زبانحال جناب رباب (س) به علی اصغر (ع)
.
.
.
#سبک_لایلای_ای_جبهه_لرین …
.
.
ستار رزاقی تبریزی
.
.
لای لای ای سینَمین آرامی لب عطشان بالا لای لای
تاپمیان دردینه بو دشتیده درمان بالا لای لای
اصغریم آغلاما لای لای
سینَمی داغلاما لای لای
.
.
باغلیوب آب فراتون یولونی اهل شقاوت
خیمه لرده سوسوزوندان یانوری آل رسالت
اهل کین چکموری بیلمم نیه بیر ذرّه خجالت
ایلیوبلر بوقدر ظلمیده ظغیان بالا لای لای
قان اولا آب فراتی
قویدی لب تشنه بناتی
.
.
گتیروب دست قضا بیزلری بو دشت بلایه
بیزی وادار اِلیوب صبح و مسا دادونوایه
آلتی آیلیق بالا صبر ایلیه بیلمز بو جفایه
چونکی ایلر اورگین درد و محن قان بالا لای لای
صبر اِئله نازلی بالام یات
آز منی حالیوه آغلات
.
.
فلک ایستور سنی مندن آیرا دار فناده
ایده مجنون قویا آواره بو صحرای بلاده
دونده ره لیله تاره گونومی کربوبلاده
قلبیمی تیر غمیله ایده شان شان بالا لای لای
درد و غم سینَمی داغلور
هامی احوالیه آغلور
.
.
سو کنارینده دوشن ماهی مثالی چابالورسان
شرر آهویله لرزه دل زاره سالورسان
منِ بیچاره نون آرام دلون الدن آلورسان
ایتمه ناله بو قَدَر صبر اله بیر آن بالای لای
حسرتیله منه باخما
یاندیروب قلبیمی یاخما
.
.
نه سو وار خیمده نه سینه ده صود ای گوزلیم یات
رحم قیل بو پوزولان حالتیوه آز منی آغلات
صبر اِئله باشداکی سو فکرینی باشیندن اوغول آت
چون ربابی سو سوزی ایلوری گریان بالا لای لای
ایتمه چوخ ناله و افغان
نیلیوم یوخ سویا امکان
.
.
آلتی آیدور منیله همدمیدون صبح و مسانی
گورموشم سنله اولان گونلری چوخ عشق و صفانی
چکورم ایمدی ولی حیف اولا هر درد و بلانی
یوخدی نیلوم بو چتین محنته درمان بالا لای لای
عالمین یوخدی وفاسی
بیزلره چوخدی جفاسی
.
.
سنون احوالیوه رزّاقی سرشگین اَلَر آغلار
یاد ایدوب تشنَله لیقون شور و نوایه گلر آغلار
ماتمینده دئیر ایوای علی لای لای مَلَر آغلار
سسلنر سوز و گدازیله لب عطشان بالا لای لای
ماتمینده سینه داغلار
یانار احوالیوه آغلار
.
.
.
#اصغریه #ستار_رزاقی
#اصغریه_شهادت
#لای_لای_ای_سینمین_آرامی_لب_عطشان_بالا_لای_لای
#ترکی
#زبدةالاشعار
نظر دهید