زبان حال حضرت زینب(س) در کوچ از کربلا
.
✍️ #زبدةالاشعار ✍️
.
🆔: @nohe_torki
.
مرحومین هندی تبریزی و رجایی تبریزی
.
غم کاروانی اولدی شامه روانه قارداش
قانلو گوزیله بیر باخ بیر کاروانه قاردش
.
.
بو رسمدور حسینیم هرکیم سفر ایدنده
قرآن حمایل ایلر کوچ ایلیوب گیدنده
قرآن جدا باشیندا قرآن دالنجا منده
قول باغلو دستگیرم شمر و سنانه قارداش
.
.
هر کیم مسافر اولسا اطرافنی آلالّار
عزتله قوم و خویشی ایودن یولا سالالّار
تا گلمیوبدی حسرت دیدارینه قالالّار
بو رسم وار جهاندا تا وار زمانه قارداش
.
.
بیگانه نی یول اوستن بیر بیر کنار ایده لّر
عورت اوشاخ گر اولسا اول سوار ایده لّر
کوچ ایلینده شیون خرد و کبار ایده لّر
تأثیر ایدر او شیون پیر و جوانه قارداش
.
.
افراد کاروانه هر لحظه سان ویره لّر
عورتلر آغلاشاندا مطلق امان ویره لّر
آردنجا کاروانون بیرده اذان ویره لّر
مشغول اولار جماعت صوت اذانه قارداش
.
.
سنده جدا باشندا باشلا اذان حسینیم
لنگ ایله کاروانی بر آز دایان حسینیم
تا من ویروم یتیمه اطفاله سان حسینیم
گلمز باشیم بلاسی بو چولده سانه قارداش
.
.
هاردا قالوبدی گلمور فریاده اوغلون اکبر
هر بیر آنا بالاسین بو گوندن اؤتری بسلر
یالقوز قالوب آناسی اوغلون هرایه سسلر
لیلا دلین بو نسگل دوندردی قانه قارداش
.
.
عالمده بیله پوزقون بیر کاروان تاپولماز
آل عبایه بیر کس ویرسون امان تاپولماز
خوردا اوشاخلار آغلار قلبی یانان تاپولماز
زجر و سنان جفاسی گلمز بیانه قارداش
.
.
اطرافیمی آلوبدور بیر سنگدل جماعت
اوغلی ئولن آنایه دشمن ائدر شماتت
سانسیز قوشون ایچینده بیر عدّه یاسلی عورت
هر بیر شقی الینده وار تازیانه قارداش
.
.
صاق و صولومدا دشمن الده سنان دورولّار
خار شمادتیله هر قلبی یاندورلّار
اطفال بی پناهی شمر و سنان ویرولّار
غمدن بو سرو قدّیم دوندی کمانه قارداش
.
.
هانسی باجی منیم تک قارداش غمینده یاندی
صبر ایتدی هر بلایه هر محنته دایاندی
سالما منی گوزوندن قارداش حسین اماندی
هجران غمینده گللم داد و فغانه قارداش
.
.
دور ای انیس زینب ای یادگار زهرا
بیر چاره قیل حسینیم یولّاندی آل طاها
باشون دالنجا گللم شامه رسن قولومدا
اثبات عشقه بسدور بو بی نشانه قارداش
.
.
اولدی اسیر عیالون بو فرقۀ شراره
بو ورطۀ بلادن دور چک بیزی کناره
من وارد اولدوم ایندی میدان کار زاره
نوبت یتیشدی سن سیز من ناتوانه قارداش
.
.
تاپسیدی چاره زینب گئتمزدی شامه سن سیز
قویمازدی قوملار اوسته نعشون قالا کفن سیز
کلک قضا یازوبدور من بی کسی وطن سیز
بیر بلبلم نه گل وار نه آشیانه قارداش
.
.
سیره چخوب جداده گون تک یارالی باشون
دین اوسته باشدان آتدی فکر جلالی باشون
خلقی هدایت ائتدی باشی بلالی باشون
صبر ایلیوب دایاندی هر امتحانه قارداش
.
.
غم چکمه منده سن تک هر محنته دایانّام
هر امر مشکل اولسا دین اوسته سهل سانّام
باشون دالنجا گللم شاماتیده دولانّام
دین درسی اورگدم تا اسلامیانه قارداش
.
.
من درسیمی یتوردوم تکمیله محضرونده
خطّ وفانی گوردوم بو قانلی پیکرونده
دینه فدادی بولدوم عباس و اکبرونده
بو یولدا گچدی باشون نوک سنانه قارداش
.
.
ایتدون غریبه سودا دللرده ازبر اولدی
بیع و شرا متاعی بیر جسم بی سر اولدی
بو جسمه مشتری چون خلّاق داور اولدی
زینبده شرکت ائتدی سود و زیانه قارداش
.
.
یاخشی تجارت ایتدون ای فخر آل عصمت
دشت بلانی قیلدون دریای فیض و رحمت
قبرون زیارت ایلر بو یرده بیر جماعت
اولدی بهشته رهبر بو آستانه قارداش
.
.
گچدون بو یولدا جاندان ای سرور مدینه
ویردون رواج و رونق بازار شرع و دینه
باغلانماسا طنابه نازلو قیزون سکینه
اثبات مطلب اولماز اهل جهانه قارداش
.
.
استاد محترمدور بو مطلعه «شباهنگ»
ایتدون «رجائی» اوندان کسب کمال و فرهنگ
ویردوز ایکوزده باهم دامان زینبه چنگ
ویرسونله اجر کمال نوحه یازانه قارداش
.
.
بو سوزلره «رجائی» استادیدن دم آلدی
باعث اولوب «شباهنگ» بو فیضی یاده سالدی
حیف اولدی بارالها استادیمز قوجالدی
فایقدی صنعتینده هر بیر جوانه قارداش
.
.
#کوچ_کربلا #هندی_تبریزی #رجایی_تبریزی
#غم_کاروانی_اولدی_شامه_روانه_قارداش
#ترکی
.
✍️ #زبدةالاشعار ✍️
.
🆔: @nohe_torki
نظر دهید