ماه محرم
.
✍️ #زبدةالاشعار ✍️
.
🆔: @nohe_torki
.
#سبک_ای_باد_صبا … 7 سبک
.
.
مرحوم غمکش
.
قان آغلا گوزیم شاه شهیدانه بو آیدا
چک صبح و مسا ناله گل افغانه بو آیدا
.
.
معناده گلوب نالیه سكان سماوات
پخش اولدی یئره ظلمیله شیرازه ی آیات
صبر ائتدی نئجه اهل حرم بیلمم او ساعات
آغلالا هامی سرور عطشانه بو آیدا
.
.
بو ماه محرم که عیان اولدی هلالی
دولدوردی جهانی غم و اندوه و ملالی
آرتدی او زمان آل على غملی خیالی
هر آن گتیرور محنتی انسانه بو آیدا
.
.
بو آیدا ائدوب ناله ازل حضرت زهرا
جاری ائلیوب اشگینی رخسارینه لعیا
هم باشه ووروب مریم و هم هاجر و سارا
غم بحری سالوب عالمی طوفانه بو آیدا
.
.
بو آیدا وئروب یوز مُحَن اول سرور دینه
بو آیدا دولوب غم دل جبریل امینه
سو یولّارینی باغلادیلار غملی حسینه
یوز وئردی محن زینب نالانه بو آیدا
.
.
بو آیدا حسینون داغیلوب جاه و جلالی
تالانه گئدوب خیمه گهی مال و منالی
قانه بویانوب اكبرینون هاشمی خالی
القانی سو تک آخدی بیابانه بو آیدا
.
.
بو آیدا حسینون سارالوب سولدی بهاری
بو آیدا دونوب ظلمت اولوب صبح و نهاری
القانه باتوب لشگر سرلشگری یاری
چون اولدی اسیر عترتی عدوانه بو آیدا
.
.
بو آیدا ووروب خیمیه اود قوم ستمگر
گوشواره گئدوب غارته گهواره و معجر
لیلانی قوجاتدی غم مولا غم اكبر
اصغر آناسی بلکه گلوب جانه بو آیدا
.
.
آفاقی دوتوب زلزله هم تیتره دی گوگلر
داغ داش گلوب افغانه سالار یادینه تیترر
آغلار ملكوت اهلی حسین وای هامی سسلر
ناله یئتیشوب حوریله غلمانه بو آیدا
.
.
بو آیدا نشان اولدی جفا تیرینه اصغر
بو آیدا باتوب قانینه هم قاسم و جعفر
بو آیدا سولوب گل کیمی عباسیله اكبر
چون زینت اولوب عرصه ی میدانه بو آیدا
.
.
بو آیدا آچوب باشینی چون ختم پیمبر
گوزیاشی توکوب باشه ووروب حضرت حیدر
بو آیدا قوروب بزم عزا گویده ملکلر
ساخلالا عزا سرور عطشانه بو آیدا
.
.
باشلار وورولوب نیزه لره چون مه انور
عریان دوه لر اوسته گئدوب عترت حیدر
زنجیر جفا گردن سجادیده یکسر
آغلار او شهه گوشه ی ویرانه بو آیدا
.
.
«غمکشده» بو ماتمده شها روز و شب آغلار
هر محنتیوه قلبینی مین آهیله داغلار
شوریله یازار نوحه قرا باشینه باغلار
ایستر گله تا أول قزل ایوانه بو آیدا
یاس ساخلیارام شاه شهیدانه بو آیدا
.
.
#قان_آغلا_گوزیم_شاه_شهیدانه_بو_آیدا
#ترکی
.
✍️ #زبدةالاشعار ✍️
.
🆔: @nohe_torki
نظر دهید