وصف شمایل و سیره عملی حضرت امیرالمومنین علی علیه السلام
.
✍️ زبدة الاشعار ✍️
?: @nohe_torki
.
سید بشیر حسینی میانجی
.
علی او کسدی اونون قامتی قیامتدور
ایاقیدن باشا پُر هیبت و صلابتدور
.
علی نی مدح ائده بیلمز قدَرلی مدّاحلار
اونون دالیجا گزیر معرفتلی سیّاحلار
.
ایشیقلی دور یوزی گون تک باخاندا گوز قاماشیر
نقابِ آیه ی شمسُ الضّحی اونا یاراشیر
.
جهانه گلمیوب هئچ کس اونون جلالینده
ایکی قاشی ایکی شمشیردور جمالینده
.
بیری بیری سینه پیوسته دور ایکی قاشلار
شمایلین چکه بیلمز هنرلی نقّاشلار
.
کشیده بینی، یاناقلاری نورلو، گندمگون
مبارک آغزی صدف، دیشلری دُرِ مَشحون
.
گوزینده جاری دی گویا محبّتین بولاغی
ولایت اهلینه گولّو چیچکلی دور قوجاغی
.
تمام ارض و سماده علی کیمین یوخ شاه
دیلینده ذکری اولوب «لااله الا الله»
.
دوداقلاریندا سپاس و دعای حق واردی
همیشه حنجره سینده صدای حق واردی
.
گوزلّیگینده ائدر مات، ماه کنعانی
آلادی گوزلری مجذوب ائدر هر انسانی
.
یاشاییش ایلوری یوخسولاّرین سیاقینده
وَ بیرده آزدی توکی باشینون قباقینده
.
گوزل جمالینه باخماق بویوک سعادتدور
علی علی دئماق عاشقلره عبادتدور
.
سکوتی چوخدی دانیشماقی آزدی حق کردار
الی نین اوسته، همی سینه سینده چوخ توک وار
.
امیر خلق جهان، پادشاه دین دی علی
کورکدن اِنّی دی هم اَنزعُ البَطین دی علی
.
بئلینده قورشاغی وار جنسی لیف خرمادن
محاسنی آغاروبدور ملال زهرادن
.
ادا ائدور کرمیندن کیمین کی وار دِینی
یاماخلی دور نئچه یئردن ایاقدا نعلینی
.
عبا سالوبدی گئیوب اگنینه گوزل جامه
قویوبدی باشه یاشیل بیر بهشتی عمّامه
.
عباسی قهوه ای، دِشداشه سی اونون آغدی
ابوترابیدی از بس کی نفسی آلچاقدی
.
سالوبدی بارماقا بیر جوت اوزوک او کان شرف
بیری عقیقِ یمندور بیریسی دُرّ نجف
.
اوزوکلرین قاشینا گور نه قازدیریبدی علی
باخ عشقه هر بیرینه آیه یازدیریبدی علی
.
بئله امیر تاپولماز بو دار دنیاده
اساسی ساده، ائوی ساده، جامه سی ساده
.
جهانه سیره ی پاکی سالوبدی آوازه
اوزینه کُهنه آلور قنبره ولی تازه
.
شجاعت عرصه سینون پهلوانی حیدردور
شهامت ئولکه سینون قهرمانی حیدردور
.
شکوه و صولت و عزّ و وقاری گورملی دی
الینده کسگین اولان ذوالفقاری گورملی دی
.
علوم غیبی بیلور علمی علم احمددور
بو قدری بیل علی مظهر محمددور
.
بو جمله نی بویوروبدور جناب پیغمبر
مثلده سوره ی توحید و کعبه دور حیدر
.
وقاریله یئریور ایله بیل کی طاهادی
غدیر خمّ گونوندن جهانه مولادی
.
سخاوت عالمی ضرب ُالمثلدی جودِ علی
همیشه عطریلی دی گول کیمین وجودِ علی
.
اونون کیمی دانیشان یوخدی یوخ بلاغتیله
چیخاندا منبره صحبت ائدور فصاحتیله
.
دوراندا قبلیه وقت نماز، گورملی دی
ائدنده آللّها راز و نیاز، گورملی دی
.
چوخ اوخشیور بدنی آدمیله، عیسایه
خلیله، ایّوبا، داوده، نوحه، موسایه
.
آنادان اولمامیش حتّی بو خلقیدن باشی دی
تمام اَزمِنه ده انبیایه یولداشی دی
.
وضو آلاندا اسور تیتریور سولور رنگی
اذان وئرور اوزی هردن حجاز آهنگی
.
عملده تابع طاهادی، حقّه وابسته
گئدنده سجدیه آنّین قویور او، مُهر اوسته
.
چهار شانه دی اندامی چوخ چوخ عالی دور
گشاده سینه سینون نام حق مدالی دور
.
بیلک لری ائله اِنّی دی عین بازودی
دیلینده ذکر جمیل و جلیلی «یاهو»دی
.
غضبلی شیر کیمی جنگه دائم آماده
قاچا قاچا ائلیور حمله قوم اِلحاده
.
دالی سی جوشنینون یوخدی چون فرار ائتمز
قاچانی قووماز و مکریله کارزار ائتمز
.
علی نی تانری کمک سیزلره کمک یارادیب
علی نی هامّی جهتدن جهاندا تک یارادیب
.
یارالیلار یانینا الده التیام آپاریر
خرابه لرده قالان کس لره طعام آپاریر
.
یتیم لردن اوتور چوخ گئجه یاتابیلمور
باشیندان اهل غمین فکرینی آتابیلمور
.
اونوتمیور حقی هر روز و ماه و سالینده
اوزوک وئرَندی گدایه رکوع حالینده
.
قیافه سینده اونون گویده خلق اولوبدی ملک
باخولاّر اُول ملَکه ساکنان هفت فلک
.
یوزی گونه وُروری طعنه آنّی دا آیه
باشینون اوسته گونوزلر بولود سالور سایه
.
همیشه ایشلمَک اولموش جهاندا تفریحی
گوزل آدی ملَکین دیلده ذکر تسبیحی
.
گهی دوءل الده چکور چاهیدن سو شیرخدا
آغاجلاری سوواریر بیر به بیر او میرِهُدی
.
گئدور بِئلیله باغی بِئلّیور شهِ مردان
بئله امامه بئله رهبره جانیم قربان
.
علی شمایلینه «روشنائی» چوخ بازدی
بو شعری عشقیله «سیدبشیر» اونا یازدی
.
#حیدریه_مدح
#علی_او_کسدی_اونون_قامتی_قیامتدور
#سیدبشیرحسینی
#ترکی
.
✍️ #زبدةالاشعار ✍️
?: @nohe_torki
نظر دهید