در مدح ، ازدواج و شهادت حضرت زهرا(س)
.
.
مرحوم انور اردبیلی
.
عزیزه ی حرم ختم الانبیا زهرا
حبیبه ی ازلی وحیه آشنا زهرا
.
فضای عصمته گون اون بیر اولدوزا محور
غبار مقدمینون حسرتی سما زهرا
.
آتاسی همسری اوغلی نوه نبیره لری
سعادتون یولونا مشعل هدا زهرا
.
تجرّد عالمی مافوق مریم و سارا
دُر یگانه ی گنجینه ی حیا زهرا
.
رئیس سلسله ی انبیایه پاره ی تن
شفاعت امرینه سرمایه ی بقا زهرا
.
متون حکمت قرآنیدن ئوزی آگاه
کنیزی فضّه بیلن علم کیمیا زهرا
.
معرفی ملکوته ائدنده پنج تنی
دیین اول آدینی ذات کبریا زهرا
.
آتاسینی چاغوران وقته یارسول الله
دییردی ختم رسل جانوه فدا زهرا
.
منه رسول خطاب ایلمه قیزیم آتا دئ
ملکلره ائلیوم فخر منده یازهرا
.
مشامیمه یتیشور جنت عطری سینوندن
ائویمی ایلموسن روضة الصفا زهرا
.
باخیشدا مثل ئوزومسن یریشده عین ئوزوم
احد ائدوبدی سنی احمده عطا زهرا
.
اولیدی کاش خدیجه باخیدی قامتوه
اجل سنی آناسیز قویدی حیف اولا زهرا
.
اگر گوریدی سنون ذکریوی عبادتیوی
کمال عشقوه سویلردی مرحبا زهرا
.
دوروب ایاقوه یا اینکه اللرون ئوپورم
وظیفه دور منه تعیین ائدوب خدا زهرا
.
سنی کیم اینجیده دنیاده اینجیدوبدی منی
باغیشلاماز اونی خلّاق ماسوا زهرا
.
.
.
وجود پاکیوی ایلوبدی مفخر ابجد
خدای لم یزل و لم یلد و لم یولد
.
.
.
یتوبدی حدّ بلوغه غرض او زهره جبین
چوخ ائلچی گلدی ولی ردّ ائدوب رسول امین
.
دیوردی فاطمه نون اختیاری منده دگل
ازل گرک اولا برنامه غیبیدن تکوین
.
اولار که ائلچی گلور ثروتین ائدور عنوان
پیمبرین قیزی اولماز جلال و جاهه کبین
.
محال امریدی محبوبه ی خداونده
طلای ناب جهان همسر ایلیه تعیین
.
کریمه دور گرک هم کفویده کریم اولسون
قیزیل ندی گرک اولسون جواندا سکّهٔ دین
.
زَبرجدیله خَذَف همنشین اولا حاشا
یاراشماز حلقه ی بی قیمته بهالی نگین
.
بو باره ده سوزی شرح ایلسم مفصل اولار
نه واردی منده او قدرت نه سنده وار تمکین
.
علی ولیّ خدا ائلچی اولدی فاطمیه
سوزون یتوردی اشاریله چوخ فصیح و متین
.
بویوردی عارف اعظم اشاره وی بولدوم
علی گمان ائدورم حاجتون اولا تأمین
.
مجال وئر منه جان صاحبیله صحبت ائدیم
عملِ خیروزون آماده ایلیوم شرطین
.
رضایت حاصل اولوب عقد اوخوندی زهرایه
گهر اقدسه اولدی نکاح درّ ثمین
.
توافق ایلدی مصداق هل اتی ایله
ضمیر سوره ی کوثر صبیّه ی یاسین
.
قورولدی جشن تاپوب نور نوریلن پیوند
اولوبدی فاطمه شیر خدا ائوینده گلین
.
قیزیله گئتدی پیمبر گلین گئدن گجه سی
عم اوغلی عم قیزینون بیربیره وروبدی الین
.
دئدی عم اوغلی علی یوخ عروسوین مثلی
مقامینه ائلیور غبطه اهل عرش برین
.
.
.
همای اوج حیا زینت عوالمدور
ودیعه ی ازلی جسمی صاف و سالمدور
.
.
.
امین سن بیلورم ای نجیب و قدس تبار
بیوک امانته ائتدیم سنی امانتدار
.
خلافی اولماز اگر اولسادا آجیقلانما
همیشه خوش دیلیله دیندیر ائله خوش رفتار
.
بو عَقده ذات تبارک دیوب مبارک باد
سیزه عطا ائده جکدور گوزل گوزل بالالار
.
صورا مخاطب ائدوبدی بتولی پیغمبر
بویوردی شکر اولا اولدی بو ائوده گل گله یار
.
نظیری یوخدی بالا مرتضانون عالمده
وجود اقدسی آئینه ی کمال و وقار
.
آماندی قدرینی بیل احترامینی ساخلا
کنار ماهده ایله ستاره مثلی مدار
.
اورگون ایستینی ایستمه عم اوغلوندان
تهیه ایلیه بیلمز حیالی دور اوتانار
.
گلن خانملارا اظهار ائدوب رسول الله
گئدون منازلوزه دوتمیون بو ائوده قرار
.
هامی دوروب یولا دوشدی فقط قالوب اسما
پیمبر علت تأخیرین ائتدی استفسار
.
جواب عرض ائدوب اسما رسول مختاره
منه خدیجه ئولن وقته ایلدی اظهار
.
نصیبیم اولمادی زهرا گلین گئدنده گورم
گلین گئدن گجه سی قویما فاطمه اولا خوار
.
منیم عوضیمه گئت طوی اطاقینه بالامون
غریبه ائو آناسیز قزلارا اولار دشوار
.
باجیسی قارداشی یوخ منده اولمارام او گجه
اوتور یانیندا بیر آز اولماسین ملاله دچار
.
خلاصه ترک ائلیوبلر عروس و دامادی
نگاره همدم اولوبدور نگار ائوینده نگار
.
گجه گچوب سحر اولدی دوگولدی باب علی
علی گلوب قاپیا گوردی سید مختار
.
.
هدایتون گونی دوتقوندی یوزده وار کدری
ایکی گوزینده نمایاندی آغلاماق اثری
.
سلام ائدوب دئدی مولا فداک امّی ابی
دچار غصه اولوب خاطروز ندور سببی
.
نه اتفاق دوشوبدور علینی قیل آگاه
دیله گتوردی بو سوزلر رسول منتخبی
.
بتولون آیریلیقی حالیمی پوزوبدی دئدی
خبر یوخوندی نجه قلبیمون گئدوب طربی
.
یاتاردی هرگجه زهرا منیم اطاقیمده
چکوب بو منزله قسمت او کبریا نسبی
.
یری بوشیدی گجه گلمدی یوخی گوزومه
یوخیدی منزلمون گوئیا چراغ شبی
.
قیزیمدی من چاغوراندا ننه دییردیم اونا
بیلورسن ام ابیهادی فاطمه لقبی
.
باشیما عشقی ویروب گلمیشم گورم ننمی
اورگیمون اولا آرام بلکه تاپ و تبی
.
قدم گوتوردوقیجه یولدا فاطمه دئمیشم
گواه دور سوزومه یوللارین وجب وجبی
.
ائوون اولوبدی سنون مسجد قُبایه یاخین
اوزاقدی فاصله ای مرد اشجع عربی
.
عم اوغلی جان منه خاطر دئیش بو منزلووی
ائوون ائویمه یاخین اولسا گورمرم تعبی
.
گرکدی فاطمه نی گونده من زیارت ائدم
رضای حقّه گوره دیندیرم او محتجبی
.
تکلّمی بالامون چون غذای روحیمدی
فرحلنور اورگیم بیربیره دگنده لبی
.
پیمبرون سوزینه دقتیله ایلدی گوش
علی بلی دئدی فرمایشین قوتاردی نبی
.
همان گونی ائوینی مرتضا عوض ائلدی
ادب کتابینه زینتدی حیدرین ادبی
.
.
.
او تازه ائو اولارا تازه جایگاه اولدی
کچوبدی بیر نچه ایل دؤندی قتلگاه اولدی
.
.
.
قاپی آلیشدی شرر اوج ائدوب ثریّایه
اوجالدی توستی علی بیتینه سالوب سایه
.
قرا دومان قاپی نون رنگینی عوض ائلدی
آپاردی یل کولونی سپدی قبر طاهایه
.
یانان قاپونی آچان ظالمه ائدون لعنت
مسبّب اولدی او سقط جنین زهرایه
.
قاپونی گر یاواش آچسیدی محسن ئولمزدی
اشاره اهلی سن اول مشتری بو ایمایه
.
قاپیا ضربه توخاندی یاپیشدی دیواره
وسطده قالدی خانم دقت ائله معنایه
.
او حمله حامله بیر عورتی نه حاله سالار
صدف سینوبدی خطر یتدی درّ زیبایه
.
جناب ختم پیمبر یوزین قویان سینه
دچار اولوب دم مسماره دوشدی ایذایه
.
کانّه آینیه میخ آهنین دگدی
کچوبدی تیز تیکان یاکه برگ رعنایه
.
قاپی دالیندا چالوب جان وئرن کیمی ال ایاق
چیخانمیوردی او یردن بیر آیری مأوایه
.
قاپی آچیلدی خانم سینه تنگ و نیمه نفس
اراده ایلدی گئتسون حضور مولایه
.
نچه قدم گوتوروب دوتدی دیزلری رعشه
گئدنمدی یخیلوب صحنه ی غم افزایه
.
بیر الی سینه سی اوسته بیر الی پهلوده
گلوبدی غشّه او بانوی جنت آرایه
.
دوشوب باشیندان عباسی باش آچدی حورالر
حیاگونی گورولوب سربرهنه اعدایه
.
گلوبدی فضه ندا ائتدی یا رسول الله
یخوبلا عصمت کبرانی گل تماشایه
.
بو فاطمیکه آنا کلمه سیله سسلیدون
آنون یارالی دوشوب گل بو صحن بلوایه
.
.
.
ستمله یار علی یاره لندی دادینه گل
اورگووین پاراسی پاره لندی دادینه گل
.
.
.
بو داستانه نجه طبعیمی هزاره ائدیم
اورکده کی سوزومون شرحین آشکاره ائدیم
سینان قابورقا غمینده شکست ائدیم قلمی
و یا که دفتر اشعاری پاره پاره ائدیم
باشا ویرا ویرا یا مطلبی باشا یتوروم
دوا گوزوم یاشینی قلب بیقراره ائدیم
بتولیدن دانیشوم یاکه سقط اولان بالادان
و یا که درد دل حیدره اشاره ائدیم
اوجالدی صحن ده سسلر چخوبدی ائودن علی
بو یرده وار یری نفرین روزگاره ائدیم
گورنده فاطمه نی نقش اولوبدی یرده دئدی
یارالی سویگلومه من نجه نظاره ائدیم
بو اوچولار که دولوب آشیانیدن چیخادیم
و یا حمایت اول یاره لی شکاره ائدیم
حسن حسینیمی یا زینبی ائدیم آرام
و یا که حمل بالام محسنی مزاره ائدیم
مدیر دایره ی پایگاه اسلامم
گرکدی دولت قرآنی من اداره ائدیم
قاپوم یانوب یخیلوب فاطمه ائویم یخیلوب
نه نوعی صبر و توان درد بی شماره ائدیم
عم اوغلون اولدی گرفتار یا رسول الله
دوزوم بو درده و یا تکیه ذوالفقاره ائدیم؟
قصاص فاطمه نی آلماق ایستورم اما
وصیتون قولومی باغلیوب نه چاره ائدیم
وفالی دلبریمی دیندیرم اوزوم گلمور
شکسته گوهری سالم نجه دوباره ائدیم
امانتوندی سنون بختیمون ستاره سیدور
گئدور اُفوله نجه صبر بو فشاره ائدیم
علی سوزین ائشیدوب بیلدی مطلبی زینب
دئدی گئدیم دئیشم معجریمی قاره ائدیم
.
.
اشاره ائتدی آتام وای منه نه غملی سوزه
ننم گمان ائدورم آز زمان قوناقدی بیزه
.
.
#فاطمیه_مدح
#فاطمیه_ازدواج
#فاطمیه_شهادت
#عزیزۀ_حرم_ختم_الانبیا_زهرا
#انور_اردبیلی
#آخرین_یادگار_انور
#ترکی
.
نظر دهید