شهادت حضرت موسی ابن جعفر (ع)
.
✍️ #زبدةالاشعار ✍️
.
🆔: @nohe_torki
.
مرحوم صافی تبریزی
.
عالم معناده پیغمبر بو گون مغموم اولوب
حضرت موسای کاظم ظلمیله مسموم اولوب
.
.
صبر اولور نه پایه ده بیر بی توانا جانده
کیم گوروب اندوه و غم دنیاده بو میزانده
اون بیر ایل محبوس اولوب کیم گوشۀ زندانده
بیله بیر مظلومه ظالم هانسی نقش شوم اولوب
.
.
گورمیوب چشم جهان بیر سخت دل هارون کیمی
اولمیوب ظالم بیری اوز قومینه بو دون کیمی
ایتمیوب اسلامه توهین کیمسه بو ملعون کیمی
دهرده بو رسم اوندان اوّلین مرسوم اولوب
.
.
اوندا کی امر ایلدی بی شرم سنده بو لعین
ویردی زهر کین امام عصری قویدی دلغمین
گوشۀ زنداندا جان ویردی امام هفتمین
هانسی حکمه گورکیمی ئولدورماقه محکوم ایدوب
.
.
بولدى تا بو ماجرانی دین و ایمان دشمنی
یعنی هارون دنی پیغمبره جان دشمنی
معنی قرآنه باخموب اولدی قرآن دشمنی
بو نه معنادور یتن آیاتدن مفهوم اولوب
.
.
ویرمدی دفنه اجازه ایلدی عزم شکار
بیله بیر وقته شکار ایتماقی بولدی عمده کار
اوچ گونه دین قالدی نعش سید ابرار خوار
انبیا و اوصیاء بو قصه دن مهموم اولوب
.
.
اول ستمگر روز سیّم شهره عودت ایلدی
دورت نفر حمّال گوندردی اهانت ایلدی
حمل نعشنده گنه اما مروّت ایلدی
تا سیلمانه بو مطلب واضح و معلوم اولوب
.
.
گلدی قصریندن اشاقه دوزمدی بو ذلته
وئردی غسلین قیلدی پر قیمت کفن اول حضرته
قویدی قبره اولدی بو ذلّت مبدّل عزّته
کیم جهاندا بو غریبون جدّی تک مظلوم اولوب
.
.
اوندا کی شام اهلی ظاهرده جفادن دویدیلار
کسدیلر باشین اوزین هم اهل بیتین سویدیلار
گیتدیلر اوچ گون یارالی نعشین عریان قویدیلار
رشتۀ اخباره بو گوهر بیله منظوم اولوب
.
.
گلدی بیمار اوغلى اول شاهون دوباره کوفه دن
گوردی بی غسل و کفن یتمش ایکی باشسیز بدن
نور ویرمش اول نجومه گون کیمی بیر بی کفن
هر کسون اوز قدریجه أول نوردن مقسوم اولوب
.
.
بیر قبیله مرد و زن بیماره امداد ایلدی
باخدی هر بیر زخمداره خدمتین یاد ایلدی
قویدی بیر قبره هامی انصاری فریاد ایلدی
بو گَلیش بو ناله گویا لازم و ملزوم اولوب
.
.
هر قدر آختاردیلار سلطان عطشانه کفن
تاپمادیلار اول یارالی جسم عریانه کفن
لازم و واجبدی ایلَلَّه مسلمانه کفن
خواه بو مسلم امام عصر یا مأموم اولوب
.
.
بیر حصیره چولقادی سبط پیمبر نعشنی
اوز الیله ایلدی مدفون مطهر نعشنی
قویدی پایین پای شهده اوغلی اکبر نعشنی
قبری اوسته هم آتاسی هم اؤزی مرقوم اولوب
.
.
نهر علقمده تاپوب عباس عموسین آغلادی
چشمۀ چشمین او نعش اوسته یوزینه باغلادی
داغدار اولموش دلی بیرده دوباره داغلادی
بولدی وار حقّی جگرخون عمه سی کلثوم اولوب
.
.
ایلدی مدفون یارالی نعشین اول نام آورین
سینه سی اوسته قویوب اما کسیلمش اللرین
کتب قیلدی هم اوز آدین هم آتاسی حیدرین
اسم عباسیله یالقوز بیر لحد موسوم اولوب
.
.
«صافیا» آغلا حسینه روز و شب صبح و مسا
آغلیان گوزدن اولور خوشنود شاه کربلا
دیدۀ گریاندی دایم چشمه فیض خدا
وای او کس احوالینه بو فیض دن محروم اولوب
.
.
#کاظمیه_صافی_تبریزی
#کاظمیه_شهادت
#عالم_معناده_پیغمبر_بو_گون_مغموم_اولوب
#ترکی
.
✍️ #زبدةالاشعار ✍️
.
🆔: @nohe_torki
نظر دهید