فرات باغلانماسی
.
✍️ #زبدةالاشعار ✍️
.
🆔: @nohe_torki
.
کربلایی کریم نصیری دولت آبادی
.
فراتون باغلانوب یولاری گوردی مهربان سقا
سولان گلزاره باخدیقجا اولوردی ناگران سقا
.
.
اودم که گلستان مصطفاده قحط آب اولدی
بلا گردی سارالموش یوزلره مثل نقاب اولدی
سوسوزلوق گورموین قزلار سوسوزلوقدان کباب اولدی
بو احوالی گورنده گیزلین ایلردی فغان سقا
.
.
قوتارموش مشکیلردن سو دولوبدور اشکیلن گوزلر
حرارتدن سوسوزلوقدان سارالدی گل کیمون یوزلر
ویراردی قلبه اوت عطشان دوداقلاردان چخان سوزلر
گوروب اوضاع اخیامی اولاردی باغریقان سقا
.
.
گلستان وفاده لشکرغم خیمه قورموشدی
سودان اوتری اوشاقلار چوخ دولانموشدی یورولموشدی
او سقا خانه که بوش مشکیلر اوردا قویولموشدی
بیر آز اوردان اوزاخلیقدا گزردی مهربان سقا
.
.
گلوردی تشنه لبلر ناله سیندن سینه سی تنگه
دوشردی غیرتندن گل جمالی رنگیدن رنگه
بولوردی اصغرین آهی اثر ایلور دل سنگه
او طفلون حالینه گوز یاشین ایلردی روان سقا
.
.
سو یوخ صود یوخ بالا سیراب اولا بیر آن گیده هوشه
گزوردی خیمه ده بیچاره لر چاره او مدهوشه
گورولّر یاتموری قیزلار آلور نوبتله آغوشه
اولار لای لای دیینده اصغره سسلردی جان سقا
.
.
وجودی غیرتیندن تترییردی بید لرزان تک
گره لنموش جبینندن آخور تر درّ غلطان تک
ال آتموش دامن صبره آتاسی شاه مردان تک
اولوردی غوته ور گرداب غمده قهرمان سقا
.
.
ایدردی ناله نی مثلی علمدار بلند همت
سیخاردی قبضه ی شمشیرین الده اول اسد صولت
دییردی نیلیوم یا رب آقام ویرمور منه رخصت
دوشوبدور مشکله الان اوزی مشکل آچان سقا
.
.
دیار نینوا دولموش سینیخ نیلر نوا سیندن
رقیه ناله سیندن اصغرین توتقون صدا سیندن
رباب اما دیموردی اوغلونا لای لای حیا سیندن
چون عباسه ادب ساخلور اودور آغلاردی قان سقا
.
.
#فرات #کریم_نصیری
#عباسیه
#فراتون_باغلانوب_یولاری_گوردی_مهربان_سقا
#ترکی
.
✍️ #زبدةالاشعار ✍️
.
🆔: @nohe_torki
نظر دهید