اربعین
.
✍️ #زبدةالاشعار ✍️
.
🆔: @nohe_tork
.
#سبک_ای_ویرن_ویرانه_یرده …
.
مرحوم تائب تبریزی
.
قیزلارون گتدیم حسینیم شامیدن دشت عراقه
وئر خبر عباسون الده بیر علم چیخسون قباقه
.
.
سن بو چولده سو یانیندا تشنه ویردون جان حسینیم
کوفه و شاماته گیتدیم منده دل سوزان حسینیم
بسکه گوردوم داغ حسرت اولدی باغریم قان حسینیم
دوزمیشم بیر اربعیندور محنت و درد فراقه
.
.
نیزه باشونده سنون تا صوت تکبیرون اوجالدی
قرخادین یاسلی عزالی بیکسی آردینجا سالدی
من اوزومده شامه گیتدیم لیک روحیم بوردا قالدی
روحیمی گلدیم زیادت ایتماقا بیرده عراقه
.
.
زینبه مدّتی قارداش اشقیا ویرمزدی فرصت
تا گلوب ششگوشه قبرون ایلیم بوردا زیارت
گلماقا بو سرزمینه تاپمیشام ایندی فراغت
یوخسا مدّتدور حسینیم دوشموشم بو اشتیاقه
.
.
هر بلانی جانه آلدیم من قبول منّت ایتدیم
قیزلارون آلدیم کناره کوفیه قول باغلی گیتدیم
باشوی گوردوم جداده باور ایله جانه یتدیم
ایلمیشدی هتک حرمت میزبان سن تک قوناقه
.
.
باشوی گوردوم جداده باغریمی قان ایلدیم من
باشلادیم صحبت تمام خلقی حیران ایلدیم من
ملّت کفره بیان حکم قرآن ایلدیم من
واقعا” ویردیم شکست واقعی اهل نفاقه
.
.
سانما بیر لحظه باشمدان فکریوی آتدیم حسینیم
دلده قارداش وای سرشکه خون دل قاتدیم حسینیم
آغلادیم آغلار گوزیله خلقی آغلاتدیم حسینیم
ایستدیم ذلّت خدادن سر به سر اهل عراقه
.
.
گون دالنجا شامه نئچه کوکب رخشان آپاردیم
اوغلی قارداشی ئولن بیر فوج سرگردان آپاردیم
متّحد بیر عدّه یاسلی دیده سی گریان آپاردیم
سویلدی احسن گورنلر بیله عالی اتفاقه
.
.
شامی گزدیم داغ حسرت لاله تک بو قلبه آلدیم
آه آتشباریمیله بیر یانار اود شامه سالدیم
قیزلارون آلدیم کناره بیر خرابه یرده قالدیم
آغلادی گول یوزلی قیزلار یتدی ناله نُه رواقه
.
.
گوشة ویرانسراده آل پیغمبر قالاردی
هامودان آرتوخ رقیّه شوریله شیون سالاردی
بیر یتیمانه باخیشدا صبریمی الدن آلاردی
گه باجیم کلثوم اوپردی گه آلاردیم من قوجاقه
.
.
تیر آهی قارداش – اودلی قلبیمی از بس دلردی
حسرتیله اشک حسرت عارضه گوزدن الردی
گوزلری یولدا همیشه آهو تک دائم ملردی
خسته بلبل تک قوناردی دمبدم بیر گُل بوداقه
.
.
کنج غمده توپراق اوسته تاپمادی بیر استراحت
گُل آدون ورد ائتدی قارداش دمبدم ساعت به ساعت
عاقبت تاپدی یارالی باشوی ایتدی زیارت
آغلادی قویدی دوداقین خیزران دگمیش دوداقه
.
.
شام تک تار ایتدی شامی دردیمی دلده چوخاتدی
آسمان عصمتونده اول ستاره آخدی باتدی
گنج تک ویرانسرای شامده دفن اولدی یاتدی
تا دم آخر نواسی اوج ایدردی نه رواقه
.
.
دوشدی بلبل تک نوادن سوگلون دل زار و محزون
باشون آغوشینده قالدی بی صدا خاموش او دلخون
اوز قرا پیراهنیله اوز الیمله اولدی مدفون
قبره قویدوم اوز الیمله دوشدی سینم احتراقه
.
.
عمّه لیق رسم و طریقین سانما من آزدیم یارالی
اشگیله لفظ وفانی صورته یازدیم یارالی
اولمادی ئل قبرین آخر من اوزوم قازدیم یارالی
آنّین اوپدوم قبره قویدوم صبر سینم گتدی طاقه
.
.
صبر ایدوب دوزدوم دایاندوم عهدیمی باشه یتوردوم
قبرین اوسته اربعینه قیزلارون یغدیم گتوردوم
شامده ویرانه ده بیر گوهر عفّت ایتوردوم
حسرتیم آرتدی آلیشدیم سوز نار افتراقه
.
.
قالدی غربتده مدینه عشقی باشدا دلده دردی
همدم اولدی درد غربت اودلی دلده آه سردی
گلماقا قادر اولیدی گُل بالان منله گلردی
چوخ یورولموشدی او خسته قیز دورانمازدی ایاقه
.
.
شامدن کوچ ایلینده قبرینه دوشدی گذاریم
من دیدیم کرب و بلایه دور گیدک ای گلعذاریم
سویلدی معذورم عمه وار ایاقیمده قاباریم
سیز گیدون دوشدوم وفالی اکبریمدن من اوزاقه
.
.
ایستدوب از بس او شیرین دل اوزون بو تلخ کامه
درد هجرونده دونوبدور گوندوزوم بیر تیره شامه
بیرده لازمدور گیدم من اوندان اوتری شهر شامه
اوردا همسایه اولام اول نازلی شیرین دل اوشاقه
.
.
«تائبه» دم وئردی «سالک» ائتدی «خاقانی» ده شرکت
بیر حسینی خانه ده بو شرح غم تاپدی کتابت
ایسته حضّاره او قبری تا اولا بیر وقفه قسمت
دوتماقا ماتم سالاخ یول با هم او عالی رواقه
.
.
#اربعین_تائب_تبریزی
#قیزلارون_گتدیم_حسینیم_شامیدن_دشت_عراقه
#ترکی
.
✍️ #زبدةالاشعار ✍️
.
🆔: @nohe_torki
نظر دهید