حالات هجرت جناب سید الشهدا از مدینه منوره به مکه
380 بیت
.
.
.
مرحوم میرزا محمد تقی #قمری
.
قیلدی وطن چو سید بطحا مدینه ده
اولدی همیشه محنت عظمی مدینه ده
.
گاهی شهید قیلدیلا دندان احمدی
گه اولدی حمزه ماتمی پیدا مدینه ده
.
خیر البشر عزاسی جهانه سالوب شرر
سندی ستون عرش معلا مدینه ده
.
یاندی رسول درگهی نار جفائله
قوپدی او گون قیامت کبری مدینه ده
.
تاپدی شکست دندۀ پهلوی فاطمه
سقط اولدی محسن،آغلادی زهرا مدینه ده
.
باغلاندی ظلم الیله یدالله قولاری
شور النشور اولدی هویدا مدینه ده
.
بیت الحزنده ناله کنان خیرةالنسا
آهیله قیلدی رحلت دنیا مدینه ده
.
دوغراندی مجتبی جگری زهر کینیله
تابوتنه اوخ آتدیلا عدوان مدینه ده
.
آخر حسینی قیلدیلا آواره وطن
فرصت ویریلمدی قالا تنها مدینه ده
.
افغان یوم هجرت سلطان کربلا
ایتدی اساس محشری بر پا مدینه ده
.
قبر رسولی شوقیله آغوشه چکماقا
ای کاش اولیدی « #قمری » نالان مدینه ده
.
.
.
☑️ نامه به ولید و #مجلس_ولید
.
مهاجران مصیبت سرای درد و عنا
مسافران محبت فضای کوه منا
.
مداد غمله دبیران دفتر هجران
بیاض محنته یازمش بو نوعلن عنوان
.
که چون معاویه بد نهاد والی شام
اولوب روان سقر ایش تاپوب بیله انجام
.
یزید تخت حکومتده برقرار اولدی
زمانه ده علم کفر آشکار اولدی
.
قورلدی قتل امام زمانیچون شورا
ولیده ناله یازیلدی بو نوعیلن گویا
.
بو گون سریر خلافتده برقرار منم
آتام معاویه تختینده شهریار منم
.
یقین دوتمیاجاق سلطنت ثبات قرار
مگر که بیعته دورت کیمسه ائتمسه اقرار
.
ازلده ابن ابوبکر ایکیمجی ابن عمر
اوچومجی ابن زبیر اول قرین فتنه و شر
.
خصوص محرم قرب حریم لم یزلی
عزیز فاطمه سلطان دین حسین علی
.
یتنده نامه سنه ای ولید خوش فطرت
بو دورت نفردن آلورسانمنیم ایچون بیعت
.
او سابق اوچ نفرون امری چوخ دگول در کار
حسین فاطمیه ویرمسن امان زنهار
.
ولیده نامه یتن وقتیده قالوب ناچار
غلام گوندروب ایتدی بو کسلری احضار
.
یتشدی روضۀ پر نور مصطفایه امام
گوروب جماعتی اول روضه ده یتوردی پیام
.
بویوردی سرور بطحا امام حل و حرم
یزید مجلسینه ای غلام من گلم
.
روانه ائتدی غلامی امام جنّ و بشر
ویروب معاویه نون موتینی او جمعه خبر
.
ایشتدی بو سوزی یار ثلاث قیلدی فرار
حرم سرایه گلوب سبط احمد مختار
.
یوزون دوتوب خلف برگزیده ناسه
زبانحالیله قیلدی خطاب عباسه
.
ای مرد نامدار و فادار قارداشیم
شیرخدا برابری سردار قارداشیم
.
آرخام ایلیم کمکیم یارو یاوریم
آل عبایه قافله سالار قارداشیم
.
قربان اولوم او قدوه بیر گل قباقیمه
عباس نامدار علمدار قارداشیم
.
گلدی حضور سرور ابراره بنده وار
عرض ایتدی پیشواسینه عباس نامدار
.
لبیک ای شهنشه ابرار قارداشیم
نور دوچشم احمد مختار قارداشیم
.
قارداش مخاطب ایلمه قربان اولوم سنه
ای یادگار حیدر کرار قارداشیم
.
نولموش سنه قرص قمر تک دوتولموسان
سویله گوروم نه دردر و غمون وار قارداشیم
.
بویوردی قارداشی عباسه شاه تشنه لبان
اولوب جهیمه روان زاده ابوسفیان
.
منی ایدوبدی ولید اوزحضورینه احضار
یزیده بیعت ایدم یا که ایلیه آزار
.
توقف ایتمه بنی هاشمه سن ایله خبر
منیم دالمجا گرک ایستینلریم گله لر
.
اول ، یانونجا مسلم سرداریمی گتور
اکبر شبیه احمد مختاریمی گتور
.
ایله خبر امام حسن یادگارینه
جعفرله فضل عون وفاداریمی گتور
.
لیلا ایشتمه سون دئمه کلثوم و زینبه
قارداش تمام یار وهواداریمی گتور
.
.
امدادیمه گلون منی بی یار قویمیون
اول مجلس ایچره دیده سی خونبار قویمویون
.
الله عزیزی کون ومکان تاجداریم
اغیار منزلینده منی خوار قویمیون
.
نعرم اگر اوجالسا اوزون تیز یتور منه
دشمن الینده زار وگرفتار قویمیون
.
عباس عرض قیلدی سنی خوار قویمارام
بی یار وغمگسار ومددکار قویمارام
.
اینجیدسه لر اگر سنی مجلسده یاحسین
واللهی بیل مدینه ده دیار قویمارام
.
او دم که صحن سراده امام کل انام
ولید مجلسنون عزمینه قویاندا اقدم
.
نه گوردی چولقادی آفاقی نالۀ یارب
گلور اساسیله خیر النسا قزی زینب
.
نظامیله ایکی اوغلی صولوندا ساقیندا
ویروبدی قولتوقونا ذوالفقاری برق آسا
خطاب ائدوب دیر ای نور دیدۀ زهرا
.
بو نوع رابطه واردور رابطه سیز گئتمه
ولید مجلسینه سن رَباط سیز گئتمه
.
صراط باهرۀ مستقیم سن اما
بو رهگذاره دلیل صراط سیز گتمه
.
زمانه ایچره سلیمان کربلا قارداش
قویوب جلالوی الدن بساط سیز گتمه
.
ایکی جوانیمی شاطر کیمی قباقوه آل
مدینه شاهی سن عیش و نشاط سیز گتمه
.
الوب قلنجوی باغلا ردانون آلتندان
اماندی قورخولوسان احتیاط سیز گتمه
.
بویاندا باخدی نه گوردی امام دل مغموم
بر اوزگه حالتیلن گلدی باجی سی کلثوم
.
الینده مصحف شیر خدا بناله و آه
زبانحالیله سویلر که یا ولی الله
.
ولید مجلسینه گل پناه سیز گتمه
داغتما شوکتوی عزّ و جاه سیز گتمه
.
کلام ناطق پروردگارسن اما
حمایل ایله کلام اِله سیز گتمه
.
مشخص امردی هیچ قوش قنادسیز اوچماز
غریبلر کیمی خیل و سپاه سیز گتمه
.
غرض شهنشه دین، وارث امیر نجف
اوتوز نفرله گیدوب مجلس ولیده طرف
.
دوروب کنار عمارتده زُمرۀ انصار
قدم، سرایه قویوب پور احمد مختار
.
ولید قیلدی امام زماننی پیشواز
گتوردی مجلسه با صد محبت و اعزاز
.
مُصَدَّر اولدی چو سلطان عالم تمجید
زبان حالین آچوب مَصْدَرِ جلاله، ولید
.
فدا اولوم سنه ای یادگار خیرِ اَنام
گیدوبدی دار فنادن بقایه والی شام
.
خلافت امرینه اولموش یزید حکمی روان
یازوبدی کثرت تاکیدیلن منه فرمان
.
سنون جنابوه ای سبط مصطفی ناچار
گرک بوگونده بو فرمانی ایلیم اظهار
.
بیرنامه شامدن منه پنهان یازوبدیلار
قِرطاسی غم، مرکّبینی قان یازوبدیلار
.
مضمونی ظلم، مصدرِ هر سطری بیر سِنان
عنوانینی نشانۀ طوفان یازوبدیلار
.
هر نقطۀ خدنگ جفا تیر و جان ستان
هر حرف نوک خنجر برّان یازوبدولار
.
هر اَلْفی آه، بائی بلا، تائی تیغ کین
ثائین ده ثار عترت عمران یازوبدیلار
.
هر جیمی بیر جوان اولومی، حائی حربگاه
خائین خرابِ خانۀ ایمان یازوبدیلار
.
هر دالی درد، ذالی مذمّت علامتی
رائیله زائی رزم دلیران یازوبدیلار
.
هر سينی بیر سِنان عوضی، شین شرارته
صادی صدای ناله و افغان یازوبدیلار
.
ضادی ضیاءِ يثربی خاموش قیلماقا،
طائیله ظائی ظلمت طغیان یازوبدیلار
.
عینی عزا نشانه سی، غینی غم و الم
فائی فغان زینب نالان یازوبدیلار
.
قافینده قتل آل عبا، کافی بی کفن
لامین لباس سیز تنِ عریان یازوبدیلار
.
ميمينده مین مصيبت و نونینده ناله لر
هائین هراس، واوينی ویران یازوبدیلار
.
لام ِ کشیده ده چکولوبدور لوای غم
یائین یزید ایچون بیله دیوان یازوبدیلار
.
واضح بودور جنابوه، گر بیعت ایتمه سن
بی شک وشبه قتلوه فرمان یازوبدولار
.
ثبت ایليینده دفتری روز الستده
« #قمرینی » نظم تختینه سلطان یازوبدیلار
.
.
قیلدی بیر الفاظ غیریلن دوباره عرض حال
ای دُر دریای رحمت منبع فضل و کمال
.
شامیدن ظلمیله بیر املا یازوبلار یا حسین
اوّلِ ، الفینده واویلا یازوبلار یا حسین
.
بائی بیر بیداد تائی تیغ ثانی ثار آل
جیمینی جان قصدینه فتوا یازوبلار یا حسین
.
ذاتی ذلت راء وزائی رزم سینی سنان
شینی نی شمشیر برق آسا یازوبلار یا حسین
.
صادی صدر سینه دن آماج پیکان اولماقا
ضادی ضرب خنجر اعدا یازوبلار یا حسین
.
طائی طوفان مصیبت ظائی ظلم اشقیا
عینی عریان جسمینی قطعا یازوبلار یا حسین
.
غینی غربتده غریب و بی مدد کار اولماقون
قائینی فریاد وا غوثا یازوبلار یا حسین
.
قافینن معناسی قولاری قلم اولماقلقا
اول ایکی قول صاحبین سقا یازوبلار یا حسین
.
کاف عبارت کربلادن لام لوای ظلمدن
میمینی مین محنت عظما یازوبلار یا حسین
.
نون عبارت نیزه دندور ها هلاکتدن مراد
واوینه واحسرتا معنا یازوبلار یا حسین
.
لام تکرار کشیده لجه دریای خون
یا یزیدین حکمینی مجرا یازوبلار یا حسین
.
ایتمسون بیعت غمونده نغمه ساز اولماقلقا
ماتمونده « #قمری » شیدا یازوبلار یا حسین
.
.
.
بویوردی سبط رسول خدا امام وحید
محالدور که ایدم بیعت یزید پلید
.
خیال خام قیلوبدور یزید بد فرجام
ایده او فاسقه بیعت امامین اوغلی امام
.
بو بیعت اوسته گرکدور حسین تشنه جگر
قیامت ایلیه بر پا النده تیغ دوسر
.
بو بیعت اوسته گرک سو کیمی آخا قانلار
بو بیعت اوسته کسیلسون گل اوزلی قربانلار
.
بو بیعت اوسته گرکدور چخا فلکلره آه
اولا قیامته دین کربلا زیارتگاه
.
ادبله عرض ایلدی معرض حضوره ولید
که اختیار سنوندور ایا امام مجید
.
ایاقه دوردی قیتسون او شاه تشنه لبان
ولیده سویلدی جرئتله بی حیا مروان
.
حسینی قویما قدم قویماقا کناره ولید
اگر گیده اله دوشمز حسین دوباره ولید
.
اوزی وحید کمکسیزدی منزلون خلوت
گرک آلاق بو امیر حجازیدن بیعت
.
ایشتجاقین بو سوزی اول امام فرزانه
دولاندی سهم و صلابتله باخدی مروانه
.
سپهر شوکته فرمایش ایتدی بیر ماهم
شجاعت عالمینه وارث یداللهم
.
اگر الیمی اوجالدام رواق افلاکه
تمامینی توکرم بیر تکانیلن خاکه
.
گر ایستیم ایلیم کن فکانی زیر و زبر
منیم الیمده چوخ آساندور کلمح بصر
.
اشارتیمله تاپار انهدام چرخ فلک
صلابتیمله دوشر پیچ و تابه گاو سمک
.
گلور تزلزله حربیمدن عالم ملکوت
فلک شجاعتیمه مات اولور ملک مبهوت
.
فنا جهانی اگر ایستسم فنا ایدرم
بیر اوزگه قسم جهان تازه دن بنا ایدرم
.
ستون عرش خداوند قادر ازلم
وکیل حضرت پروردگار لم یزلم
.
فراز چرخ رشادتده ماه تابانم
عزیز فاطمه فرزند شاه مردانم
.
کیمین نه جراتی وار ای لعین بد اختر
منه جسارت ایده ئولمیوب علی اکبر
.
حقیر سانما منی چوخ جلال و جاهیم وار
دالمدا اکبر و عباس تک پناهیم وار
.
تمام ایدنده سوزوین زاده شه مردان
جواب ویردی علی یادگارینه مروان
.
گلونجه قارداشون عباس ای امیر عرب
جنازون اوسته آچار باشینی باجون زینب
.
هراییوه یتشر بیر زمان علی اکبر
یارالی جسمیوی صد پاره قان ایچینده گورر
.
صلابتیله باخوب شاه دین مروانه
مهابتیله اوجالدوب سسین دلیرانه
.
دوتوب یوزون قاپیا اول شفیع روز حساب
زبانحالیله گویا بو نوعی قیلدی خطاب
.
مشکلدی ایشیم ای شه والا نسب اوغلی
شیر غضب آلود امیر عرب اوغلی
.
ای ماه بنی هاشم اوزون قوللی علمدار
خیبر قوپادان پادشهین تشنه لب اوغلی
.
ای قولاری تندن کسیلن کرب و بلاده
عباس علی شیر خدانین غضب اوغلی
.
نه گوردیلر دوتوب آفاقی یا حسین لبیک
فدا اولاخ سنه ای شاه نشاتین لبیک
.
گول اوزلی تازه جوانلار الینده تیغ بلا
سالوبلا عالمه افغان و آه و واویلا
.
قاباقجا الده قلج اشجع معاشر ناس
ایکی بیلک لرینی چمریوب رشید عباس
.
باسوب دبلقه نی ابرولرینه حیدر تک
ایکی گوزی قزاروب شیر حی داور تک
.
گورن دیردی مگر قدرت جلی دور بو
گلوبدی خیبری یخماخلقا علی دور بو
.
دالنجا مسلم سردار عون و هم جعفر
حسن نشانه سی قاسم جوان علی اکبر
.
او یادگار علی مجلس ایچره مروانین
غضب الیله دوتوب چکدی بیر گریبانین
.
دیردی کیمدی ایا زاده زنا ، مروان
قویا حسینه جفا ایتماقا بنا مروان
.
تمام عالم امکانی بیر بیره وورام
بنی امیه نی عالمده قویمارام قیرام
.
گورنده صولت فرزند حیدری مروان
یخلدی پای امام زمانه چکدی فغان
.
گلوب ترحمه انصاف و رحم دریاسی
قوجاقلادی شه عالم وفالی عباسی
.
اوپوپ ایکی قولونی حسرتیله بیر باخدی
سرشک چشمی روان اولدی عارضه آخدی
.
بویوردی ای آتام اوغلی عزیز جان قارداش
قلنجی قوی یرینه صبر قبل دایان قارداش
.
ووران بو قول قلجی قارداش اولماسون کوتاه
سنی زمانه ده چوخ گورمه سین منه الله
.
ایکی گوزوم ایشقی یادگار اشجع ناس
قلنجی کرب وبلاده ووارسان ای عباس
.
گلوب دوباره اوشاهین محبتی جوشه
علی اکبری جان تک چکوبدی آغوشه
.
اوقدر آغلادی نطق اولمادی دیسون سوزینی
اوپردی ماریه ده قانیله دولان گوزینی
.
گره لنوب بوغازیندا سوزی بدیده تر
دیردی گوزلروه من فدا علی اکبر
.
باخوب نه گوردی بوحالتده اول امام همام
قلج النده توکر گوز یاشینی بیر ناکام
.
دیرآتام بدلی پادشاهیم ای عموجان
یتشدی عالم بالایه آهیم آی عموجان
.
یانوندا حرمتیمین اولماماقلقین بولدوم
ولی هرایه گلنده چاغیرماموش گلدیم
.
اگر چه حرمتی اولماز چاغور ماموش گلنین
چتیندی گوگلینی یخماق یتیم لوق گوره نین
.
یتیم اولوب آتا قدرین بولن منم عمو جان
سنون یولندا قباقجا ئولن منم عموجان
.
بویوردی شاه امم آغلاما جوان قاسم
نشانه حسن مجتبی جوان قاسم
.
عموسی قارداشی اوغلیله بیر قوجاقلاشدی
باسوب بری برینی باغرینا چوخ آغلاشدی
.
ویروب تسلی انصار شاه ذوالاجلال
بویوردی صبر ایلیون گلمیوب زمان قتال
.
قالوب شجاعتوزه آشکار اولان گون لر
تحمل ایلیون ای قاسم وعلی اکبر
.
فدا اولوم سیزه ای بلبلان باغ عزا
قلج ووران یریدی, سرزمین گرب وبلا
.
اوچولده ظاهر ایدر سوز قیامت و طوفان
فصاحتیله چکر نظمه «قمری» نالان
.
.
.
شناوران بحار مصیبت و هجران
مسافران دیار کدورت و احزان
.
کمال حزنیله مستوفی کتاب فراق
چکوبدی اول سر لوحه ده بو نوعیله طاق
.
چو شاه یثرب و بطها امام حل و حرم
چخوب ولیدین ایویندن کناره قویدی قدم
.
بو فکره دوشدی او سالار فرقه امت
آتوپ عیالینی قیلسون مدینه دن هجرت
.
حرم سرایه گلوب شاه دین به ناله و آه
اولوب همان گیجه ده زائر رسول الله
.
یتنده روضه شاه فلک جنابه امام
ایدردی جدینه گویا بو دیللریله سلام
.
سلام اولا سنه ای امتین پناهی بابا
حجاز سروری ملک مدینه شاهی بابا
.
حلال ایله منی سندن حسرت آیریلورام
بو قومیدن اورکیمده شکایت آیریلورام
.
سالوبلا باشیمی یوز مین بلایه یا جدا
وطندن ایلدی آواره امت آیریلورام
.
منی بو امته تاپشوردون ای شه ابرار
حسینه ایلدیلر یاخشی حرمت آیریلورام
.
جهاندا قویمادلار قبرون اوسته من قران
گلوب همیشه ایدیدیم تلاوت آیریلورام
.
مسافرم گیدورم کربلا دیارینه
دوشوبدی باشیمه شوق شهادت آیریلورام
.
عیالیمی آپاروب بیرجه فاطمه قیزیمی
سنون یانوندا قویوب من امانت آیریلورام
.
بغشله یتمز الیم قبریوه دوباره گلم
بو آخر ایلمه گیمدور زیارت آیریلورام
.
☑️خواب دیدن امام حسین در روضه پیامبر
.
دیوب بو سوزلری شدتله آغلادی او جناب
اولوب مبارک اولان چشم نازی مایل خواب
.
نه گوردی عالم رویاده جدی پیغمبر
یتشدی باشینین اوسته گوزونده اشگ بصر
.
بویوردی آغلاما ای چشم اشگبار اوغلوم
گلوب مصیبتیوه اول بهار اوغلوم
.
دایانما گور سفر کربلا تدارکینی
گرک عراقه چکیلسون بو دم قطار اوغلوم
.
ایاقه دور که یاخونلاشدی رحلت ایامی
اولوبدی ماریه صحراسی لاله زار اوغلوم
.
قولی کسیلماقا عباسی ایله آماده
فرات اوسته دوشر نعشی زخمدار اوغلوم
.
ویرنده جان اولو سینونده دورت مین اوخ یاراسی
سوسوز باشون کسلور نینواده خوار اوغلوم
.
قوری یر اوسته قالار نعشون اوچ گیجه عریان
غریب الکه ده بی غسل و بی مزار اوغلوم
.
حسن نشانه سینون طوی لباسین حاضر ایله
گرک حنا یاخا قاندان او گلعذار اوغلوم
.
علی اصغری قونداقه باغلاسون آناسی
دوتوبدی حرمله پیکان آبدار اوغلوم
.
او چولده خیمه لرون بیر اساسیله یاناجاق
سالور فلک لره اود شعله سی شرار اوغلوم
.
حرملرون قولی باغلی دوشر بیابانه
اسیر زینبون اولسون شتر سوار اوغلوم
.
یارالی سینه وین اوستونده آت گرک چاپلا
که ایستیور سنی قان ایچره کردگار اوغلوم
.
اوجالداسان باشیمی انبیا آراسیندا
شهادتونله ایدر جدون افتخار اوغلوم
.
آچوب گوزون یوخدان اول امام دل غمگین
او پاک روضه نی قیلدی وداع باز پسین
.
حرم سرایه گلوب شاه مجلس اعزاز
اولوب عبادته مشغول ائدردی راز و نیاز
.
☑️گفتگوی امام با خواهر
.
نماز صبحی ادا ایلین زمان او جناب
زبانحال ایدوب زینبه بو نوع خطاب
.
ای یادگار حضرت خیرالنسا باجی
زهرا آنام نشانه سی کان حیا باجی
.
غمگین گونومده یانیمه گل دردیمی دیوم
واردور باشیمدا گور نجه درد و بلا باجی
.
