زبانحال حضرت زینب کبری (س) به زمین کربلا در اربعین حسینی
.
✍️ زبدة الاشعار ✍️
.
?: @nohe_torki
.
حاج مجید امینی تبریزی
.
قارداشی قبرین گورنده زینب علیا جناب
کربلایه ایلییدی وار یری بیله خطاب
.
.
کربلا ای غبطۀ گلزار و گلشن کربلا
گللرون گر چه سولوب، سن سولما گولَّن کربلا
.
.
ایلیوب بیله اراده روز اوّلده اِلاه
تا سنه خلق ایلسون چشم بصیرتله نگاه
آیری بیر یرلرده اولماز بیله عزّت بیله جاه
فخر ایله اولدون علی اوغلی حسینه خوابگاه
حق سنی ایتدی اونا مدفن مُعیّن کربلا
.
.
سنده کی یتمیش ایکی گل سولدی جور خاریدن
اهل کین رحم ائتمدی یاری آیردی یاریدن
نه جنایتلر دیوم من باش وئروب اشراریدن
چوخ بدنلر دوغرانوب شمشیر آتش باریدن
قالمادی سالم نه باش و ال، نه بیر تن کربلا
.
.
اود یاغوردی هر طرفدن قطرۀ باران کیمی
یرده دوشموشدی بدنلر جلدسیز قرآن کیمی
هر بالا آلموشدی آغوشه بالاسین جان کیمی
هیچ کیمی ئولدورمیوبلر شاه مظلومان کیمی
گل وجودی اوخلارا اولموشدی مخزن کربلا
.
.
سنده یتمیش بیر مسلمان اشقیا ئولدوردولر
فخر ایدوبلر هامی دین خدا ئولدوردولر
آدلاری مُسلم بیر عدّه باوفا ئولدوردولر
زادۀ پیغمبری دلده دعا ئولدوردولر
نه تانور آیا حسینی خصم ذوالمن کربلا
.
.
قوی دیوم بو قان توکنلر ائتدیقی اعزازیدن
نه اویاندی بیر نفر شه گوسترن اعجازیدن
اولمادی ویران بو عالم یوخ خبر بو رازیدن
ایستورم یاد ایلیم بیر سودامر سربازیدن
نیلرم آیا لسانیم اولسا الکن کربلا
.
.
ایله بیر سرباز بو دنیایه مشکلدی گله
قدرتی قالموردی اصلا آغلیا یا که گوله
داد او ساعتدن قویوب بیر اوخ کمانه حرمله
اوخ دگنده حلقینه گویلر ایدوبدی زلزله
قانیله شه یوز گوزون ایتدی مزیّن کربلا
.
.
قالدی نه احواله بیر الله بولور مظلوم امام
عرض ایدوب یارب اوزون آل بو قوشوندان انتقام
شه توکور گوز یاشینی ایلور شماتت اهل شام
اولمادی چاره دوباره ایلدی عزم خیام
گل دیدی زینب عجب سو ویردی دشمن کربلا
.
.
کربلا سنده اگرچه باتدی خورشید و قمر
شه الی اوسته آخوب اولدوز کیمی بیر سود امر
بیر شجر ویرمز ربابین نخلی تک احلی ثمر
اصغر اولدی علّتی اولدون جهاندا مشتهر
یرلر ایچره آبرو تاپدون بیله سن کربلا
.
.
کوفیان باخدی دیدی به به نه رنگ و بوسی وار
آشکارادور بو طفلین صورت نیکوسی وار
قارداشی شهزاده اکبر تک گوزل ابروسی وار
هانسی شاهین اصغر شش ماهه تک نیروسی وار
شاهد و مصداق بو گفتاره سنسن کربلا
.
.
شیرخواریدی اگرچه، لیک جاندان سیریدی
طاقتین الدن آلان اوچ شعبه لی بیر تیریدی
حلقینی کسدی اوخیدی یا که بیر شمشیریدی
صورتی سولموشدی امّا قانیله تحمیریدی
عشق اصغر عالمه اولدی مبرهن کربلا
.
.
اوخ دگنده حلقینه بلبل کیمی پر چالمادی
نقل ایدولّر شاهه باخدی گولدی، ئولدی قالمادی
یاندیروب یاخدی آتاسی بوینونا قول سالمادی
بو ربابه نسگل اولدی بیر قوجاقه آلمادی
ناله سی سالدی حسینین عرشه شیون کربلا
.
.
گورمیوب دنیا ابوالفضلین نظیری پهلوان
ایله سرو قامته غبطه ایدر هر بوستان
بیشۀ هیجاده حیدر تک اولان شیر ژیان
بیر شجاعت گوستروب مثلین ویرن یوخدور نشان
سسلنوب ابطال اولا عبّاسه احسن کربلا
.
.
مشکی دولدورموشدی اطفاله آپارسون بلکه سو
شاهراهین نخله زاره سالدی دلده آرزو
اوخلادی سو مشکینی سو آخدی کام آلدی عدو
ایتدی عبّاسی خجل بو اوخ آتان بی آبرو
سینمالیدی بیر ایله بازو و گردن کربلا
.
.
سو آخوبدی مشکیدن عبّاسی مایوس ایلدی
درد و غمله اوخ آتان سقّانی مایوس ایلدی
یتمدی دلده اولان آماله افسوس ایلدی
طاقینه طعن و شماتت قوم منحوس ایلدی
سسلنوبلر هاردا قالدی دست و پنجن کربلا
.
.
ای #امینی ساخلا ال بوندان آچوخ یازمور قلم
بولمورم آتدان نجه دوشدی یره صاحب علم
سجده گاهی اوخلانوب قولّاری اولموشدی قلم
قانی باشیندن آخوردی یوز گوزون دوتموشدی دم
قالدی روبه لر الینده شیر اوژن کربلا
.
.
#اربعین
#قارداشی_قبرین_گورنده_زینب_علیا_جناب
#کربلا_ای_غبطه_گلزار_و_گلشن_کربلا
#مجید_امینی
#ترکی
.
✍️ #زبدةالاشعار ✍️
.
?: @nohe_torki
نظر دهید