غارت خیام
.
✍️ زبدة الاشعار ✍️
?: @nohe_torki
.
مرحوم حسينی سعدی زمان و مرحوم ذهنی زاده
.
غارت گونی عوالمه چون دوشدی انقلاب
زهرا قیزی دوتوب گونه یوز ایلدی خطاب
.
باتدی اسلامین گونی ای گون نه رخوتدور بو گون
سنده بات غارت تمام اولسون قیامتدور بو گون
.
سن بو گون طالع اولاندان کونه دوشموش انقلاب
تک نه صحرای بلا ایلور عوالم اضطراب
گورموسن بیر آسمان ماه و نجوم و آفتاب
باتدی قان دریاسینه سنده نه غفلتدور بو گون
.
صبحدن ظهره کیمی خورشید اسلامیتی
چکدی یتمیش دفعه مغرب اوسته کفرین ظلمتی
قانلو گودال ایچره آخر غرق اولوندی طلعتی
روز روشن گورموسن؟ گوزلرده ظلمتدور بو گون
.
گورموسن؟ اولموش هدایت آسمانی منفطر
گورموسن اولدوزلاری یرده توکولموش منتثر
حشر و نشر اولموش بدنلر یر یوزینده منتشر
بیر قیامتدور قیامتدن علامتدور بو گون
.
عرصه گاه حشردور بو گون بو دشت کارزار
روز هاشورادی روز محشرِ آلِ نزار
سنده بات قوی تیره و تاریک اولسون روزگار
بُلسون عالم محشر آلِ رسالتدور بو گون
.
بو گونون بیر نصف روزی نچه ساعتدور مگر؟
وار بو آز ساعتده بیر دنیا حوادثدن خبر
توکدی بیر قانلار بو گون اشرار اولاد بشر
قطره سی دریای راز بدو خلقتدور بو گون
.
بیر جوانلار توکدی قانلی تپراقا قوم رذیل
هر بیری بیر حق طریقت اهلینه پیر نبیل
خانقاه عشقیده مسند نشین بی عدیل
پیروانی رهروان حق طریقتدور بو گون
.
مردلر ئولدوردولر تزویریله نامردلر
مردلر که لافتی تک منحصر بر فردلر
وار دل مردان عالمده بو غمدن دردلر
شیر مردان دردمند بی نهایتدور بو گون
.
نوجوانلار دوغرادی شمشیریله بی پیرلر
شرم ائدردی لطف حسنندن دمِ شمشیرلر
گول بدنلر یاردیلار خار جفای تیرلر
ایمدیده هر خار هر گولدن خجالتدور بو گون
.
توکدی بیر قانلار عنادیله بو گون قوم عنود
قطره به قطره او قانلار صاحبی حی ودود
آه اگر طعنه وورا اسلامه کفاریهود
چون او قانلار ننگی دامنگیر امتدور بوگون
.
باتموسان یوخسا دچار درد بی درمانیسن
یا ایتوردون مغربون سیرینده سر گردانیسن
بات هایان گلدی ولو مشرق نیه حیرانیسن
گرچه عالملر غریق بحر حیرتدور بو گون
.
هاردا باتسان مغربوندور خط سیرونده نه فرق
چوخلارین وارسان گوزونده قان شفقده ایمدی غرق
قطب عالم سیز نه خورشید فلک نه غرب و شرق؟
کیم بُلور عالمده السّاعه نه ساعتدور بو گون
.
کوفیان قطب وجودی سیندوروب یخدی یره
خط سیریندن چیخار قطب اولمیاندا دایره
گورموسن؟ بی نظم اولوب دگموش عوالم بیر بیره
بو منظَّم سیریوه داعی نه علتدور بو گون؟
.
بدو خلقت مشرقوندن باش وئرن ساعت یوزون
غربیمیش شرقون ، حقیقتده گئجیمیش گوندوزون
چخمییدون لامحاله سن بو گون ای کاش ئوزون
یوخسا بُلموردون دونن دن قتل و غارتدور بو گون
.
بیر جنایت ایلیوب آل امیه آشکار
گورمیوب گورمز نظیرین بیرده چشم روزکار
صفحۀ تاریخ اعراب اولدی یکسر لکه دار
آل هاشم صفحه سی تاریخه زینتدور بو گون
.
بو گئچن شب گوردی وضع کربلانی پرخطر
باتدی نصف شبدن اول چرخده قرص قمر
سن هله وارسان ، بو قتل و غارتیله جلوه گر
باتموسان فکرون تماشای جنایتدور بو گون
.
بات یوبانما ایلمه باتماقدا بیر لحظه درنگ
قوی دوتا دنیانی بو روز سیه شبدیز رنگ
تا گوراخ هاردان هارا اولدوزلار آخموش لنگ لنگ
خوردا قیزلار حالی چوللرده نه حالتدور بو گون
.
بیر باش آیریلدی بدندن وارث یحییئیدی
وارث یحیی نه یحیای هامی دنیائیدی
طشتی دشت کربلاده قان جوشان دریائیدی
قتلینه آمر، یزید پست فطرتدور بوگون
.
گئتمیوب گرچه فراز داره، عیسی بی گمان
لیک کفار یهودی اعتقادیندن نشان
رأس پاک وارث عیسایه دار اولدی سنان
تا دئسونلر دارده، عیسی درایتدور بو گون
.
امر قتله خاتمه ویردی بو گون قوم ظلام
تنگه گلدی خوردا قیزلار اولموری غارت تمام
معجر اوستونده کشاکشدور بات اولسون تیره شام
هر قدر تئز باتسان آل اللهه نصرتدور بوگون
.
ساتره محتاجدور اولاد فخر کائنات
سن غروب ائتسن چکر ، ال ظلمدن قوم عدات
نوریوی گیزلت که گیزلنسون وجوه لاطمات
اهل بیت عصمته وقت حمایتدور بوگون
.
قوه نوریه وی اسکیت پیمبردن اوتان
حدت ناریه وی آرتورما حیدردن اوتان
جبرئیل لایلای دین صد پاره پیکردن اوتان
یاندی روح فاطمه بو نه حرارتدور بو گون
.
وار یری مهر جهان آرا بیله وئرسون جواب
سرّی واردور من غروبه ائتمورم بو گون شتاب
منتظردور ساربان زهرانی ائتسون دل کباب
هر نه تاخیر ایلسم تعجیل خدمتدور بو گون
.
باتمورام نیلوم دچارم درد بی درمانه من
یرده گوردوم بی کفندور پیکر شاه زمن
ایلدیم لابد شعاع پرنیانیمدن کفن
خار و خسدن بو کفن ، آز چوخ غنیمتدور بو گون
.
بیرده وار جسمینده چوخ کاری یارالاردان گزند
آتشیمدن یانسادا ، هر خشک و تر مثل سپند
حدت آرتوردوم که اولسون بو یارالار خشک بند
خشک بند زخم ، لازم بیر طبابتدور بو گون
.
یاز « #حسینی» صفحۀ رخساره بو غم چامه سین
قویما خشک اولسون مداد اشک و مژگان خامه سین
صالحا ت ایلر بو نامه سیئاتین نامه سین
اجریوه« #ذهنیده» ذیحقّ شراکتدور بو گون
.
#غارت_خیام
#سعدی_زمان
#ذهنی_زاده
#غارت_گونی_عوالمه_چون_دوشدی_انقلاب
#باتدی_اسلامین_گونی_ای_گون_نه_رخوتدور_بوگون
#بهار_بی_خزان_حسینی
#ترکی
.
✍️ #زبدةالاشعار ✍️
?: @nohe_torki
نظر دهید