شجاعت حضرت ابوالفضل العباس علیه السلام
.
✍️ زبدة الاشعار ✍️
?: @nohe_torki
.
مصیبی تبریزی
.
قلم ؛ یل یل نینوادن دانیش
همای سپهر وفادن دانیش
علمدار دشت بلادن دانیش
سلحشور کلّ قوادن دانیش
عزیز دل مرتضادن دانیش
شجاعتده شیر خدادن دانیش
ابوالفضل صاحب لوادن دانیش
اشارت ائله قاشینون مدّینه
همان سروه بنزر اوجا قدّینه
.
.
علی نین غرورآفرین اوغلودی
صلابتده سردار دین اوغلودی
همان شاه رفرف نشین اوغلودی
شهامتلی امّ البنین اوغلودی
صفابخش خلد برین اوغلودی
حقیقت ده عین الیقین اوغلودی
امیر دل مومنین اوغلودی
صداقتده گفتارینه عشق اولا
صلابتلی قوللارینه عشق اولا
.
.
آقام سائلین دل فِکار ایله مز
آدون سسلیَن جمعی خوارایله مز
عزاداری درده دچار ایله مز
ولا اهلینی داغدار ایله مز
گدانی ئوزوندن کنار ایله مز
اونی ئوزگیه ریزه خوار ایله مز
دوز عاشقلری شرمسار ایله مز
دییوم بیل؛ندن صاحب عنوانی دی
علی اوغلودی ، پس کرم کانی دی
.
.
ازلدن گوزل آدینی ازبرم
او سروردی من بینوا نوکرم
گدای در زادۀ حیدرم
دوشنده بلایه آدین سسلرم
اونون بیر توکون عالمه وئرمرم
آقام تک ستمکاره باش اگمرم
ئولم رخت ذلت تنه گیمرم
کرم اللرینده گوزوم وار منیم
گئدم قبرینه؛چوخ سوزوم وارمنیم
.
.
اگر دوشموسن غملی بحرانلارا
ایشین یا دوشوب نامسلمانلارا
قسم وئر ابوالفضلی عطشانلارا
بلا چوللرینده آخان قانلارا
او صحراده آواره مهمانلارا
او سیناده کی قانه غلطانلارا
سینان باشلارا تشنه قربانلارا
خلوصیله گر سویله سن محنتون
محالْ امریدی وئرمیه حاجتون
.
.
مگر عزت اخباری یاددان چیخار؟
ابوالفضلین ایثاری یاددان چیخار؟
اونون عشق سرشاری یاددان چیخار؟
امان نامه طوماری یاددان چیخار؟
شجاعتلی پیکاری یاددان چیخار؟
او قدرتلی قوللاری یاددان چیخار؟
حسینون علمداری یاددان چیخار؟
ادب دن دولی گنجیه عشق اولا
صلابتلی سرپنجیه عشق اولا
.
.
گلوب محضر شاه نام آوره
ادب گوستروب حجّت داوره
سلام ایله دی زادۀ حیدره
دئدی لطفیوی کسمه بو نوکره
حرملرده وار آیری بیر منظره
عطش حمله وردی صولان گوللره
خصوصا ً ربابین گولی اصغره
گلوب تنگه قلبیم وداد ایستورم
حضوریندن اذن جهاد ایستورم
.
.
فدایم آقا مه لقا جدّیوه
جانیم قربان اولسون اوجا قدّیوه
اسیرم کمان قاشدا کی مدّیوه
وورار بوسه عباس ایاق ردّیوه
منه اذن وئر جان فدا خدّیوه
تجاوز ائدوب کیمسه سر حدّیوه
توکوم قانینی سیل ائدوم سدّیوه
بیچیم باشلارین کوفه کفارینی
فراتین آچوم باغلی یوللارینی
.
.
قسم سینه وین سرّ محبوسینه
آتان حیدرین ذکر یاهوسینه
آناوین سینان قانلی پهلوسینه
باخ عباسیوون شور محسوسینه
بو قوللاری آچ باخما افسوسینه
اولوم حمله ور کوفه زالوسینه
قسم اصغرین مدّ ابروسینه
اونون آند اولا حال مأیوسینه
گتوررم عمرسعدی پابوسینه
.
.
دولوب گوزلری سرور عالمین
چکوب سینیه بیشه لر ضیغمین
دئدی آل اله نهضتین پرچمین
گوتور مشکیوی حق اولا همدمین
کنار ائت نگهبانلارین علقمین
فقط سو گتور جنگه ائتمه کمین
بونا آگه اول ای نگین ثمین
نه اندازه چوخ قیرسان اشراریدن
آچاللار عوض یولدا قیزلاریدن
.
.
اودم آیریلوب شمسیدن ماهتاب
چیخوب مرکب اوسته چُنان بوتراب
زمامین چکوب ائتدی مرکب شتاب
یتوب کارزاره دایاندی عقاب
هله چکممیشدی یوزوندن نقاب
هله ائتممیشدی او قومی عتاب
دوتوب لشکری ناگهان التهاب
هراسان ائدوب لشکر ارذلی
دوشوب سس؛نجفدن گلوبدور علی
.
.
دئدی لشکره؛ حق شعارم بیلون
سلیل شه دین مدارم بیلون
حسینه اولان جان نثارم بیلون
متانتده حیدر وقارم بیلون
همان شیر روبه شکارم بیلون
همان وارث ذوالفقارم بیلون
توکم قانیزی بی قرارم بیلون
ولی گلمیشم نهریدن سو آلام
اگر قویماسیز جانیزه اود سالام
.
