شجاعت حضرت ابوالفضل العباس علیه السلام
.
✍️ زبدة الاشعار ✍️
?: @nohe_torki
.
کربلایی حسن آخوندی
.
عرصۀ جنگیده سالار دلیران گورونور
دین حق یاوری اسلامه نگهبان گورونور
پیرو دین خدا مظهر ایمان گورونور
عبد صالح لقبی حامی قرآن گورونور
سَرو قامتلی قوی چون شه مردان گورونور
.
.
آدی عبّاسیدی سردار و علمدار حسین
واریدی چوخ غم و آلامیده غمخوارحسین
یاور دین خدا عاشق و دلدار حسین
عاشق جان به کف وخسته و بیمار حسین
صادق عاشقدی اوز عشقینده ثناخوان گورونور
.
.
عین عبّاس علینون او وفالی پسری
بای عبّاس سالار بندینه هرخیره سری
اَلف آدی اوزون اللری سینه سپری
سین عبّاس که سقّا شه دین بال و پری
خاضع وخاشع و هم تابع فرمان گورونور
.
.
بُرج شأن و شرفه مهر دل آرادی ئوزی
عارضی قرص قمر وار ایکی رخشنده گوزی
شه خیبر شکنون سهم و صلابتده اوزی
آتاسی حیدر کرارکیمین حقدی سوزی
دانیشا ندا دیه سن نا طق قرآن گورونور
.
.
پنجه سی پنچۀ حیدردی قوی شیرکیمین
نطق گویا سی عجب تیزیدی شمشیرکیمین
توخانورلشگرکینه سوزی چون تیرکیمین
دایانوب خصم دنی عرصه ده تصویرکیمین
گوئیا لشگرکین مُرده و بی جان گورونور
.
.
آلسا شمشیرین اَله خصمی پریشان ائلیر
او ستم پیشه لری داخل نیران ائلیر
هرخطا کاری خطا سینده پشیما ن ائلیر
کربلا تپرا قینی قانیلن اَلو ان ائلیر
گلۀ روبه او بیرعدّه بو اصلان گورونور
.
.
دانیشان وقتیده لشگردن آلورتاب و توان
مثل حیدر آتا سی نا طق بُرنده بیان
حال حیرتده قالوب خصم دنی پیرو جوان
دیه سن قا بض الا رواحدی بو شیر ژیان
قورخیدان لشکرکین پیکری لرزان گورونور
.
.
مظهر عشق و وفا زاده مولا دولانور
گُلشنه دینه اولان سرو دل آرا دولانور
پا سدار حرم عترت طاها دولانور
صا حب مشک و لوا صحنه ده تنها دولانور
او دولاندو قجا جفا اَهلی هراسان گورونور
.
.
برق شمشیری عدونون گوزینی کورائلیوب
گونوزی گوزلره همچون شب دیجورائلیوب
صوت تکبیری بلا دشتینی پُر شور ائلیوب
فاطمه اوغلی فراته اونی مأمور ائلیوب
بحر تک موج ورور عرصه ده طوفان گورونور
.
.
ئوز دوتوب سویلدی ای لشگر خونخوار ودنی
تانیمورسوز تانیون عرصۀ میداندا منی
قانه غلطان ائدرم جنگیمه هر بیر گلنی
کیم منیم جنگیمه گلسه گوره بیلمز وطنی
اولون آماده گورون کیم کیمه اَلان گورونور
.
.
گلون اللهه گوره حق سوزومه تابع اولون
دین و قرآنه جسارت ائدنه مانع اولون
کج یولا گیتمیون الله دیینه قانع اولون
رهبریم زادۀ زهرادی اونا خاضع اولون
گورون اوندان صورا اوندان نئجه احسان گورونور
.
.
اولا گر مشکیده سُو خیمیه شادان گئدرم
تشنه لبلر یانینا شاد و خُرامان گئدرم
او لب عطشان بالالار سمتینه خندان گئدرم
سو گتورسم اَله بیر قطره شتابان گئدرم
بیر بولوک عورت اوشاق خیمه ده عطشان گورونور
.
.
بیر باخور مشکینه بیر خیمیه اُول کان وفا
هر باخاندا یانوری دیلدن او محبوب خدا
بیر لب عطشان بالا ائتمیش دل سقانی یارا
یوخدی بیرجرعه سودان دردینه بیرآیری دوا
فکری اصغردی دولاندوقجا پریشان گورونور
.
.
گوئیا جرئت ائدوب مارد بی شرم و دنی
رخصت جنگی آلوب سر سپهیندن علنی
رزمه آماده اولوبدور ولی دِلده محنی
گلوری رزمگهه لرزیه دوشموش بدنی
گلمگیندن بئله میدانه پشیمان گورونور
.
.
مارد شوم و دنی گلدی ابوالفضله طرف
او حرام زاده بو امّا خلف شاه نجف
او خزف مثلیدی بو گوهر دریای شرف
عبد صالحدی ابافاضل او بیر هرزه علف
روبرو معرکه ده کفریله ایمان گورونور
.
.
ماریده فاتح اولوب زادۀ زهرایه مُرید
طُعمۀ تیغ ائدوب اُول کافری عبّاس رشید
ُکفری نابود ائلیوب نور حقی ائتدی پدید
خیم اهلینه وئروبدور اوجا تکبیری نوید
بو خبردن حرم اَ هلی ائله شادان گورونور
.
.
اولین حمله ده آچدی سو یولین صاحب علم
نهریدن مشگینی دولدوردی او سقّای حرم
یوز قویوب سُرعتیلن خیمه گه کان کرم
یولونی سالدی نیستانه طرف نچّه قدم
بیشه ده گوردی که روبهه صفت انسان گورونور
.
.
حمله ور اولدی ابوالفضل طرف قوم لعین
تیغی لر الده گزور غیضه گلور لشگر کین
اوخ آتانلار اوخ آتورتنگه دوشوب افسردین
شیر شجعان عرب تکدی عدولرنئچه مین
گئنه بو حالیله کفر اَهلی هراسان گورونور
.
.
کربلا ایچره علی اوغلی ائدوب عهده و فا
چکوب اوز تیغینه کین لشگرینی مرد خدا
یتدی جان سمعینه اُول حینی ده بیرغملی صدا
گوردی فرمان وئروری مغزینه شاه شهدا
اَلی سُست اولدی بو سوزدن اورگی قان گورونور
.
.
چون بیورموشدی حضورأ اونا بیرکلمه اَزل
ای اَبافاضل اَیا حیدر کراره مثل
سو یولوندا ائلمه خصمیله چوخ جنگ وجدل
سرّی سوزدور دیورم بو سوزومه ایله عمل
واقف اُول زینبون آینده سی اَ لان گورونور
.
.
راضی دور هر نقدر اوخ توخونا پیکرینه
فرقی یوخدور که دگه گوزلرینه اَللرینه
نه اَل ایستور قالا سالم اولا حایل سرینه
مشکی سالم آپارا اهل حرم محضرینه
بیر سه ساله بالا قیز خیمده گریان گورونور
.
.
آزدی بیراوخ یولونی گلدی دگوب مشگه اودم
باخدی بیر مشگه یانوب شمع کیمین صاحب علم
ئوز وئروبدور اونا بیر لحظه ده عالم بویی غم
ائله بیلم دگن اوخ مشکه ائدوب قدینی خم
قامت سروی کمان گونه کماکان گورونور
.
.
آز زماندا او رسا قامتینی ائتدیله خم
او قوی قولارینی مکریله ایلوبله قلم
ایکی قول وئردی گوزونده بیرینی ائتمدی غم
ایلدی ظلم عدودن دل محزونی ورم
ساخلادی باشینی چون لایق سلطان گورونور
.
.
دوشوب آتدان ئوزی اوسته او وفا کانی یره
چشمه چشمه یارالاردان سوزولورقانی یره
گتدی جنّتدن او غم حضرت زهرانی یره
آلدی اوغلون قوجاقا قویدی او عطشانی یره
با شینون اوسته گوروب سایه جانان گورونور
.
.
او لب عطشان بالانون آلدی دیز اوسته باشینی
باخدی گوردی بوریوب قان ئوزونی گوز قاشینی
صدمه گورموش اَلیلن پاک ائلدی گوزیاشینی
اذن وئردی چاغیرا دادینه اوز قارداشینی
دیدی سسله بالامی قورخما شتابان گورونور
.
.
ئوز دوتوب خیمیه سسلندی اخا دادیمه گل
قولسیزام چوخدی یارام یوخ کمک امدادیمه گل
یتشوب جان دوداقا سیدی فریادیمه گل
منه باش چکما قیچون مقتل و میعادیمه گل
گور نئجه قارداشوون عمرینه پایان گورونور
.
.
گل باشیم اوستونه بیر لحظه غنیمتدی اَخا
سنی گورمک منیچون فضل و شرافتدی اَخا
یارالی نوکره هنگام عیادتدی اَخا
خیمیه گلمگیم اَسباب خجالتدی اخا
درک ائله نوکروی قلبی دولی قان گورونور
.
.
یازدی آخوندی بو عُظما غمی هرچند قلیل
گئجه گوندوزچالوشوبدوراولا انشاسی جمیل
نئچه ایللردی دوشور بزم عزالرده دخیل
منه خاطر نظر ایتسه اونا خلاق جلیل
دیلد ه کی دردینه عالم آرا درمان گورونور
.
#عباسیه_شجاعت
#عرصه_جنگیده_سالار_دلیران_گورونور
#آخوندی
#ترکی
.
✍️ #زبدةالاشعار ✍️
?: @nohe_torki
نظر دهید