در مدح و شجاعت حضرت علی (ع) در #جنگ_خیبر
.
✍️ زبدة الاشعار ✍️
?: @nohe_torki
.
مهدی عابدینی
.
علیدور شهنشاه هفت آسمان
یَدِ قدرتینده کران تا کران
.
علیدور سبب خلقت عالمه
اولوب تحت امرینده قدوسیان
.
علی خلقتین باشینون تاجیدی
قالار حشر اولونجا آدی جاودان
.
نجه وصف ایدیم من جمال اللهی
دینمز بونون وصفینی هر زبان
.
مگر اینکه آقا اوزی لطف ایده
آچیلسین ثنا ایتماقا تا دهان
.
علیدور خداوند عشق و شرف
علیدور امیر زمین و زمان
.
.
خدای کریمه نماینده دور
علی خالقه بیر گوزل بنده دور
.
.
علی معدن لطف و احسانیدور
علی ناشر دین و قرآنیدور
.
هامی هر نه وار حیدرین مِلکیدور
علی مالک کل کیهانیدور
.
علی ویردی دم عیسیِ مریمه
علی سیز مسیحاده حیرانیدور
.
علی شاهیدور شاهیدور شاهیدور
گدای دری مین سلیمانیدور
.
گوزل گوزلری چلچراغ بهشت
بونون عاشقی حور رضوانیدور
.
دگر طاق ابروسی مین یوسفه
گوزللیک علیده نمایانیدور
.
.
گوزوندن واری جنّته اوخشاری
ئولور حوریلر گوزلریندن ساری
.
.
یاراتمیش خدا نوریدن حیدری
سالیب سکّه دن گوزلری گوهری
.
وجودینده یوخ ذره ریب و ریا
علیدور یراوسته حقین مظهری
.
ایاقدان باشا طاعت محضیدور
سالیر یاده حیدر حق داوری
.
گوزیندن آلیر وام خورشید و ماه
منور دی بسکی گوزل گوزلری
.
قیامت یارانمیش قد و قامتی
گوروبلر گورنلر بونی ،محشری
.
یرین داغلارین کاه تک پخش ایدر
اراده اگر ایلسه قنبری
.
.
بونون درگهی باب حاجاتیدور
بونون خلقتینده ملک ماتیدور
.
.
قلم ایستوری صورتیتدن یازا
علیدن یازا سیرتیندن یازا
.
اوچوب مرغ طبعیم اودور گویلره
گوره حیدرین هیبتیندن یازا
.
کومکلیگ منه اولسا حقدن عطا
قلم قصد ایدیب صولتیندن یازا
.
قالیب مات فکریم یازا هانسینی
جلالین یازا حشمتیندن یازا
.
اوچا مرغ روحیم احد جنگینه
و یا خیبرین شوکتیندن یازا
.
خیالیم بودور فاطمه ایستوری
علینون اوگون غیرتیندن یازا
.
.
اوجالدیب اوگونده شرف بیرقین
سرافراز ایدیبدیر سپاه حقین
.
.
یاغیردی سپاه اوسته اوخ بی امان
یریندن ییینمیردی کیمسه تکان
.
سپرلر زبس توش اولوب اوخلارا
سپردن داخی قالمیوب بیر نشان
.
قارانلیق اولوبدور گویون حالتی
یاغیر اوخ گورونمور گوزه آسمان
.
قاباقه گیدن ال ئوزور جانیدن
ایدیم شرحینی من نه نوعی بیان
.
دگور گویده هی تیریلر بیر بیره
یورولموشدی سرباز و تیروکمان
.
باخور غیظیلن عرصیه مرتضی
قیزیشمیشدی قلبی چو آتشفشان
.
.
آلیبدیر اله تیغینه سویلیور
گور ایندی علی دشمنه نیلیور
.
.
یتیب جنگ فرمانی تا حیدره
سالیب ولوله عرصه ده لشکره
.
دیور تیغ خونریزینه تاب ایله
کی من اوخشادیم خیبری محشره
.
مدد قیل کی اعدانی مجبور ایدیم
باش اندیرمگه دین پیغمبره
.
اگیب باشینی مرکبه سویله دی
کومکلیگ ایله ساقی کوثره
.
هدف قلعه دور وییر اوزون لشکره
گرک مرتضی غیرتین گوستره
.
دیلینده هوالحق آتین هِی لَه دی
وییریب لشکر دشمنی بیربیره
.
.
دَییب بیر بیره میسره میمنه
امان ویرموری مرتضی دشمنه
.
.
ویراندا ئوزون لشکره مرتضی
دیین سیلی دور کی دوشوبدور یولا
.
قیریر هر قاباقه گلن جاهلی
دونیم ایلیور پیکرین جابجا
.
ایله سرعتیلن ویریر تیغینی
ئولن فکر ایدور دگمیوبدور اونا
.
ویریر تیغینی باشدی گویده گزور
دوشور خفتیلن بدن تپراقا
.
ایله ضربیلن اندیدیر تیغینی
ویریر داشلارا تیغینی گوئیا
.
قاباقینده یوخدور دورا بیر نفر
هامی پهلوانلار ویره دال دالا
.
.
ئولنلر ئولوبدی قالانلار قاچیر
علی خیبرین سمتینه یول آچیر
.
.
گورنمز بونون مثلینی روزگار
یارانماز علی تک بیله شاهکار
.
باخور جنگینه فنِّ جنگ ئورگنور
او فرماندگانِ یلِ کارزار
.
باخور جنگیده مالکِ اشتره
اشاره ایدور اول یل نامدار
.
دالیمجا منیم گل هراس ایلمه
الیمده منیم تا کی وار ذوالفقار
.
یدالله ی دور حیدرین اللری
علینون الینده اولوب آشکار
.
باخور غیظیلن هر کیمه مرتضی
ایدور تیر خشمیله جانین شکار
.
.
علینون گلن یوخدی میدانینه
گلن توش اولور خشم طوفانینه
.
.
دوشوب لشکر ایچره اودم ولوله
سالیب قلعه ی خیبره زلزله
.
ایله جنگه مشغول اولوب شیر حق
کی ایستور قوتارسون بوگون غائله
.
قاتیب بیربیره لشکرین هنگینی
اولوبدور چتین دشمنه مسئله
.
جنازه توکور برگ ریزان کیمی
دوشوب پیک مرگون ایشی مشکله
.
قالیبدیر دالی قبض روح ایتمگه
دیور یاعلی جان بیر آز صبر ایله
.
قاچیب بیر نفر سسلنوب مرحبی
علی جنگینه بلکه مرحب گله
.
.
دوزولدی یره بیر به بیر کشته لر
دوزلدوب علی کشته دن پشته لر
.
.
اولوب باخبر مرحب زشت رو
گوروب واردی مخیمده مِی دن سبو
.
ایچیب مست اولوب بیلمدی نیلیور
ایدیب اوز اوزیلن بیله گفتگو
.
گیدیم حیدری قانه غرق ایلییم
ایدیم قلبینه تیغ تیزی فرو
.
گرک باش اوجالدام بوگون جنگیده
ویرم لشکره تازه بیر آبرو
.
مینیب مرکبین اوینادیر چگنینی
ولی آنلامیر اول یل پست خو
.
کیمیلن گیدور باشلیا رزمینی
کیمیلن اولور عرصه ده روبرو
.
.
هیاهو و طبلین سسی قوزانیب
اودم گورمه لی بیر جدل باشلانیب
.
.
گوروبدور قوشون گورمه لی صحنه لر
آتین دیرناقی تپراقی چنگه لر
.
نفس لر اولوب حبس هر سینه ده
بیله جنگی هیچ گورمیوب عرصه لر
.
بوروندی هوا یعنی توز تپراقا
اتگین دیین آسمان سیلکه لر
.
ویریر دور میداندا هر پهلوان
تماشایه عرش اهلی یکسر گه لر
.
برانداز ایدیر بیر بیرین ایکّی یل
کی آماده اولسون ویرا ضربه لر
.
چکاچاک شمشیریدن اود یاغار
دگه یاندیرار هر کیمی شعله لر
.
.
باخیر عرشیدن قدسیان حیدره
دعا ایلیور ساقی کوثره
.
.
چکیب مرحب اوّلده شمشیری نی
دیدی گورگیلن خشم تاثیری نی
.
سنه ثابت اولسون گرک قدرتیم
قاباقه سالیم جنگ تاخیری نی
.
سالیر یاده اجداد ناپاکینی
گتیردی دیله بیرده تکفیری نی
.
اولوب حمله ور حیدرین اوستونه
بوروزه ویریب جمله تزویری نی
.
ولی بیلمدی حیدرین قدرتین
تانیمیر دیین خالقین شیری نی
.
چکیب ناگهان شیر حق تیغینی
اوجالتدی گویه صوت تکبیری نی
.
.
گتیردی دیله ذکر اللّهینی
ویریب مرحبه تیغ ناگاهینی
.
.
باتیبدور صدالر یاتیب توز یره
هیجان ویریب ال ایکی لشکره
.
بویاندا دوروبدور سپاه خدا
دعا ایلیوردی یل داوره
.
اویاندا عدو لشکری ناگران
دوشوب رعشه صحراده هر پیکره
.
ایلیکی یاتیب توز گوروبدور قوشون
یتیبدور یل اهل کین کیفره
.
علینی گوروبلر دوروب استوار
باخیر تپراق اوسته دوشن کافره
.
اوجالدی گویه احسن احسن سسی
هزار آفرین قدرت حیدره
.
.
ییخاندا یره مرحبی تا علی
ملکلر دیدی مرحبا یاعلی
.
.
گورنده قوشون تا بیله حیدری
یر اوسته دوشن مرحب بی سری
.
پناهنده اولدی قوشون خیبره
غنیمت بیلبلر اودم سنگری
.
علی خیبره ساری یول باشلادی
یتیشدی زمین و زمان لنگری
.
آتیب ال در قلعه نی تیتره دیب
نمایان ایدیبدیر اودم محشری
.
یریندن چیخارتدی در قلعه نی
یداللهیدور چون علی اللری
.
هامی بیلدی مرحب دگیلدی هدف
علی قصد ایدیب فتح ایده خیبری
.
.
علی هر ایکی عالمین شاهیدی
علی آسمان شرف ماهیدی
.
.
#حیدریه_مدح
#حیدریه_شجاعت
#علیدور_شهنشاه_هفت_آسمان
#مهدی_عابدینی
#ترکی
.
✍️ #زبدةالاشعار ✍️
?: @nohe_torki
نظر دهید