زبانحال حضرت زهرا سلام الله علیها در شام غریبان سیدالشهدا ( ع )
.
✍️زبدة الاشعار✍️
?: @nohe_torki
.
محمدرضا صادقی
.
قتلگاهیده زلفینی آنان
ائتدی قانیویله خضاب اوغول
وای اوغول دیلینده دیه دیه
اولدی وصلیوه کامیاب اوغول
.
سن بئله خیال ایلمه اوغول
من سنی یادیمدان چئخاتمیشام
ایله یاندیروب قلبیمی غمون
ماسوانی من گوزدن آتمیشام
قتلگاهیده سن باتان زمان
قانیوه اوغول منده باتمیشام
باشیوی کسن قاتل ایلدی
قلبیمی او دمدن کباب اوغول
.
تا جسارت ائتدی سنه اوغول
شام و کوفه نون بی حیالری
غارت ائتدیلر بیر بیر بالا
خیمه ده تمام آشنالری
ووردولار حسین نازلی قیزلارون
عرشه اوج ائدیبدور نوالری
جنت ایچره گوزیاشینی توکوب
اول رسول ختمی مآب اوغول
.
تا قوتولدی غارت بو نحویلن
گوندوزوم منیم دوندی اولدی شام
باشیوی سنون ظلمیله ووروب
نیزیه اوغول ظالمان شام
بیر خدا بولورکی او حالیده
گوندوزی نجور ایلدیم تمام
زینب آغلادی منده آغلادیم
بیرده آغلادی بوتراب اوغول
.
آز زمان گئچوب ساربان گلوب
خنجر الده اول دمده یانیوه
بارماقوندا انگشتری گوروب
جانیلر کیمی دوشدی جانیوه
کسدی بارماقون شل اولا الی
نحس اللری باتدی قانیوه
هر نه سسلدیم بو یارالیدی
ذره ائتمدی اجتناب اوغول
.
من او حالیده قانیوی دوتوب
قتلگهده قانه بویانمیشام
آند اولا اوغول قانلی باشیوه
سن یانان مصیبتده یانمیشام
کوفیه گلنده باشون سنون
باشیوین دالینجا دولانمیشام
دور ایاقه آل گویلومی منیم
بو عملده وار چوخ ثواب اوغول
.
رسمیدور اوغول سایه سین سالار
هر زماندا گل بلبول اوستونه
گوزلرین فداسی اولوم بالا
دور باشون قویوم من گول اوستونه
نیلمیشدیم آخر بو خولیه
باشیوی قویوبدور کول اوستونه
یوم حشریده بیله ناکسی
ایلسون اوزی حق عتاب اوغول
.
بولمیوب سنون قدریوی اوغول
کوفه نون حیاسیز جماعتی
سینیه قویا قانلی باشیوی
وار فقط آناوین لیاقتی
کوفه اهلی اما کول اوستونه
قویدولار بو شرعی امانتی
بیله نامروتلرین گوروم
قلبینه دولا اضطراب اوغول
.
« صادقی» آلوب خامه سین اله
نصف شب گلوب آستانیوه
گویلی ایستوری یوز قویا سنون
درگه ملک پاسبانیوه
گر چه عذری چوخدی ولی اوزون
دعوت ایله بیر گلسِتانیوه
هجریدن یانور قلبینون باشی
گوزلری اولوب چون سحاب اوغول
.
#سبک_ساخلا_ناقه_می_کاروانیدن (بیش از 8 سبک زنجیر و سینه زنی)
.
#شام_غریبان
#تنور_خولی
#قتلگاهیده_زلفینی_آنان
#محمدرضاصادقی
#ترکی
.
✍️ #زبدةالاشعار ✍️
?: @nohe_torki
نظر دهید