #زبدةالاشعار ✍️
.
🆔: @nohe_torki
نظر دهید