زبانحال حضرت زینب کبری (س) با امام مظلوم (ع) در شهادت حضرت ابوالفضل (ع)
.
✍️ زبدة الاشعار ✍️
.
🆔: @nohe_torki
.
مرحوم حسینی سعدی زمان
.
قربان اولوم گوز یاشوه قارداش نه وار آغلار گوزون
نه یوز ویروب قارداشوه بی اختیار آغلار گوزون
.
.
آغلار گوزون قربانیم رحم ایت منیم گوز یاشیمه
واضح بیان ایله گوروم نه گَلدی بس قارداشیمه
یوخسا علمداریم اُلوب قارداش اولوب کُل باشیمه
وای قارداشم وای سویلَمه کشف ایت نه وار آغلار گوزون
.
.
اکبر اُلنده ویرمدی یوز بو غم اعظم سنه
اولما مکدّر قالمیوب بو چولده بیر همدم سنه
عبّاس تک اولّام اوزوم بو گون شریک غم سنه
گر هجر عبّاس ایلیوب چوخ دلفکار آغلار گوزون
.
.
حالون پریشاندور ندن، یاددان چخاردوبسان اوزون
قانه باتوبدور اللرون، جاری ایدر قان یاش گوزون
ماه بنی هاشم باتوب، دوتقون گونه بنزور یوزون
قانلو جمالون چولقیوب گرد و غبار، آغلار گوزون
.
.
سو اُسته اشرار اُلدوروب اهل حرم سقّاسینی
امّ البنین بوردا دگل بیر اوخشاسین عبّاسینی
یوخدور آناسی نسگلی چوخدور دوتاق گَل یاسینی
گورسون اوشاقلار آغلاسون ای تاجدار آغلار گوزون
.
.
اهل حرم قیزلارووا بو مطلبی بُلدورسه لر
تاب ایلمَزلَر، اوزلرین وار حقلری اُلدورسه لر
بو اوخلی سو مشکین اگر خوردا اوشاقلار گورسه لر
سسللّه وا عَمّا، گورر اطفال زار آغلار گوزون
.
.
آهون شراری اود وورور قلب خواتینی یاخور
گوزدن یوزه اوز باشینه دریا کیمی اشکون آخور
گاهی دونور حسرت گوزون نهر فرات اُسته باخور
گویا علمدار آختارور ای شهریار آغلار گوزون
.
.
سنده امامت قوّه سی وار ای شهِ عالی تبار
سن دُوزمیَنده بو غمه بو خوردا قیزلاره نه وار
آز قالدی اُلدورسون اوزین آل علی، خرد و کبار
علّت ندور صاق و صولا حسرت باخار آغلار گوزون
.
.
گَل خیمه ده آغلا حسین تا قوم کینه گورمسون
امّا اماندور گوز یاشون ماه مدینه گورمسون
بو اوخلی مشکی جهد ایله نازلی سکینه گورمسون
تشنه اوشاقلاردان هَله قیل استتار آغلار گوزون
.
.
ایلوردی ایمدی قارداشیم دعوا آتام حیدر کیمی
سالدی اگر قولّارینی اعدا عَموم جعفر کیمی
نعشین نیه حمل ایتمدون خرگاهوه اکبر کیمی
واضح بیان ایله نه وار چوخ بی قرار آغلار گوزون
.
.
ظلمیله «شاهیده» سنی ایتدی «حسینی» تلخ کام (1)
یالوار ابوالفضله اوزی تا اوندان آلسون انتقام
وور دامن عبّاسه چنگ، آغلا حسینه صبح و شام
سِیل فنایه ظالمی ایتسون دچار آغلار گوزون
.
.
ای لا یَنام منتقم باخ بو پریشان حالیمه
رحم ایت گوزی یولدا قالان بیدادرس اطفالیمه
قورتار بو ذلّتدت منی لطفاً یتور آمالیمه
هامّی دیسون ایتدی سنی غمدن کنار آغلار گوزون
ـــــــــــــــ
(1) شاهیده رئیس ثبت تبریز بود.
.
.
.
.
#عباسیه_شهادت
#سعدی_زمان
#قربان_اولوم_گوز_یاشوه_قارداش_نه_وار_آغلار_گوزون
#لمعات_حسینی ص 255
#ترکی
.
✍️ #زبدةالاشعار ✍️
.
🆔: @nohe_torki
نظر دهید