صادر اولان زماندا خطاب امام دین
ویردی جواب او پادشهه زینب حزین
.
جان ای نشانه اسدالله قارداشیم
سوز دلیله چکمه بیله آه قارداشیم
.
گلسون باشندا هر نه بلا واردی جانیمه
چوخ گورمسین سنی منه الله قارداشیم
.
حکم ایتدی خواهرینه امام زمان حسین
واردور قباقدا بیر سفریم ایتمه شور و شین
.
آلموش فلک قراریمی یوخ منده جان باجی
دور گور سفر تدارکینی مهربان باجی
.
زهرا آنام الیله تیکن پیرهن گتور
اوندان سورا آنام باجی یدّی کفن گتور
.
وار بو سفرده ای باجی بیر اوزگه ماجرا
بیر دست کهنه جامه گتور بیر نچه قرا
.
ایشیتجاقین بو سوزی زینب علم پرور
سوال قیلدی که ای نور دیده حیدر
.
بو نه بلا نه سفردور سن اولموسان عازم
کفن اولنلره قارداش حسین اولور لازم؟
.
قوروب بو نوعیله سن غم اساسی نیلورسن
بویور گوروم منه کهنه لباسی نیلورسن
.
غرض او شوکت و جاه و جلال دریاسی
تسلی زینبه ویردی چاغوردی عباسی
.
بویوردی ای گل گلزار حیدریم قارداش
بلا جنودینه سد سکندریم قارداش
.
گرکدی رشک آپارا یرلره فلک طاقی
دوتا جلال حسینیه کل آفاقی
.
بو گون گرکدی ویرم فرشه عرشیدن ترجیح
جلال و جاهیمه حیران قالا فلکده مسیح
.
شهادتیله یازلسون شفاعتیم رقمی
اوجالسون عرشه سلیمان کربلا علمی
.
تلاطم ایلیه دریای شوکت و اجلال
اولا مدینه ملائکلریله مالا مال
.
او قدر ایلیه قدوسیان نزول و سعود
بسیط ارض اولا مد نظرده تا موجود
.
او قدر نازل اولا یثربه ملائک نور
ایده ظهور تجلای نور وادی طور
.
پیمبران اولولعزم و انبیای عظام
گرکدی جمع اولالار محضر امامه تمام
.
نچون که کرب و بلا شاهی کربلایه گیدر
ولیّ بزم ولا دار ابتلایه گیدر
.
دئ ساربانلارا ائتسون بو ایشده مستعجل
تمام ناقه لر اوستونده باغلاسون محمل
.
اولا کجاوه لرین پوششی گرک زرتار
یانونجا هر بیرینون بیر غلام خدمتکار
.
خصوص زینب ایچون علاوه تخت روان
مرتب ایله گیلن چون ارائک رضوان
.
ستونی جمله زراندوز و زرنگار اولسون
فراز قبه سی یاقوت آبدار اولسون
.
چکون حریر منقش چو شهپر طاووس
گورنده حوری باغ جنان ایده افسوس
.
ویرون او تخت روانه ایله زر و زیور
باخوب جلالینه حیران قالا ملائک لر
.
ایشیدی حکم امام زمانی چون عباس
اولوب تدارکه مشغول ایتدی طرح اساس
.
☑️ آمدن زینبین به بقیع
.
یتن زماندا شیاعه حکایت هجران
جناب زینب و گلثوم اولوب بقیعه روان
.
یتشدیلر چو مزار بطوله دل مغموم
سلام قیلدی قباقجا علی قیزی گلثوم
.
او قبری باغرینا باسدی یانوب مثال کباب
کمال یاسیله گویا بو نوعی قیلدی خطاب
.
یتشدی موسم هجران آنا خداحافظ
ستمله باغریم اولوب قان آنا خداحافظ
.
عجب کناره چخارتدی منی حسین اوغلون
اساسیم اولدی پریشان آنا خداحافظ
.
دئمه شکایت ایدر قیزلاریم حسینوندن
بو جانیمز اونا قربان آنا خداحافظ
.
مدینه دن گوزی یاشلی قووولدوخ آخرده
ذلیل ایدوب بیزی دوران آنا خداحافظ
.
قیزا یتنده مصیبت آنا چکر دردین
دور ایله دردیمه درمان آنا خداحافظ
.
دوباره آچدی دلون زینب الم پرور
بتوله عرض ایلدی حالینی به دیده تر
.
آلوبدی جانیمی محنت آنا خداحافظ
توکوندی شوکت و عزت آنا خداحافظ
.
عراقه گتملیم ، ذلتیله ئولمک ایچون
اسیر لشگر عدوان آنا خداحافظ
.
بو ساچلاروم آغاران وقته اولدوم آواره
یتشدی تازه مصیبت آنا خداحافظ
.
ئولن یریم نه بولوم کربلا اولور یا شام
غریب ئولکه ده حسرت آنا خدا حافظ
.
نه بیر گلوب گیدن اولماز مزاریمین اوسته
دعایه اهل ولایت آنا خداحافظ
.
گذاری شامه دوشوب اولسا بیر نفر حجاج
منی ایدله زیارت آنا خداحافظ
.
بو دللریله او قبر اوسته قوپدی بیر عرصات
یغلدی آه و فغانیله جمله عورات
.
☑️ گفتگوی حضرت زینب با زنان مدینه
.
گوزی دوشوب عوراته چکوب جگردن آه
خطاب ایدوب اولارا دختر ولی الله
.
سیزی قسم ویرورم مرتضی ولایتینه
صباح و شام بو قبرین گلون زیارتینه
.
توزون سیلون بو مزارون ادبله شام و سحر
گلینجه کربو بلادن اسیر عورت لر
.
