حالات ورود مدینه
.
✍️ #زبدةالاشعار ✍️
.
🆔: @nohe_torki
.
مرحوم نادری میانجی
.
قطار غم دوزولوب کربلادن آیریلدی
بلا قطاری او دشت بلادن آیریلدی
.
.
حریم عصمت دین بلبلان باغ شرف
حسین ستاره لری اهلبیت شاه نجف
قوتاردی شامین عذابین گیدورحجازه طرف
یول اهلی دوشدی یولا یولانوب حجازه قطار
قالوب بلا چولی ششگوشه لی غریبه مزار
.
.
ایدردی طی منازل او کاروان ادب
سواد یثربی گورجک عیال شاه عرب
گلوبدی نالیه عرض ایلدی خانم زینب:
گلور قزون وطنه قلبدن سخیلمش آنا
یخوبدیلار ایویم ای ایوی یخیلمش آنا
.
.
دوشوبدی بلبل پر بسته لر یولی چمنه
گلور علی قزی زینب حسین سیز وطنه
خبر ویریدیله ای کاش قارداشیم حسنه
ئولوبدی قاسمی گر اولماسون حسن مأیوس
گلور گوره اونی یثربده بختی قاره عروس
.
.
بو رسمیدور نقدر وار جهان بو رسم قالار
اوغول آتاسی گورنده عروسی خلعت آلار
آتا نوازش ایدوب بوینونا قولونی سالار
على الخصوص اولوب چوخلی دلشکسته عروس
گزوبدی چوللرى ویلان اولوبدی خسته عروس
.
.
یتنده قافلۀ غم جوار زهرایه
کنار یثرب اولوب مسکن آل طاهایه
سرادق عظمت زینت اولدی صحرایه
یانان چادردی قرا پرده سی نشانۀ غم
او خیمه ساکنی بیر عده قلبی داغلی حرم
.
.
او خیمه لر که اولوب کربلاده رنگی سیاه
طنابی رشتۀ غم دور ستونی نالۀ آه
همان او خیمه ده ساکن اولوبدی آل الله
سپهره رعشه سالوبدور دوباره نام حسین
بیری علی چاقوروردی ، بیری امام حسین
.
.
چمن گورنده گلر شوره داغلی بلبلر
دوشر خیاله چمنده اولان همان گللر
آچیلدی شمر عداوتله باغلیان دیللر
بیری دیردی گلون تازه دن باتاق باسه
آناسی ایندی گلر آغلیاق بیز عباسه
.
.
قوروبلا بزم عزا ناله ایتدی چرخ اثیر
بو ناله سید سجاده چوخ ایدوب تأثیر
سرشک چشمله سسلندی گل حضوره بشیر
علم گوتور اولا محفوظ احترام حسین
گیدوب خبر ایله شهره ئولوب امام حسین
.
.
گمان واریمدی سنون یاخشی طبع شعرون اولا
مدینه قاصدی اول سال جهانه واویلا
حسین سسیله فضای مدینه شهری دولا
صدا بلند ایله دینون ایوی اولوب ویران
پیمبرین قاپوسی باغلى قالدی ای یاران
.
.
دئ شهرین اهلنه بیکس حسین عیالی گلور
قوتولموش أوچی الیندن حرم غزالی گلور
بیر عده عورت اوشاق قلبدن یارالی گلور
بلا چولونده غم و درده مبتلادی بولار
زیارت اهلدى زوّار کربلادی بولار
.
.
بشیر اطاعت ایدوب امر شاه والایه
او طبع شعرله چاتدی مقام عظمایه
مدینه قاصدی اولدى عیال زهرایه
لباس قاره ، اله بیر قرا علم گوتوروب
اوزون بو نوعله شهر مدینیه یتوروب
.
.
ازل مدینۀ اسلامه عرض ایدوبدی سلام
آتین سورردی اوجا یرده تا ایدیبدی مقام
بشیری گوردی جماعت پوزولدی ظم و نظام
بیری دیردی جواب ایلیون بو بد خبره
یقین بو بیلمیر آقامیز بیزیم گیدوب سفره
.
.
بیری دیردی دیون قاصده سیزی تاری
قرا علم گوتوروب گزمه کوچه بازاری
مسافرتده دور آخر مدینه سالاری
مریضه فاطمه نون قلب زارینی یخما
سفرده دور علی اکبر امید ائوین یخما
.
.
بیری دیردی بو نکته منی ایدوبدی غمین
بو قاره پرچمی گر گورسه قورخار ام بنین
مسافرتده دور اوغلانلاری او زار حزین
خدا نکرده اگر فال بد ورا احساس
آنا نه حاله قالار گر بله ئولوب عباس
.
.
بشیر گوردی جماعتده ئوزگه حالتدور
هنوز ئولوم خبرین وئرمه میش قیامتدور
تمام گوز نگران قلبلر جراحتدور
دیدی علاقه واروز عترت بتوله گلون
خبر گر ایستیوسوز مسجد رسوله گلون
.
.
گلوب خلاصه دوروبب روضۀ پیمبرده
بشیر ئوزی دایانوب دوردی بیر اوجا یرده
باخاندا منظره گوردی ئورک گلور درده
دوتوبدی کوچۀ دربندی بیر آغیر هسته
ویروبله ال اله نورس جواندی بیر دسته
.
.
بیری بیرینه دیور یانمشوق فراقینه
گورک گلور علی اکبر گیدک قباقینه
یتشدی دوشدی جوانلار بشیر ایاقینه
سوروشدیلار دئ گورک قاصد نکو منظر
نه وقته وارد اولور شهره بس علی اکبر ؟
.
.
اومه جمالدی چون مظهر کمال ادب
مدینه یوسفیدور بیزلریله هم مکتب
بله قرا گیونوبسن ندور بوامره سبب ؟
بشیر باخدی بواوضاعه تابدن گیتدی
جوابه اولمادی طاقت بیر آز سکوت ایتدی
.
.
جوانلاری بو سکوت ایلیوبدی چوخ نگران
سوروشدیلار ندی قاصد مگر ندور جریان
جواب ویردی یوزوم گلموری ایدوم اعلان
همان قَدَر دیرم لیلنون یوزی گلمز
گیدون طوی ایلیون اکبر طویا گله بیلمز
.
.
بشیر گوردی اوزاقدان شرار غم گلوری
بیری دیور یول آچون بانوی حرم گلوری
باشندا چادر عصمت ورور قدم گلوری
یانندا اوغلان اوشاقی یواش یواش دانشار
پیاله تک گوزی عباس جامنه اوخشار
.
.
دَگوب بیری بیره مردم گنه قیامتدور
اوزون قولی اوجا قدی غریبه عورتدور
قدی خمیده دی اما رشیدہ صولتدور
گلوب یتشدی بشیرون مقابلنده دوروب
آچوبدی درج دهان قاصده بئله بویوروب :
.
.
علی ولی خدا آشناسیَم قاصد
کنیز حضرت خیرالنّساسیَم قاصد
او شیر صولت ابالفضل آناسیَم قاصد
خلاص قیل منی قاصد بو درد واهمه دن
منه خبر ویره سن سن حسین فاطمه دن
.
.
منیم بو حالمی قاصد گتورگلن نظره
اماندی سالما گلان قلب زاریمی خطره
عراق سمتنه اوغلانلاریم گیدوب سفره
ئورک طلاطم ایدور ورطۀ ملالده دور
منه بیان ایله قاصد حسین نه حالده دور
.
.
دیدی بشیر سوزون قلب زاری آغلاتدی
اونون سو مشکنه دشمن او گون کمان آتدى
باشون ساق اولسون ابوالفضل ئولوب علم یاتدی
خیامه گلمدی یاندی شرارۀ غمده
رقیّه دن خجل اولدی قالوبدی علقمده
.
.
بویوردی قاصده قلبیم دولی اگر قاندور
سوروشمورام من ابالفضلی قانه غلطاندور
اولار تمامسی اوغلوم حسینه قرباندور
گر اوغلوم ئولسه ده سالمام جهانه شیون و شین
بو شرطلن ساق اولا فاطمه بالاسی حسین
.
.
اگر گوزوم ایشیقی عون وفضل جعفردی
اولار حسینیمه قاصد غلام کمتردی
مین اوغلوم اولسا حسین جمعنه برابردی
بش اوغلومون هره سی گر چه سرو نورسدور
حسین ساق اولسا عموماً قبیلیه بسدور
.
.
بشیر سویله دی دردیم منیم اولوبدی مزید
سنان شمرون عذابین خدا ایدیدی شدید
باشون ساق اولسون آنا ایتدیلر حسینی شهید
بلا چولونده اونون کوفیان بی ایمان
اون ایکی ضربتلن کسدیلر باشین دالیدان
.
.
حسین حسین دیدی ام البنین دوشوب خطره
گوروب که زحمتنی شمردون وئروب هدره
دورانمادی ایاق اوسته داخی اؤتوردی یره
آلوبلا دوره سنی هاشمیه عورتل
قوجا جوان قارشوب بیر بیره قوپوپ محشر
.
.
دوباره ام بنین گلدی حسرتیله دیله
ائدوبدی چرخ زماندان بو دللریله گله
جوان اوغوللار ئولونجه نولا آنالار ئوله
نقدر وار نفسیم باشه قاره باغلیارام
حسین حسین دیرم نور عینه آغلیارام
.
.
اگر یانوب جگریم قلب چوخ پریشاندور
ئولونجه آغلامام عباسه قانه غلطاندور
بوفخر بسای که اوغلوم حسینه قرباندور
گتورمرم دیله عباس آدین محال اولسون
حسین یولوندا ئولوبدور صودوم حلال اولسون
.
.
مدینه اهلی کومکلیک ایدون منه باری
نیه که قالمادی منده آنالیق آثاری
چاقورمیون منی ام البنین سیزی تاری
ئولوب اوغوللاریم عالمده گللریم سولدی
اوغولسوزام آدیم ام البنین یالان اولدی
.
.
بو وقته گوردیله مردم ایچنده شور نوا
گلور بشیره طرف پیرمرد الینده عصا
نفس زنان یتشوب قاصدی ایدوب پیدا
ز بس قوجالمشیدی تنگ اولوب اونون نفسی
بیر آز تأمل ایدوب صحبته آچیلدی سسی
.
.
جناب جعفر طیارین اوغلی عبدالله
دوتوبدی قاصده یوز سویله دی بناله و آه
نه وقته وارد اولور یثربه عیال الله
بیان قیل منه هاردا قالوب او نور دو عین
قوروب نه یرده سراپرده سین امام حسین؟
.
.
سکوت ایلدی قاصد کسیلدی طاقت و تاب
سالوب اشاقه باشین وئرمه دی سئواله جواب
جناب جعفرین اوغلی اولوبدی قلبی کباب
بویوردی قاصده بیلدیم داخی ندورمطلب
حسین ئولنده ئولوب یا که ساق قالوب زینب ؟
.
.
او زینبی که باباسی امیر بطحادور
او زینبی که آناسی بتول عذرادور
او زینبی که حیاده حریم علیادور
او زینبی که حسیندن ئولونجه آیریلماز
اگرحسین ئوله زینب یقیندی ساق قالماز
.
.
بشیر عرض ایلدی بیلمورم نه اولدی سبب
حسین ئولوبدی ولی ساقدی دربدر زینب
ئوزون گورنده سنه فاش اولار ندور مطلب
همان قدر دیرم که باشی بلالی گلور
ایکی بالاسى ئولوب قلبدن یارالی گلور
.
.
اوزینبی که علاقه واریدی قارداشنا
او زینبی که اونون دوشمه مشدی گون باشنا
قاریشدی خون جگر کربلاده گوز یاشنا
باشی آچوق دولانوب شامی قوللاری باغلى
گلور گنه وطنه قلبی غصّه دن داغلی
.
.
بشیر گوردی سوز اولده خاتمه گلوری
دَگوب بیری بیره مردم تلاطمه گلوری
علی سراقنه بیمار فاطمه گلوری
الین آلوب الینه جدّه سی اونی گتورور
گھی دورور یخیلور گه یرور گھی اتورور
.
.
دیردی جده چکوبسن یولومدا چوخ زحمت
گلنده قارداشیم اکبر دیسم اومه طلعت
بو زحمتین عوضنده آلار منه خلعت
چوخ انتظار چکن خسته قلب دینجله جک
مدینه شهرینه ایندی منیم بابام گله جک
.
.
اماندی جدہ علاج ایت ایاقلاریم سورونور
گورنده قاصدی بیلمم ندن ئورک دوگونور
لباسی غم ، علمی قاصدین قرا گورونور
منی یتور اونا ای جده دیزلریم تیترر
گوروم نه وقته گلور قارداشیم علی اکبر
.
.
بشیر باخدی او بیماره ایلیوب فریاد
دیدی بو چرخ ستم پیشه نون الیندن داد
مدینه اهلی اماندور منه ایدون امداد
نجه دیوم بو مریضه ئورکده تابیم یوخ
سئوال ایتسه بونا ویرمه لی جوابیم یوخ
.
.
.
بو مهربان باجیدور انتظاری آرتوخدور
علی اکبره گوررم محبتی چوخ دور
بونا ئولوم خبرین ویرمگه یوزوم یوخدور
ئوزور دیون، نه دیسوز غنچه تک سولوبدی بو قیز
هنوز ئولوم خبرین وئرمه میش ئولوبدی بو قیز
.
.
.
بشیر گوردی جماعتده یوخدی تاب و توان
مدینه اهلی سالوب عرشه ناله و افغان
دوشوبدی ولوله یثربده محشر اولدی عیان
بشیره لازم اولوب تا وئره سئواله جواب
یوزون جماعته دوتدی بله ایدوبدی خطاب
.
.
خبر ویروب سیزه کون و مکانی آغلادورام
قیام ایدینجه قیامت جهانی آغلادورام
بهشت ایچینده رسول خدانی آغلادورام
چخون کناره ایدون سیز فغان شیون شین
باشوز ساق اولسون ئولوب ای مدینه اهلی حسین
.
.
دیوم سیزه نجه ارض و سمانی داغلادیلار
گلوبدی نالیه گوگلر ملکلر آغلادیلار
پیمبرین قاپوسین قوم کینه باغلادیلار
سرین سو ایچمیون ای شعیان شاه جهان
ایکی چایین آراسیندا حسین ئولوب عطشان
.
.
مدینه اهلی بیلون دین ایوی اولوب بر باد
چخون مدینه نین اطرافنه ایدون فریاد
کنار شهرده گریاندی اگلشوب سجاد
قرا علم گوتورون رازیله نیازه گیدون
سنقدی قلبلری یاخشی پیشوازه گیدون
.
.
یازاندا نادری صغرا آدین قلم آغلار
چکوبدی شمر لعین شیعه قلبنه داغلار
گوروندی زینبه یثربدہ کی اولان باغلار
دیدی گزردی بو باغلاردا قاسم واکبر
گورنده یرلرینی قان اولان ئورک تیترر
.
.
#ورود_مدینه_نادری
#قطار_غم_دوزولوب_کربلادن_آیریلدی
#ترکی
.
✍️ #زبدةالاشعار ✍️
.
🆔: @nohe_torki
نظر دهید