.
علی اوغلی آللهه باشین اگر
سزاوار درگاهه باشین اگر
او سرّ فدیناهه باشین اگر
ره حقده خونخواهه باشین اگر
نه اکراه و گمراهه باشین اگر
کی تنها یداللهه باشین اگر
حسین تک شهنشاهه باشین اگر
یزید عالمه مفخر اولماز بیلون
زنازاده دن رهبر اولماز بیلون
.
.
عمرسعدسیر ائتدی بیر لشگره
دئدی کیمدی حارب بو نام آوره
کی عباسه بیر درس عبرت وئره
او لحظه دوشوب همهمه صفلره
گوروبلر کی مارد گلور محضره
دئدی اذن وئر سن بو غارتگره
بو صحرایه من اود سالوم یکسره
توکوم قان او اندازه قاخسون داغا
ابوالفضلی آتدان سالوم توپراقا
.
.
عمرسعدیدن آلدی فرمانینی
گلوبدور حریفین توکه قانینی
گوروب روبرو حیدرین جانینی
قریشین همان شیر غرّانینی
وئروب مارد اوّلده جولانینی
ائدوب حائل عباسه قلخانینی
آتوب نیزۀ تیز و پرّانینی
هماندم ابوالفضل آچوب پنجه سین
هواده دوتوب ماردین نیزه سین
.
.
علی اوغلی سرحدّ جرأت ده دی
باخوب مارده گوردی وحشتده دی
گوروب نیزه اوج ظرافت ده دی
حریف همچنان خوف وغفلت ده دی
الین قوزادی سوز مهارت ده دی
آتوب نیزه نی گوز او ضربت ده دی
خدا بولدی ضربه نه قدرت ده دی
دگوب ماردین جوف قلبین سیخوب
سوکوب سینه نی نیزه دالدان چیخوب
.
.
دوشوب سس ؛ بو نام آوره مرحبا
حسین ؛ بیله سرلشکره مرحبا
بونی خلق ائدن داوره مرحبا
بونا صود وئرن مادره مرحبا
بو مارد ییخان اللره مرحبا
غضب ده خود حیدره مرحبا
ملکلر دییور یکسره مرحبا
علی تک اولوبدور دلاور فِکن
او مرحب شکن دی بو مارد شکن
.
.
دوشور صوت ِ تکبیر دیلدن دیله
ابوالفضل باخور لشکره غیظیله
گینه تیغ عریانی آلدی اله
سالوب قلب میداندا بیر ولوله
ائدوب حمله اوّل صف اوّله
قاچان قاچدی دوشدی قالان مشکله
آچوب پیکریندن باشی فاصله
بو اوضاعی کیم گوردی ازدم قاچوب
عمرسعدیلن شمر باهم قاچوب
.
.
غرض، نهری آلدی صفا مظهری
سالوب اللرین نهره دین مفخری
توکوب اووجونا آب ناب و تری
ولی ایچممیشدن دولوب گوزلری
سالوب یادینه تشنه لب اصغری
عطشدن همان اودلانان لبلری
سویی توکدی توپراقه حق لنگری
دئدی گر عطشدن یانا لبلریم
سودان ایچمرم ایچمسه اصغریم
.
.
اودم مشکینی ائتدی سقا پرآب
جِلوسین چکوب یوللانوب تا عقاب
چاتا خیمه گاهه ائدوردی شتاب
یاغور باشینه اوخ چو آب سحاب
باسوب باغرا مشکی او عالیجناب
بیلور منتظردی بو مشکه رباب
ائدور نفسینی بیله هردم خطاب
بو اوخلار گرک قدّیمی اگمیه
منه دگسه ده مشکیمه دگمیه
.
.
ولیکن بلا موجی طوفان سالوب
اوزون قوللارین تیغ عدوان سالوب
گوزونده مکان نوک پیکان سالوب
دگوب مشکه اوخ قلبینه قان سالوب
عمود الده نوفل ده جولان سالوب
عمودین گذارین باشیندان سالوب
همان ضربه عباسی آتدان سالوب
دوشوب توپراقاسسله دی جان حسین
گل ، عباسی ایلولَّه قربان حسین
.
.
حسین؛شیربیشه ن شکار اولدی گل
صفا ئولکه میزدن کنار اولدی گل
وفا گلشنی تارومار اولدی گل
سو توپراقلار اوسته نثار اولدی گل
بؤلوندی باشیم قان،عذار اولدی گل
بدن دوغرانوب اختصار اولدی گل
آنان فاطمه داغدار اولدی گل
بئله سانما عباس راحت ئولور
سوسوز قیزلاریندان خجالت ئولور
.
.
ئورک وئر « مُصَیّب » یَل مُتقنه
ارادت یتور میر پیل افکنه
یتور اللرون قان دولان دامنه
سخادن دولی بیر غنی معدنه
آدون سسله عشقیله گل ، شیونه
دئنن دردیوی قبلۀ ایمنه
صلاح اولسا درمانی یوللار سنه
گینه یاز کی عباسه من نوکرم
اونون بیر توکون عالمه وئرمرم
.
.
#عباسیه_شجاعت
#قلم_یل_یل_نینوادن_دانیش
#مصیبی_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید