زبدةالاشعار

غمدن گنه بومرغ دلیم گلدی رقته #حسنیه_صحاف_تبریزی

ذکر مصیبت نور چشم زهرا حضرت امام حسن مجتبی (ع)
#گریز #غارت_خیام #قتلگاه
.
.
.
مرحوم صحاف تبریزی
.
.
غمدن گنه بومرغ دلیم گلدی رقته
بحر بلاده غوطه ور اولدی مصیبته
.
جان قالبندن ایستری کسّون علاقه روح
چون معترضدی پرده کثرت حقيقته
.
مجذوب ایدنده باطنی صورت عوالمی
قويماز قلوبی جاذبه چخسون فراقته
.
پاک ایت غبار ظلمتی آینه دلون
تاپسون جلا كه بلکه یته عالی رفعته
.
چون ماسوی تمامیسی بیر حُبّه خلق اولوب
سیر مقام عالیه ایستر محبته
.
باخ انبیایه درک ایله عشق و محبتی
سایمش نجه بو ماخلقی فکر و حیرته
.
هر کس اوز عشقجه ایلیوبدور بلا قبول
دوشموش جهاندا سُؤدیگی قدری مشقته
.
باخ اوصیایه بیر حَسن مجتبانی گور
چوخ محنته دوشوب ولی گلموب شکایته
.
حقين ألیندن آلدیلا مظلوم اولوبدی چوخ
ویردی رضا قضای حقه دوزدی محنته
.
تاراج ایدوبله خیمه سین اصحابی صبرایدوب
مین محنت و ملال ويروب یوز او حضرته
.
منبرده ناسزا دیدیلر گه آتاسینا
گاهی گلوبله اول شه دینه شماتته
.
یوخدور توان دلیمده قصه سین دیم
گور بیر نه ظلملر اولوب اول كان رأفته
.
بیر نچه مرتبه او شهه زهر ویردیلر
دوشدی قوای اربعه سی چوخ اذیته
.
اوز جدّنون مزارینه گلدی آلوب شفا
عین مرضده حق يتوروب حال صحّته
.
فرصت تاپوبدی بیر گجه اوز محرمی گلوب
خلوت سراسنه او شهون باخ عداوته
.
گوردی یاتوبدی نازیله تخت اوسته مجتبی
مشغولدور ایو اهلی هامی استراحته
.
آهسته کوزه نی گوتوروب داخل ایتدی زهر
حیرتدیم او مهر و وفا و مروته
.
غالب اولوب عطش اویانوب خواب نازدن
شدت ایدوب سوسوزلوق او صاحب جلالته
.
مهرین گوتوردی کوزه نی تا چکدی باشنه
دوشدی ملائكان سماوات وحشته
.
آچدی باشینی حضرت زهرا بهشتده
غم بندی خلد برینده ختم رسالته
.
اوّلده پارچالاندی مبارک دوداقلاری
تغيير تاپدی رنگی دوشوب اوزگه حالته
.
دوغراندی پاره پاره جگرگری
تأثیر ایلدوقجه گلوب ضعفی شدته
.
گاهی دونردی ساقه گهی ساقدن صولا
ایتدیکجه زهر اثر دل نور هدایته
.
گوردی یاتویدی زینب عُليا مكرمه
جاری ایدویدی گوز یاشنی ماه طلعته
.
نسگلی دللریله خطاب ایتدی زینبه
دور باخ آنام باجی رُخ شمس امامته
.
نه خواب نازدور باجی یاندی جگرلریم
دور ویر خبر بو حالتیمی آل وعترته
.
زهرا نشانی گوزلرون آچ زینبیم اویان
آز قالدی مجتباده یتشسون شهادته
.
آچدی گوزین جهاندا یوزی گلمین خانم
حسرتله باخدي قارداشنا گلدی رقته
.
گوردی دوداقلاریندان آخور قطره قطره قان
ویردی اجازه شدتله اشگ حسرته
.
دوردی ایاقه هولیله بوینین قوجاقلادی
ئولسون باجون سالوب سنی کیم بو مذلته
.
ته قاندي لبلرونده باجون زینبه بيور
قربان اولوم بوگل کیمی افسرده صورته
.
ویردی جواب زهر ويروبله منه باجی
دوندی داخی وصال گونی لیل فرقته
.
آل رسول آلدیلا أطرافين اول شهون
چوخ غم يتشدی عترت شاه ولایته
.
امر ایلدی امام که بیر طشت گتدیلر
طشته بوزین دوتاندا خبر وار عبارته
.
.
قطعه بقطعه طشته توكولدی جگرلری
بر پا اولوب قیامت او دم آلِ عصمته
.
ابر بهار تک دوتولوب آل مصطفی
آغلاردیلار فغانله اول حال رحلته
.
گاهی امام حاله گلوب گاه ضعف ایدوب
مشغول اولوب حسينله گاهی وصیته
.
غش ایلیوب حسن گوزآچوب قارداشین گوروب
قان آغلاسا گوزوم یری وار بو حکایته
.
#گریز
.
اما حسین آچاندا گوزین گوردی شمر شوم
صدرینده اگلشوب نظر ایله شقاوته
.
صندوق علم حقه قویوب چکمه لی آیاق
باخموبدی سینه سنده کی دورت مین جراحته
.
بیر ظلم ایدوب حسینی بوزی اوسته دوندروب
آچدی باشین آناسی سالوب ناله جنته
.
بیلمم نه ظلم ایدوبدی دوتولدی گونین یوزی
یِر تیتردی دایاندی فلک بو علامته
.
.
طوفانه گلدی بحر بلا اسدی قاره یل
دوشدی تزلزل عرشه هوا دوندی ظلمته
.
نوک جدایه گچدی حسینون کسوک باشی
ایتدی شروع نوک جداده تلاوته
.
طبل فرح چالندى قوشون ایتدی هلهله
مشغول اولدی اهل جفا عیش و عشرته
.
سعداوغلی خولیه دیدی بو باشی تیز یتور
ابن زیاده نائل اول اجر بشارته
.
باش گئتدی قالدى باشسیز حسینون حرملری
یوز قویدی خیمه گاهه قوشون نهب وغارته
.
بیر فکر ایدون گورون نه چکوب اوندا اهل بیت
سانسيز قوشون غضبله گیده سمت عورته
.
بیر سوز دیدی عمر او سوزی من دينمرم
سالدی او سوز خانملاری اطفالي وحشته
.
هر بیر یتن قلجلادی خیمه طنابنی
گلمشیدیلر او سلسله كفر جرأته
.
بیر نوعله تالاندی حرم یاندی خیمه لر
عصرون امامی ایمدیده آغلار او ساعته
.
اود ووردیلار آلیشدی سراپرده لر يانوب
بلمم نه حال یوز ویروب اهل ولايته
.
گوردی بو حالی جاہ و جلالی گیدن خانم
توکدی دُر سرشگنی دامان عفته
.
گلدی حضور سید سجاده عرض ایدوب
تکلیف ایمدی بس ندور آل رسالته
.
ای حجت خدا دوتوب اود یاندی خیمه لر
باخ دود آه و سوز درون حرارته
.
گر قارداشیم قبول ایدوب اطفالده يانا
یانّوخ یانار اودا دوزروخ قتل حرقته
.
وار هر بلایه قارداشمیله شراکتیم
ایله بیان بودا یازیلوبدور شراكته
.
غش ایلمیشدی سید سجاد بولمورم
یا ضعفدیدی وار ایکی راوی روایته
.
بو قدر وار که قدرتی اولموب ویره جواب
بیمار امام قیلدی کفایت اشارته
.
ایتدی اشاره عمه دی قاچسونلا چوللره
يتسون جفای لشگر کینه نهايته
.
عورت اوشاق کنیز و حرم چونکه بیلدیلر
وار قاچماقا اجازه حریم طهارته
.
یوز قویدیلا چوله او سویولموش مخدرات
بی شبهه کربلا چولی دوندی قیامته
.
بیربیرلرین گورنده قوجاقلاردی هولدن
بسدور اشاره یوخدی توانیم صراحته
.
بیر دسته آهوان حرم یوز قویوب چوله
صياد سنگ دللر آل آچدی لَئامته
.
قاسم عروسنون آلنوب گوشواره سی
دوشدی حَرم غزاله سی دام شرارته
.
صحّاف ایله خدمت حسینه بو دهرده
عالی جزا ویروله جزاده بو خدمته
.
بو باب رحمتی ایله درویش تک طلب
هو حقّ دی یتش ایکی دنیا کرامته
.
#حسنیه #صحاف_تبریزی
#حسنیه_شهادت
#غمدن_گنه_بو_مرغ_دلیم_گلدی_رقته
#ترکی
#زبدةالاشعار

متن پیشنهادی:  صورت نا دیده گر تصویر اولا مشکلدی بو #پندیات_عدلی_تبریزی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی