تاریخچۀ فدک
.
✍️ #زبدةالاشعار ✍️
.
🆔: @nohe_torki
.
مرحوم انور اردبیلی
.
فتنۀ مرحبی سرکوب ایلدی شیر خدا
خیبر اهلین قوتاروب کفردن اول فلک نجا
برقرار اولدی همان قلعه ده تا صلح و صفا
مرد و زن راه ضلالتدن عدول ایلدیلر
حکم پیغمبر اسلامی قبول ایلدیلر
.
.
واریدی خیبره نزدیک بیوک آبادی
باغ خرماسی مفصّل چوخیدی تعدادی
ملک پر بهره و حاصل فدکیدی آدی
دین و قرآندان اوزاق ساکنی لجباز و عنود
وادی جهلده سرگشته و مسلکده یهود
.
.
فتح خیبر اولارا ایلدی تأثیر عمیق
بزم تشکیل ویروب ایلدیلر فکر دقیق
دینی حق بلدیله پیغمبری معصوم و صدیق
اتفاقیله گلوب محضر خیرالبشره
پیروی اولدولا احکام حق دادگره
.
.
ضمن تسلیمده آرتوردیلار عزت لرینی
حُسن نیّتله نشان ویردیله خدمتلرینی
باغ و ملک فدکی منبع ثروتلرینی
طَبق صدقه قویوب آتدیلا گوزدن بِالاَبَد
شخص پیغمبره بذل ایتدیله مهر اولدی سند
.
.
مالک ملک فدک اولدی رسول مدنی
حبه ایتدی قزی زهرایه او ملکی علنی
ویردی مدرک صورا اینجتمیلر فاطمه نی
نقشۀ دشمنه آگاهیدی پیغمبر اوزی
فدک اوستنده بتولون سولاجاقدور گل اوزی
.
.
سنۀ أون بیر هجرتده قرا گیدی جهان
شمس برج ادبی ابر اجل ایتدی نهان
چکدی آغوشنه ایستکلسنی باغ جنان
روح زهرایه بو وسعتده جهان اولدی قفس
گوز یاشین توکدی جماله ویروب آلدوقجا نفس
.
.
بزم شورای ثقیفه ایلدی ظلم گزاف
مجمع باطله دن صادر اولوب حکم خلاف
وحدت ملت اسلامده گورسندی شکاف
دینده اول ابوبکر اوزی اخلال ایلدی
مصدر امر مسلمانلاری اشغال ایلدی
.
.
مرد بی منطق اولوب مجری برنامۀ دین
صاحب منطق و علمی ایلدی خانه نشین
گون بگون نقشه چکوب توطئه اولسون تکوین
جمع ایدوب باشنه همدستلرین مشورته
ال تاپوب حیله ایده لطمه ورا معدلته
.
.
مجلسون اهلنه ثانی ایلدی پیشنهاد
ملک و باغ فدکی فوراً ایدون استرداد
چخسا زهرانون الیندن گر او ملک آباد
عایداتی کمک مالی اولور دولتوزه
در نتیجه سیزی نایل ایلیور نیتوزه
.
.
گوردی بو رأیی پسندیده ابوبکر خبیث
قویدى صدّیق آدین اما ایلدی جعل حدیث
دیدی پیغمبر اکرم بویوروب قویماروق ارث
قیلدی بیر جمله کذایی سوزی عنوان دلیل
فدکی فاطمه دن آلدی او نامرد و بخیل
.
.
بیر سفارش ایلدی اوّل ابوبکره بتول
ملکمه ایتمه تعدّی منی گل ایتمه ملول
منیم حقّیمده بیلورسن بویوروب ختم رسول
اینجیده هر او کسی که بو قیزیم فاطمه نی
اینجیدوبدور ایله بلسون گتوروب قهره منی
.
.
اولمادی حق سوزه بوبکرده گوش شنوا
حقّ مشروعنی پامال گوروب خیر نساء
اذن آلوب شاه ولایتدن أو فخر حورا
مسجده گلدی ایده غصب اولان املاکی طلب
دوره سینده نچه عصمتلی خواتین عرب
.
.
منبرون أوسته ابوبکر گوروب قیلدی سکوت
قطع ایدوبدور سوزینی نطقنی قویدی مسکوت
کسدی نجواسین اولوب مسجدین اهلی مبهوت
گلنی بلدیله چرخ نبوی اولدوزیدور
اشرف اشرف مخلوق الهی قزیدور
.
.
قبر پیغمبره نزدیک جلوس ایتدی زنان
ایاقا دوردی خانم ایلیه آغاز بیان
حاضرینه وئروب ال رقّت قلب و هیجان
سیل تک جاری ایدوبله یوزه گوز یاشلارینی
چوخلاری قویدیلا غمدن دیزینه باشلارینی
.
.
کسیلوب ناله أو مرضیه و فرخنده لقا
ابتدای سخننده ایلدی حقّه ثنا
گوندروب محضر پیغمبره صلوات و دعا
گوزلرین اشک مصیبتله لبالب ایلدی
باشلادی صحبته حضّاری مخاطب ایلدی
.
.
سیزه ای اهل وطن حق ایلدی نعمت عطا
اولدی مبعوث آتام ختم نبی شمس هدا
حمد اولا حق نبوت اونیلا اولدی ادا
سیز هدایت اولاسوز سعی بلیغ ایتدی آتام
یوزوزه آچدی سعادت قاپوسین گتدی آتام
.
.
سیز مگر عهد ایلمشدوز اولاسوز عهدشکن
داناسوز دینوزی فوری دیه سوز یاوه سخن
پاره پاره گورورم رشته پیوندوزی من
جاه دنیایه گنه قلبلروز طالب اولوب
نیه اهریمن ناپاک سیزه غالب اولوب
.
.
کیمدی میراث پدردن منی محروم ایلین
سندیروب ارثون حصارین دانشور یاوه سخن
ایلسون مدرک اقامه بو سوزی خلقه دین
کیمدی سوء هدفیله منی دلگیر ایلیور
آیۀ مُنزلی دلخواهنه تفسیر ایلیور
.
.
او حدیثی که ابوبکر ایلیور ألده سند
باباما نسبتی یوخدور بلون أى اهل خرد
محض خشنودی زهرا ایلیون حقه مدد
سیز مسلمانسوز اگر آیۀ قرآنه باخون
سورۀ نمله بأخون سورۀ عمرانه باخون
.
.
ای جوانان قوی پنجه و پر زور و دلیر
سیزیدوز ایلین عالمده جهاد پیگیر
نیه خاموش اوتوروبسوز ایلیون بیر تدبیر
نه گلوب نیزه و شمشیر بلا پیکروزه
مشت کوه افکن و بازوی کمان کشلروزه
.
.
منطق قاطعیله سوزلرینی قیلدی بیان
ناامید اولدی ولی ایلمدی اخذ مرام
قیدوب منزله یأسیله او مرضیه مقام
اوتدی بیر گوشه ده چادر شبی چکدی یوزونه
اوز أوزون ایتدی مخاطب دیدی دردین اوزونه
.
.
مسجده گئتدوم امیدیله یتوردوم سوزومی
حال ضعفیله بوگون زحمته سالدوم اوزومی
ظلم شیخین دنی ایتدی قرا گوندوزومی
بی دیانت کیشیلر ایلدی مأیوس منی
وطن اهلى وطننده تانومور فاطمه نی
.
.
آغلادی هر نقدر ایلدی محنت غلبه
پوزولوب حالتی یوز دوتدی امیر عربه
اولین باریدی قهر ایتدی او والا نسبه
ای ابوطالبون اوغلی ایله بیر جنبش و جوش
کنج عزلتده نه علت اوتورو بسان خاموش
.
.
سن همان شخصدون اوخ تک پر آچان وقته صفه
غرش ایلوب اوزووی تز یتورردون هدفه
دوندرن وقته یوزون جنگده هر بیر طرفه
گرگهای عربه ننگیدی میدان مصاف
قیلاریدون اولارون سینه لرین فوری شکاف
.
.
استعانت ایلسه کیم ویروسن سن اونا سس
حقّیمی آلماقا اقدام ایلمورسن نیه بس
ایتدی فرمایش على آغلاما ای قدس نفس
دوز بلیاته تسلّی اولا شاید منه ده
آتوون آدی اوجالسون گوگه هر مأذنه ده
.
.
آتا آدین ایشیدوب قلبده آرتدى محنی
فدکی ایتدی فراموش دیدی بو سخنی
زندگیدن ایلیوبسن بابا مأیوس منی
وعده ویردون تئز ئولم حیف اولاچوخ چکدی فراق
گوزلریم روحیره قربان منی تئز ایسته قوناق
.
.
ای اوغولسوز آتا ای ماه چهارده شب من
سن یاتوبسان منه تاریک اولوب ملک وطن
قاپومز باغلى قالوب حالمزی یوخدی بلن
ابر غم فاطمه نون خانه سینه سایه سالوب
شدت غمدن اوزوم تک حسنینیم سارالوب
.
.
ای سمانون ایشیقی یر یوزونه مثل بهار
قلبدن ایلمرم عشقوی بیر لحظه کنار
عاشقانه گزورم من سنی هر لیل و نهار
امر مشکلدی اورکدن غم وصلون یوخ اولا
سایورام گونلریمی قورخورام عمریم چوخ اولا
.
.
گئتمرم مسجده حمله گتوره اوستومه غم
منبرون قورخلی محرابوی تاریک گورم
أو فرشتیکه سنون آدیوه ای فخر امم
وحی دن اوتری انوردی دل کاشانمزه
قطع ایدوب سایه سنی گلموری غمخانه میزه
.
.
غصّه لی قلبیمی غمدن نجه آزاد گوروم
قالدی ویرانه رسالت ایوی آباد گوروم
خاک بی مهری قوجاقونده نجه شاد گوروم
قبریدن باش گوتوروب منبر و قرآنوه باخ
منی دیندیرمه بابا درگه سوزانوه باخ
.
.
روش امته تغییر وئروب دور زمان
ظلم الیندن بابا یوخدی بیزه بیر لحظه امان
گل شاداب بهاریم نجه گور اولدی خزان
روشنایی گل اوزون بذل ایله قاره گونمه
نجه گور قتلگه اولدی اؤز ایویم محسنمه
.
.
قارداشیم یوخدی گوره باری بو آغلار گوزومی
آنام اولسیدی دیردوم اونا گیزلین سوزومی
گسترردیم اونا بو سیلی گوگرتمش یوزومی
یوزومی زلفله گزلتمگیمون علّتی وار
بلورم سیلی یرین گورسه عم اوغلوم اوتانار
.
.
ثانی نون ظلمی ایشقلی گونومی ایتدی سیاه
عمل زشتنی دانسا ایلسه رد گناه
ایسته سم حشریده دیوان عدالتده گواه
در و دیواری قیامت گونی شاهد چکرم
قانلو مسماریله فوراً اونی محکوم ایدرم
.
.
«انورا» حقّه کمکدور شعرانون قلمی
سوز یازان شاعر اولور جامعه نون محترمی
نوحه شاعرلرینه واردی ائمه کرمی
مقبل و محتشم و دعبله خلعت ویرولوب
بیته بیر بیت مناسب سوزه قیمت ویرولوب
.
.
#فاطمیه_انور_اردبیلی
#فاطمیه_شهادت #مردان_جاوید
#فتنه_مرحبی_سرکوب_ایلدی_شیر_خدا
#ترکی
.
✍️ #زبدةالاشعار ✍️
.
🆔: @nohe_torki
نظر دهید