عشق چیست؟
اشاره به زبانحال حضرت لیلا (س) به سر مبارک حضرت علی اکبر (ع)
.
.
مرحوم حاج مختار نخستین اردبیلی
.
.
عشق بیر کلمۀ پر شوریدی تفسیر اولماز
عشقه پابند اولان عالمده زمین گیر اولماز
عاشق صادق اولان شخصیده تقصیر اولماز
على ابروی کجون تک ایتی شمشیر اولماز
بادۀ شهد وصالوندن ایچن سیر اولماز
.
.
کعبۀ عشقه گئدوب سعی و صفا ایله موسن
سن نیه عاشقووه مهر و وفا ایله موسن
دردمندون بالا دردینه دوا ایله موسن
منه بیر بوسه جمالوندن عطا ایله موسن
یانوب عشق آتشینه لیلی نجه پیر اولماز
.
.
یل دگور توپراق الور گؤر نجه لیلا باشینا
من نجه نی ده باخوم بلبل شبدا باشینا
دشمن ئولدوردی سنی کول اولا دنیا باشینا
ال آتوب روضۀ رضوانیده زهرا باشینا
بوندان آرتوق او کسوک باشووه تقدیر اولماز
.
.
یوسفیم باشووه قویمولّا ذلیخا دولانا
گله پروانه کیمین غمزده لیلا دولانا
قویمیا گردنووه زلف سمن سا دولانا
حقی واردور آنوون باشینه دنیا دولانا
ئولمه سم من بو سنق قلبیمه تعمیر اولماز
.
.
ماه رویونده اولان دانۀ خال حبشی
کیم دیردی او قرا خالووی قانه بلشی
دولانوم باشووه، ای حق یولونون پیشکشی
یوزووی گؤرمگه بیگانه ائدر کشمکشی
هر تماشاچی باخار گؤزلرووه سیر اولماز
.
.
یاره لی باشه اوغول مسکن اولوب نوک جدا
باشوون یاره سینه خاک رهون قویدی دوا
او گؤزل گؤزلره حسرتله باخور میرهدی
زلف چین چینوی چین چین ایلیوب باد صبا
چین و ماچین ده حتى بیله تصویر اولماز
.
.
نه گؤزه ل نقش ایلیوب حسنووی نقاش ازل
سن کیمین تازه جواندان على لیلا چکوب أل
نیزه داری یوخبا وئرسون اگر اولسا محل
نیزه دن دوش یره بیرده منیم آغوشیمه گل
زلفوون گردی کیمین لیلیه اکسیر اولماز
.
.
قان دوتان تل لره وورّام مژه دن شانه على
باتا مژگانیم او باشوندن آخان قانه على
یتیره لیلینی بلکه سر و سامانه على
شمع رخسارووه بی شک اولا پروانه على
پر پروانه یانا شمعیده دلگیر اولماز
.
.
نهضتین حلقۀ زنجیرینى دوت شیر کیمین
قاشلارون اگریدی ویر دشمنه شمشیر کیمین
ویر خدنگ مژه دن قان توکه نه تیر کیمین
قانلو زلفون دولاشوب بوینوما زنجیر کیمین
طاق ایوان عدالتده بو زنجبر اولماز
.
.
هر دم آچ قانلو گؤزون باخ گوزوون قربانی
گؤز یاشیملان یووارام قانلو گؤزوندن قانی
فرض قیلما علی بیگانه کیمین لیلانی
وئرمرم بیر توکووه وئرسله گر دنیانی
نجه لیلاده اوغول نالۀ شب گیر اولماز
.
.
بیلورم من على بو نهضتون آینده سی وار
شهدانون بو گؤزل نهضته پرونده سی وار
زینب عمّون کیمی شاماته نماینده سی وار
لیلى تک حیف اولا گیسوی پراکنده سی وار
زلفیدن که علی سولموش یوزه ساتیر اولماز
.
.
کسیلوب چاره م علی دردیمه چاره گزورم
آخور حسر تله گؤزوم یاشی عذاره گزورم
قلبیمون یاره سی چوخدور گنه یاره گزورم
برج نی لرده بالا خوردا ستاره گزورم
یوخی دور بو، نه معبّر گله ، تعبیر اولماز
.
.
باخورام نیزه ده شهلا گؤزه قلبیم دوتولور
قان آخوب ردّ سالوب گول یوزه قلبیم دوتولور
یتیشن وقته گئجم گوندوزه، قلبیم دوتولور
علّتین بیلمیورم هر سؤزه قلبیم دوتولور
بو خیالاتیمه هئچ نسخه ده تأثیر اولماز
.
.
مجمر عشقیده سن سیز یانورام عود کیمین
چخار آهیم فلکه پخش اولونار دود کیمین
تار دل ناله ائدر نغمۀ داوود کیمین
یوخدی بیر دادرسیم حضرت معبود کیمین
باخماسا بنده لره لطفی سرازیر اولماز
.
.
گزورم چوللری آواره لر آواره سیَم
من ئوزوم چاره سیزم چاره سیزون چاره سیَم
آسمان ادببن ثابت و سیّاره سی سیَم
تیر آهیم داغیدان ابرلرون پاره سیَم
منیم آهیم کیمی هچ ابر یاران تیر اولماز
.
.
تار مویون کیمی تیترر ئوره گیم تاری علی
گزورم سندن ئوتور چوللرى داغلاری علی
سالما گؤزدن منی چوللرده سنی تارى على
نه نه قربان دیله گل منله دانش باری علی
نی ده سن، ناقه ده من، فرصت تقریر اولماز
.
.
چکمیشم سندن ئوتور ال سر و سامانیمدن
خبرون یوخدی مگر قلب پریشانیمدن
چوللرون وحشی سی ناله ائدر افغانیمدن
باغلارام یوللاری سیلابۀ طوفانیمدن
یوللاری آچماقا هئچ کیمسه ده تدبیر اولماز
.
.
فاطمه یوسفی یوسفدن آلوبسان باجی
آنون اولموش على بیر باخماقوون محتاجی
هانسی شهزاده قویوب باشینه قاندان تاجی؟
دوشوب آردونجا گزور فوج بلا آماجی
سنی صید ایلیه لر سن کیمی نخجیر اولماز
.
.
چوخ باخور نیزه ده اسماعیلینه ابراهیم
یاندیرور قلبیمی عالیمدی منیم اللهیم
گون چخوب ابره پناهنده اولوبدور ماهیم
چتر آچوب باشوون اوستونده دومان تک آهیم
آی، بولود آلتدا قالاندا بالا تسخیر اولماز
.
.
کربلا قالمالیدور عالم اگر اولسا فنا
شوره یردور ئوزی، وار اوردا ولی آب بقا
دفتر عشق که منشورینی یازمیش شهدا
قلمی قرمزی قان، مکتبی دور کرب و بلا
قان یازان جمله پوزولماز زَبَری زیر اولماز
.
.
یاز «نخستین» بالا دردین چکه بیلمز آناسی
گوره غلطیده اولوب قانینه نورس بالاسی
قان وئرور صفحۀ رخسارینه باشدان یاراسی
هارا گئتسون ایله مظلومه آنا وار هاراسی
ایله بیر غملی آنانین غمی تحریر اولماز
.
.
.
#اکبریه
#اکبریه_شهادت #راه_شام #نخستین
#عشق_بیر_کلمه_پر_شوریدی_تفسیر_اولماز
#ترکی
#زبدةالاشعار
نظر دهید