گلنده ماه محرم اولاندا عاشورا
بو قبرین اوسته چکون ای مدینه اهلی قرا
.
حسینه یاس دوتوب نیلگون گیون جامه
او گونده منده قولی باغلی عازمم شامه
.
دیوب مصیبت و دردین جناب زهرایه
ایکی باجی گئنه قیلدی رجوع مأوایه
.
ائدوب خطاب دوباره امام جن و بشر
گل ای گوزوم ایشیقی نوجوان علی اکبر
.
آتام علی علمین ایله چرخه شقه گشا
دولان مدینه ده هر سمتی ایله ندا
.
بیزیمله غرقۀ بحر بلا اولان گلسون
مسافر سفر کربلا اولان گلسون
.
سوار زین سمند اولدی چون علی اکبر
گورن دیردی که معراجه چخدی پیغمبر
.
☑️ دعوت حضرت علی اکبر از اهالی مدینه
.
علم آلوب الینه چون او زادۀ حیدر
دیردی طایفۀ یثربه بو نوعی خبر
.
دیردی اول خلف زادۀ ولی الله
که ای گروه مدینه تمام اولون آگاه
.
هر باشدا وار علامت سودای کربلا
شوق وصال بزم دل آرای کربلا
.
گورسون سفر تدارکنی کاروان گئدور
اولموش بهار گلشن زیبای کربلا
.
گورموش سفر تدارکی زوار آتلانور
داشدی گوگولده بحر غم افزای کربلا
.
وقت سفردی ایها الاحباب الرحیل
یوکلندی بارخانۀ مولای کربلا
.
چوخ طرفه بخت یاخشی سعادتدی هر کسه
اولسا نصیب دولت عظمای کربلا
.
هر کیمسه نون باشیندا بهشتون هواسی وار
گورسون نه با صفادی تماشای کربلا
.
جنت هارا بهشت هارا کربلا هارا
رشک جهاندی جنت مأوای کربلا
.
فخر ایلیون ملک لره ای کربلالی لر
گوزلر علم آچوب سیزی سقای کربلا
.
هر کیم علی اکبری ایستر گرک اولا
جان نقدی الده مرحله پیمای کربلا
.
دورموش یول اوسته گوزلری زوارین آختارور
شاه غریب و بی کس و تنهای کربلا
.
گوگدن نزول ائدور او چوله لمعه لمعه نور
پر نور اولوبدی وادی سینای کربلا
.
گوگلونده آرزوسی اولانلار دایانماسون
اولسون تدارکیله مهیای کربلا
.
قاسم جوانلاری چاقورور طوی اطاقینه
خوش باشدا هر کیم ائتسه تمنای کربلا
.
هر کیمسه ده محبت شاه مدینه وار
اولسون بیزیله وادی مینای کربلا
.
ثبت اولسا هر ئورکده دوام ایلمز گلور
قالوا بلا گونونده تولای کربلا
.
عشق حسینده ناله چکر هر صباح و شام
آغلار همیشه « قمری » شیدای کربلا
.
غرض شبیه جناب رسول عرش مقام
مدینه اهلینه قیلدی خبر بحکم امام
.
سفر تدارکینه دوشدی آل پیغمبر
دوزولدی ناقه لره زرنگار محملر
.
به حکم شافع روز جزا امام مبین
مرتب ایتدیله اوچ یوز کجاوه زرین
.
او دم که قافله یوکلندی حاضر اولدی قطار
حرمسرایه قیتدی شهنشه ابرار
.
.
☑️گفتگوی امام با فاطمه صغری
.
چکردی آه گوزی یاشلی پادشاه امم
علیله فاطمه نین منزلینه قویدی قدم
.
نه گوردی بستر محنتده بیر نزار یاتوب
ایکی گوزی قاپودا چشمی انتطار یاتوب
.
تمام رنگ رخی کهربا کیمی سارالوب
فراش غمده اولوب جسمی بی قرار یاتوب
.
هلال تک اریوب قامتی مصیبتده
یوزه گوزون یاشینی ایلیوب نثار یاتوب
.
انیسی گوز یاشیدور بسترینده ، لشگر غم
سالوب حصاره اونی دلده آه و زار یاتوب
.
دیر فغانیله هر دم علیل جانیم وای
فزون اولان غم و دردی یارالی جانیم وای
.
اجلده دوتمور اقلی سراغیمی یارب
قالان زمانه ده باشی بلالی جانیم وای
.
گوروب بو حالتی شاه شهید، دلخسته
او دلکبابین آلوب باشینی دیزی اوسته
.
بویوردی ایتمه یوزه گوز یاشین نثار قیزیم
اولان زمانه ده درد و غمه دچار قیزیم
.
گوز آچدی باخدی آتاسینه اول علیله زار
دئدی فلک ایلیوب باشیمی بلایه دچار
.
آلوبدی جانیمی غم یاندورور بو سوز و گداز
آنام ساق اولساایدی بلکه ایلسیدیم ناز
.
اگر ئولم منیچون گوز یاشی توکن کیمدور
دوتوم که ناز ایلیوم نازیمی چکن کیمدور
.
بو ائوده بیر ئوزومم بیرده قانلو گوز یاشیم
نه بیر گلن گئدنیم وار نه قوم و قارداشیم
.
ایشیتجاقین بو سوزی شاه یثرب و بطحا
بویوردی قلبیمی یاندورما آه و واویلا
.
امام کون و مکانم زمانه سروریم
سنه اوزوم آتایام هم آنا برابریم
.
بو اودلو سوزده چکوب فاطمه جگردن آه
خطاب قیلدی که ای کشور امامته ماه
.
اوشاق گرک ئوزی اولسون ئولونجه والده سی
منیم کیمی بو گونه قالماقون نه فایده سی
.
آتاآنایرینی وئرمزای شه ابرار
آناسی اولماسا هرکس اولورزمانه ده خوار
.
آنام وفات ایده لی ای امام دل مغموم
ایاق کسوبدی یانیمدان خانم بی بیم کلثوم
.
او وقتدن که آنام ایلیوب بقایه سفر
منیم عیادتیمه گلمیوب علی اکبر
.
جواب وئردی او بیماره سرورابرار
بوقدرآغلامایاندیرماجانیمی زنهار
.
سنون بو حالیوه ای فاطمه یانار جگریم
حلال قیل گئدورم اولدی کربلا سفریم
.
بومطلبی ایشیدوب بنت شهریار عرب
دئدی امان باباجان سن گلینجه من ئولم
.
بویورعیالیوه دوتسون آناسیزام منه یاس
دعامی آلماقادورسون رشیدعموم عباس
.
سکینه گوزلریمی باغلاسون به دیدۀ تر
مزاره قویسون اماندور منی علی اکبر
.
بویوردی سرور دین ای بلا خریداری
گرک تمام آپارام اهل بیت اطهاری
.
بو غملی واقعه دن یاندی اول علیله زار
یاپوشدی دامنینه سویلدی منیده آپار
.
سنه فدا من اولوم ای امام عرش فراش
آپاریانونجا منی وئرسکینیه قره واش
.
تصورائتمه که بوندان صوراعزیزاولام
نه قدری ساقدی بوجانیم سنه کنیز اولام
.
ایکی ایشون بیرینی ایله ای شه ابرار
ویاآپارمنی یاگتمه سون علی اکبر
.
ویروب اودم قیزیناشاه دین تسلی لر
وداع بازپسین ایلدی به دیده تر
.
☑️ گفتگوی علی اکبربافاطمه صغری
.
قیتدی قافلیه اول شه ملک لشگر
کنار بستره گلدی او دم علی اکبر
.
نه گوردی فاطمه رخسارینه توکر قانیاش
یواش یواش دیوری من سنه فدا قارداش
.
گل ای قویان گوزومی انتظار علی اکبر
جوان لاله رخ و گلعذار علی اکبر
.
نولیدی بیرجه گوریدیم باجی دئیوب گلوسن
سنه اولیدی بو جانیم نثار علی اکبر
.
وصال حسرتیم یوخدی صبر و آرامیم
فراق اودیله بو جانیم یانار علی اکبر
.
دوشر قرا گونه بی کس باجون فرقوندا
قالار ئولونجه گوزوم انتظار علی اکبر
.
نه باخمارام گوله سن سیز نه سرو گلزاره
اگر گلوب گچه یوز مین بهار علی اکبر
.
او گول جمالیوه بیر بلبل خوش الحانم
گیجه گونوز ایدرم آه و زار علی اکبر
.
قضا سالوب قفسه جانیمی قیلوب مهجور
دوتوب ایکی گوزومی اشکبار علی اکبر
.
اماندی بیرجه قاپومدان گیرینجه عزرائیل
گلوب یتیش باجوی قویما خوار علی اکبر
.
اونون بو دیللرینه آغلیوب علی اکبر
باشین دیز اوستونه الدی بویوردی ای خواهر
.
سنون بو سوزلرون آلدی قرار طاقتیمی
زیاده قیلدی هلا و غم و مصیبتیمی
.
بیان قیل منه ای چشم درد تار باجی
بو خسته جانیله حالون نه نوعدور باجی
.
باخاندا قارداشینا چکدی فاطمه ناله
دئدی سوروشما داخی دوشموشم یامان حاله
.
آلوبدی جانیم غم زار و بی قرار ئولورم
دوشوب قرا گونه والله ذلیل و خوار ئولورم
.
قرانلوق حجره پرستار یوخ ئوزوم بیمار
گورنده حالیمه بیکانه لر یانار ئولورم
.
دیلله یدّی بیبیم وار بیر ایلده گورمه میشم
قالوب ئورکده اولان دردیم هر نه وار ئولورم
.
مگر باجی دگولم من سنه علی قارداش
ئوگیلیگون ایلدی یاخشی آشکار ئولورم
.
سنه اوگی باجیام اهل بیته نیلمیشم
آتالّا یوخسا آناسیزلاری کنار ئولورم
.
حرم لره اوگیَم زینبه اوگی دگولم
اودا سالوب منی گوزدن غریب زار ئولورم
.
قاپومی اوچ گیجه گوندوزدی بیر آچان اولماز
گورنده قانلو باشیم قلبی داغدار ئولورم
.
چراغیمی گجه لر یاندروب قویان یوخدور
گجم کیمی گونوزومده اولوبدی تار ئولورم
.
ئولوب قوتارماقیما راضیم چوخ اینجیمیشم
بو خسته جانیمی غمدن دوتوب شرار ئولورم
.
تمامینه دوزرم یا علی سنون دردون
آلوبدی صبریمی یوخ منده اختیار ئولورم
.
بو سوزلری ایشیدنده شبیه پیغمبر
بویوردی ای آناسیز باجی جانه سالما شرر
.
مسافرم سفریم وار منی حلال ایله
علی اکبر اولوبدی بیله خیال ایله
.
بو قدر آعلاما ای بی کس و نزار باجی
اولان هزار غم و محنته دچار باجی
.
کجاوه لر دوزلوب باغلانوبدی بار سفر
دوشور یولا چکلور کوفیه قطار باجی
.
دینده بو سوزی اول ناز پرور لیلا
اوجا سسیله ددی باجی آه و واویلا
.
منی یانونجا آپار ای عزیز جان قرداش
بو قاره گونده قویوب گتمه الامان قارداش
.
او یولدا هرگز علی مینمرم کجاوه لره
دوشوب یانونجا گلیم من پیاده بو سفره
.
منیم او غافله دن قویمیون اوزولسون الیم
اگر کجاوه ده یر اولماسا پیاده گلیم
.
غرض که ساکت ایدوب خواهرین علی اکبر
رجوع قیلدی درست ایلدی بساط سفر
.
رجوع قیلدی درست ایتماقا بساط سفر
تمام یاور سلطان دین صغیر و کبیر
.
خصوص تازه جوانان هاشمی فطرت
ویرردی جمله سی تخت روانینه زینت
.
☑️آمدن حضرت ام البنین (س)
.
ایشیدیلر اوجالوب طرقوا صداسی گلور
شهنشه نجفین یار مه لقاسی گلور
.
دیردیلر یول آچون یا معاشر الاحباب
زمین ماریه سقاسینین آناسی گلور
.
نه گوردولر که یتوب کاروانه ام بنین
یاپوشدی دوتدی علمدار کربلا نین الین
.
آپاردی محضر پاک امام والایه
دولاندوروب باشینا قیلدی عرض مولایه
.
فدا اولوم سنه ای کاینات مولاسی
علی اکبره قول ویرمیشم بو عباسی
.
اگر قبول ایلسن ای امام عرش فراش
بو اوغلوم اوغلووا نوکردی من سنه قره واش
.
بویوردی سرور بطحا ایا ملک منظر
بو قدر ویرمه حسینه بیله خجالتلر
.
اوزون منه آناسان اوغلون همزبانیمدور
وفالی قارداشیم عباس جسم و جانیمدور
.
بو سوز تمامه یتوشموشدی گوردیلر یاران
اوجالدی خلق آراسیندا آهیله افغان
.
☑️آمدن جناب عبدالله ابن جعفر
.
ایدوب نظاره خلایق نه گوردولر ناگاه
جناب جعفر طیّارین اوغلی عبدالله
.
گلور یانینجا ایکی نوجوان لاله عذار
دیر فغانیله ای سبط احمد مختار
.
قوجالموشام من اوزوم یوخدی طاقت سفریم
منیم یریمه عوضدور بو نور دیده لریم
.
عم اوغلوووندا بولار تحفه محقریدور
ولی ایکی قوزی بیر قوچ فدا برابریدور
.
زمین کرببلا ایچره ای امام زمان
کرگ ازل اولالار اکبر اوغلووا قربان
.
سوزین تمام ایدوب اول پیر ناتوان علیل
دوروب کناریده گوز یاشینی ایدردی سبیل
.
او دمده چونکه بفرموده امام امم
گلوب کجاوه لره اگلشوبدی اهل حرم
.
حرمسرا قاپوسیندان اوجالدی سس ناگاه
نجیبه زینب بنت علی ولی الله
.
کنار اولون چکیلون نور حق ضیاسی گلور
حریم لم یزلین بانوی حیاسی گلور
.
عروس جعفر طیارخواهر حسنین
جلال مخزنی نون در پربهاسی گلور
.
او کیمسه دور بو گلن عورت ای معاشر ناس
أچاندا باشینی گون چخماقا حیاسی گلور
.
چکیلدی خلق کناره تمام پیر و جوان
جلال کوکبۀ فاطمیه اولدی عیان
.
چخوب حرم قاپوسیندان بعز و ناز و ادب
حسین باجیسی خیر النسا قیزی زینب
.
کنیز لر دوزولوب هم صولوندا صاقیندا
دوروب نظامیله قارداشلاری قباقیندا
.
آلوب آرایه اونی هاشمیه عورتلر
گیروبله قولتوقنا قاسم و علی اکبر
.
بو شوکتیله یتن وقته بانوی دو جهان
قباقینه چکیلوب زر نگار تخت روان
.
باخاندا تخت روانه او بنت اشرف ناس
ویروب ایاقینین آلتینا چکنینی عباس
.
یاپوشدی قولارینی مکه و حرم شاهی
خطاب قیلدی که ای برج عصمتین ماهی
.
بویور جلالیله تخت روانه بسم الله
گرک عراقه گیده پیشخانه بسم الله
.
#گریز به #کوچ_کربلا
.
بو یرده خاطریمه دوشدی دشت کرب و بلا
کباب اولوب اورگیم یاندی آه و واویلا
.
او دم که ماریه دشتینده روز عاشورا
همین بو زینب محنت نصیب بخت قرا
.
جفائیلن قولی باغلی ایکی گوزی گریان
برابرینه چکن دمده ، ناقۀ عریان
.
اووشدوروب ئورگین گوزلری توکوب قان یاش
دیردی هاردا قالوبسان امان حسین قارداش
.
باخاردی حسرتیله هر یانا بدیدۀ تر
دیردی گل بیبیوی سال یولا علی اکبر
.
کیمی دیردی قرادور گونوم داغلدی اساس
هانی کجاویه میندیرمگه عموم عباس
.
.
.
غرض مدینه دن اول زاده ولی الله
اولوب جلای وطن قیلدی عزم بیت الله
.
فلک زمانیه بیر شور و آه و وا سالدی
عیال فاطمه نین دردی بی دوا قالدی
.
بس ایت بو قصه نی « #قمری » جهانی دوتدی الم
یازاندا شرح مصیبت شراره دوتدی قلم
.
.
#خروج_مدینه
#مجلس_ولید
#حضرت_صغری
#قیلدی_وطن_چو_سید_بطحا_مدینه_ده
#مهاجران_مصیبت_سرای_درد_و_عنا
#قمری
#ترکی
.
.
نظر دهید