زبدةالاشعار

علی نه تک سنون احوالیوه رباب آغلار #حضرت_رباب_عبداله_اصلی

زبانحال حضرت رباب (س) در مدینه و وفات ایشان
.
.
مرحوم حاج عبداله اصلی
.
.
علی نه تک سنون احوالیوه رباب آغلار
من آغلیاندا گوزوم اوخشار اشک ناب آغلار
.
.
او گون کی حنجرون اولدی هدف سه پر تیره
منیمده اولدی گوزومده ایشیق گونوم تیره
نه رغبتیم داخی مرداده وار نه وار تیره
او تیر عرشی ایدوب تیره نُه قباب آغلار
.
.
او گوندن اولدی سیه جسمده وفا رختیم
توکندی خوش گونوم اوز گتدی عالم سختیم
ستمله ائتدون افول ای ستارۀ بختیم
قمر یوزون بورویوب هاله آفتاب آغلار
.
.
دیمه شرارۀ آهیم گویه عبث اوجالوب
فلک امیدیمین آئینه سینی داشه چالوب
یانان دوداقلاریوون سوزشینی یاده سالوب
اود اوسته اشگین الر حالیوه کباب آغلار
.
.
او گوندن ایلمیشم نفسیمه سرین سو حرام
محالیدور گوتورم عکس عهدیمه بیر گام
گون ائوی تپراقین اوستی اولوب ربابه مقام
باخاندا صورتیمه آل بوتراب آغلار
.
.
سحر اسنده گل بختیم اوسته باد نسیم
گوزوم ائوینده ایدر عکس حسنیوی ترسیم
سرشگیله سیلرم ایلرم گئنه ترمیم
اورک گوزوم گوره عکسون اولوب خراب آغلار
.
.
بهار اولاندا آچار غنچه گل گولر چمنه
یتر سرور و شعف ورد و یاس و یاسمنه
اگر جهان اولا گلشن گینه خزاندی منه
بهاریده سارالان غنچه مه سحاب آغلار
.
.
دییَم نه قدر اورک دردی یتمز اتمامه
باشونلا همره اولوب گیتمیشم نجه شامه
مرکّب اشکیم اولوب کیپریگیم یازار نامه
آناوا گلمز او غم نامه دن جواب آغلار
.
.
سنیله آلتی آی ای غنچۀ ریاض امید
اولاردی لیلۀ ظلمت گوزومده روز سپید
او گونلریم هارا گئتدی هانی او بخت سعید
گوروم قالیدی بیله عالمِ خراب آغلار
.
.
عجب دونرگمی دوندردی چرخ پست و دنی
عزیز عالمیدیم اوخشادوب کنیزه منی
گلین گلن ائویم اولموش مصیبت انجمنی
پوزولموش حالتیمه جمله شیخ و شاب آغلار
.
.
ئولنجه گون قاباقندا او بانوی ذی شان
علی علی دیدی اشگین عذاره قیلدی روان
گهی سیزیلدادی نی تک گه ائتدی داد و فغان
بو غمده چنگ و نی و بربط و رَباب آغلار
.
.
بیر عمر اولدی غم و درد و محنتیلن توش
اوز آتشینده یانوب شمع تک اولوب خاموش
اجل پیاله سینی نوش ایدوب دوشوب مدهوش
او چشم مستینه قان کاسۀ شراب آغلار
.
.
دیولّه زینب کبری او بحر صبر و وقار
نماز صبحه ربابی گلوب ایده بیدار
چاغوردی دورمادی ترپتدی جسمینی ناچار
گوروب کی روحی اوچوب عکس جسمه قاب آغلار
.
.
دئدی گلون ائویمون سؤندی شمع انجمنی
دانشموری چمنون عندلیب خوش سخنی
بو گیر و داریده ترک ایلوری سولان چمنی
چکوب ئولوم توزی رخسارینه حجاب آغلار
.
.
او کسکه «اصلی» ویرار عشق و عاشقیدن دم
طریق عشقی گرک طیّ ایده قدم بقدم
دایانا بوتۀ غمده یانوب گتورمیه کم
مرید سلک وفا اولماسا مذاب آغلار
.
.
اماندی ساخلا الون ویرمه مطلبه چوخ طول
حدیث عشقده ابوابه نابلد دی عقول
تک عینینه یازولا مین مطوَّل و کشکول
کلام نقص اولی خامه سنار کتاب آغلار
.
.
بلی بو عشقیدی پروانه شمعه یانمالیدی
نگارین آردیجا صحرالری دولانمالیدی
خُم بلایه دوشن رنگینه بویانمالیدی
گلنده جوشه اؤد اؤستونده کی گلاب آغلار
.
.
#حضرت_رباب #عبداله_اصلی
#اصغریه_شهادت #اصغریه #اصغریه_عبداله_اصلی
#علی_نه_تک_سنون_احوالیوه_رباب_آغلار
#ترکی
#زبدةالاشعار

متن پیشنهادی:  گوز آچدون تا منه باخدون سن ایتدون بیرده خواب اصغر #اصغریه_غمخوار

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی